15 Nov 2015, 14:25
އެމްއެމްއޭގެ ގަވަރުނަރު ޑރ. އަޒީމާ އާދަމް ހާޒިރުކޮށްގެން ކުރިއަށްގެންދާ ބަޖެޓު ކޮމެޓީގެ ބައްދަލުވުން ސިއްރުކޮށްފި އެވެ.
އެ ކޮމެޓީ ސިއްރުކުރަން ފާސްކޮށްފައި ވަނީ ކޮމެޓީގެ މެމްބަރުންގެ އަޣުލަބިއްޔަތުންނެވެ.
ކޮމެޓީގެ ބައްދަލުވުން ސިއްރުކުރަން ހުށަހެޅުއްވީ އޭދަފުށީ ދާއިރާގެ މެމްބަރު އަހްމަދު ސަލީމެވެ. އަދި އެ ހުށަހެޅުމަށް ތާއީދު ކުރެއްވީ ކުޑަހުވަދޫ ދާއިރާގެ މެމްބަރު އަހްމަދު އާމިރެވެ.
މިއަދު މެންދުރުފަހު 2:00 ގައި އޮތް ބަޖެޓު ކޮމެޓީ ސިއްރު ކުރަން ހުށަހެޅުއްވި އޭދަފުށީ ދާއިރާގެ މެމްބަރު އަހުމަދު ސަލީމް (ރެޑްވޭވް ސަލީމް) ވިދާޅުވީ ގަވަރުނަރާ ކުރަން ހުރި ބައެއް ކަހަލަ ސުވާލުތަކަކީ ގައުމީ ސަލާމަތަށް ނުރައްކާވާ ކަހަލަ ސުވާލުތަކެއް ކަމަށާއި އާއްމުކޮށް އެންމެނަށް އެނގެންޖެހޭ ވާހަކަތަކާ އެނގެން ނުޖެހޭ ބައެއް ވާހަކަތައް ހުންނާނެ ކަމަށެވެ. އެހެންކަމުން ކޮމެޓީ ސިއްރު ކުރަން ހުށަހަޅާ ކަމަށް އޭނާ ވިދާޅުވި އެވެ.
ސަރުކާރުގެ ހުށަހެޅުމާ ދެކޮޅަށް ވާހަކަފުޅުދައްކަވަމުން ކޮމެޓީގައި ހިމެނިވަޑައިގަންނަވާ އިދިކޮޅު އެމްޑީޕީގެ މެމްބަރު ކުޅުދުއްފުށި އުތުރު ދާއިރާގެ އަބްދުލް ޣަފޫރު މޫސާ ވިދާޅުވީ ގަވަރުނަރު ހާޒިރުކުރާ ކޮމެޓީގެ ބައްދަލުވުން ސިއްރު ކުރަންޖެހޭ އެއްވެސް ސަބަބެއް ނެތް ކަމަށެވެ.
އޭނާ ވިދާޅުވީ ގައުމީ ސަލާމަތަށް ނުރައްކާވާ ފަދަ ވާހަކައެއް ދައްކާކަށް އެ ކޮމެޓީގައި ނުޖެހޭ ކަމަށާއި ކޮމެޓީގައި ދެއްކުމަށް ހަމަޖެހިފައި ވަނީ އަންނަ އަހަރުގެ ބަޖެޓާ ގުޅޭ ވާހަކަތައް ކަމަށެވެ.
ކުޅުދުއްފުށި އުތުރު ދާއިރާގެ މެމްބަރު އަބްދުލް ޣަފޫރު މޫސާ ކޮމެޓީ ސިއްރު ކުރާތީ އެކަމާ ހިތްހަމަނުޖެހުން ފާޅުކުރައްވަނީ: ސަން ފޮޓޯ/ ފަޔާޒު މޫސާ
"އަޅުގަނޑުމެން ކުރާ ސުވާލަކަށް ޖަވާބު ދެއްވަމުން ގަވަރުނަރު ވިދާޅުވާންވީ ތި ސުވާލަކީ ގައުމީ ސަލާމަތަށް ނުރައްކާވާ ފަދަ ސުވާލެކޭ އޭރުން މައްސަލައެއް ނެތް އަޅުގަނޑު ބުނާނަން ކޮމެޓީ ސިއްރުކުރަން. އެހެންނަމަވެސް އަދި ނުވޭ ކަންނޭނގޭ ސިއްރު ކުރާކަށް،" ގަފޫރު ވިދާޅުވި އެވެ.
ސަރުކާރުގެ ފަރާތުން އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހަޅާފައި ވަނީ 27.457 ބިލިއަން ރުފިޔާގެ ބަޖެޓެކެވެ. އަންނަ އަހަރުގެ ބަޖެޓުގެ 59 ޕަސެންޓަކީ ރިކަރަންޓު ހަރަދެވެ. އަންނަ އަހަރުގެ ބަޖެޓުގައި އާމްދަނީ ހޯދާނެ 10 ގޮތެއް ސަރުކާރުން ވަނީ ބަޖެޓުގައި ހިމަނާފަ އެވެ.