13 Nov 2015, 11:35
މިޔަންމާގައި ބޭއްވި ތާރީޚީ އާއްމު އިންތިޚާބުގައި ޕާލަމެންޓްގެ އަޣުލަބިއްޔަތު އެގައުމުގެ ޑިމޮކްރަސީ ލީޑަރު އަންސަން ސޫޗީގެ ނެޝަނަލް ލީގް ފޯ ޑިމޮކްރަސީ ޕާޓީން ހޯދައިފިއެވެ.
އަސްކަރީ ވެރިކަމެއް ކުރާތާ 50 އަހަރަށް ފަހު މިޔަންމާގައި ބޭއްވި ފުރަތަމަ ޑިމޮކްރެޓިކް އިންތިޚާބުގެ ވޯޓު އަދިވެސް ގުނަމުން ދާއިރު، ވަގުތީ ނަތީޖާ ދައްކާގޮތުން ސޫޗީގެ ޕާޓީއަށް 348 ގޮނޑި ކާމިޔާބު ވެފައިވާކަން އެގައުމުގެ އިލެކްޝަންސް ކޮމިޝަނުން މިއަދު ބުންޏެވެ.
މިޔަންމާގެ ވެރިކަމުގައި މިހާރު ތިބި އެގައުމުގެ އަސްކަރީ ޖެނެރަލުންގެ ޕާޓީއަށް އިންތިހާބުގައި ވަނީ ބޮޑު ނާކާމިޔާބެއް ކުރިމަތިވެފައެވެ. ތިރިގެއާއި މަތިގެ ހިމެނޭ ގޮތުން 664 މެމްބަރުން ތިބޭ މިޔަންމާގެ ޕާލަމެންޓުން އެޕާޓީއަށް ލިބިފައި ވަނީ 40 ގޮނޑިއެވެ. ސޫޗީގެ ޕާޓީން އަޣުލަބިއްޔަތު ހޯދުމަށް ފަހު ދެން ހުރި ގޮނޑިތައް ކާމިޔާބުކޮށްފައި ވަނީ ކުދި ޕާޓީތަކުންނެވެ.
މިޔަންމާގައި މިހާރު އަމަލުކުރާ ގާނޫނު އަސާސީ ބުނާ ގޮތުން އެގައުމުގެ ރައީސަކު ކަނޑައަޅާނީ ޕާލަމެންޓުންނެވެ. ސޫޗީގެ ޕާޓީން އިންތިހާބު ކާމިޔާބު ކުރިޔަސް އޭނާއަށް މިޔަންމާގެ ރައީސް ކަމަކަށް ނާދެވޭނެއެވެ. އެއީ އެހެން ގައުމަކަށް ނިސްބަތްވާ ދަރިން ތިބި މީހަކަށް ވެރިކަމަށް ނާދެވޭނެ ކަމަށް މިޔަންމާގެ ގާނޫނު އަސާސީގައި ބުނެފައި ވާތީއެވެ. (ޓެލެގްރާފް)