Last Updated: 1 decade 2 week ago
ޕްރޮސިކިއުޓާ ޖެނެރަލް މުހުތާޒު މުހުސިން ރައްޔިތުންގެ މަޖިލީހަށް ހާޒިރުކުރުމަށް މިނިވަން މުއައްސަސާތަކުގެ ކޮމެޓީގެ ސަބް ކޮމެޓީން ފާސްކޮށްފި އެވެ.
ސަބް ކޮމެޓީގައި ހިމެނިވަޑައިގަންނަވަނީ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް، ވިލުށުފުށީ ދާއިރާގެ މެމްބަރު ރިޔާޒު ރަޝީދު، ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ، ދަނގެތީ ދާއިރާގެ މެމްބަރު އިލްހާމް އަހްމަދު އަދި ކެނދިކުޅުދޫ ދާއިރާގެ މެމްބަރު އަލީ މައުރޫފެވެ.
ޕީޖީގެ އިތުބާރު ނެތްކަމުގެ މައްސަލައެއް މަޖިލީހަށް މިއަދު ވައްދާފައިވާ އިރު އޭނާ އެ މަގާމުން އިސްތިއުފާ ދެއްވާފައިވާ ކަމުގެ އަޑުތަކެއް ވެސް ވަނީ ފެތުރިފަ އެވެ. އެހެންނަމަވެސް ޕީޖީ މުހުތާޒު އެކަން ވެސް ވަނީ ދޮގު ކުރައްވާފަ އެވެ.
އެކަމާ ގުޅޭ ގޮތުން ޕީޖީ މުހުތާޒު ވިދާޅުވީ އޭނާ އެ މަގާމުގައި ހުންނެވީ ރައްޔިތުންގެ މަޖިލީހުގެ ރުހުން ލިބިވަޑައިގެން ކަމަށާއި އޭނާގެ މަގާމާ މެދު ގޮތެއް ނިންމަވާނީ ވެސް ރައްޔިތުންގެ މަޖިލީހުން ކަމަށެވެ.
18:49
ގާނޫނީ ވަކީލު އަދި ކެންދޫ ދާއިރާގެ މަޖިލީސް މެމްބަރު އަލީ ހުސައިނާއި އިތުރު މަޖިލީސް މެމްބަރުންތަކަކާއެކު މަޖިލީސް އިދާރާ ކައިރީ ހުންނަ ރެސްޓައުރެންޓެއްގައި ވަގުތު ހޭދަކޮށްފައި ވާނެ ކަމަށާއި އަލީ ހުސައިނަކީ ރިޔާސީ ލޯންޗުކޮޅު މައްސަލައިގެ ތަހުގީގަށް ހައްޔަރުކޮށްފައިވާ އެއްވެސް މީހެއްގެ ވަކީލެއް ނޫން ކަމަށް ޕީޖީ މުހުތާޒު ވިދާޅުވި.
އަލީ ހުސައިނަކީ ސްކޫލްދައުރުގައި އެއްކްލާހެއްގައި ކިޔެވި ބޭފުޅެއް ކަމަށާއި އިސްތއިުފާދެއްވަންޖެހޭ ސަބަބަކީ އަލީ ހުސައިނާ ބައްދަލުކުރުން ކަމުގައިވާނަމަ އިސްތިއުފާދެއްވަން ތައްޔާރަށް ހުންނެވި ކަމަށް ވެސް ޕީޖީ މުހުތާޒު ވިދާޅުވި
ޕީޖީ މުހުތާޒާ ގުޅޭގޮތުން ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ ދެއްކެވި ވާހަކަފުޅު އެމަނިކުފާނު ދޮގުކުރައްވައިފި.
ޕީޖީ މުހުތާޒު ވިދާޅުވީ ރިޔާސީ ލޯންޗުކޮޅު މައްސަލައިގެ ތަހުގީގަށް ހައްޔަރުކޮށްފައިވާ އެއްވެސް މީހެއްގެ ގާނޫނީ ވަކީލަކާ އެމަނިކުފާނު ބައްދަލު ނުކުރައްވާކަމަށް.
އާންމުކޮށް ހުޅުވާލައިގެން ބާއްވާ ރައްޔިތުންގެ މަޖިލީހުގެ ޖަލްސާއެއްގައި އިތުބާރު ނެތްކަމުގެ މައްސަލައަށް ޖަވާބުދާރީވާން ފުރުސަތު ދިނުމަށް މަޖިލީހުގެ ރައީސް އަބްދުﷲ މަސީހު މުހައްމަދުގެ އަރިހުން އެދޭނެ ކަމަށް ވެސް ޕީޖީ މުހުތާޒު ވިދާޅުވި
ސަރުކާރަށް ނިސްބަތްވާ މަޖިލީސް މެމްބަރުން އެމަނިކުފާނަށް ބޮޑެތި ތިން ތުހުމަތެއް ކުރައްވާ ކަމަށާއި އެކަމުން ބަރީޢަވާން ބޭނުންވާ ކަމަށް ޕީޖީ މުހުތާޒު ވިދާޅުވި
އިތުބާރު ނެތްކަމުގެ ވޯޓު ނެގިޔަސް އިސްތިއުފާ ނުދެއްވާނެ ކަމަށް ޕީޖީ މުހުތާޒު ވިދާޅުވި
ކޮމެޓީ ބައްދަލުވުމަށްފަހު ނޫސްވެެރިންނަށް މައުލޫމާތު ދެއްވަމުން ޕީޖީ މުހުތާޒު ވިދާޅުވީ އެމަނިކުފާނު ބޭނުންވަނީ އާންމުކޮށް ހުޅުވާލައިގެން ބާއްވާ މަޖިލީހުގެ ޖަލްސާއެއްގައި އިތުބާރު ނެތްކަމުގެ މައްސަލައަށް ޖަވާބުދާރީވާން ކަމަށް.
ސަބް ކޮމެޓީގެ ބައްދަލުވުން ހުއްޓަލަންޖެހުނީ ކީއްވެގެންކަމެއް އަދި ނޭނގޭ
ޕީޖީ މުހުތާޒު މުހުސިނާ އެކު ބޭއްވި މިނިވަންމުއައްސަސާތަކުގެ ކޮމެޓީގެ ސަބް ކޮމެޓީގެ ބައްދަލުވުން ކުރިއަށް ނުގެންދެވިގެން ހުއްޓާލައިފި
މިއަދު ހަވީރު 5:00 ގައި ޕީޖީ ހާޒިރުކުރުމަށްފަހު ކޮމެޓީގެ ބައްދަލުވުން ކުރިއަށް ގެންދާގޮތަށް ސަބް ކޮމެޓީ ނިންމާލައިފި
ސަބް ކޮމެޓީއަށް ފުލުހުން ހާޒިރުކުރަން ޖެހިއްޖެނަމަ އެކަން ވެސް ކުރަން ސަބް ކޮމެޓީން ވަނީ ފާސްކޮށްފައި
ސަރުކާރަށް ނިސްބަތްވާ މަޖިލީސް މެމްބަރުން ކުރައްވާ ތުހުމަތުތަކާ ގުޅޭގޮތުން ޖަވާބުދާރީ ވާނީ ހަމައެކަނި މަޖިލީހުގައި ކަމަށް ޕީޖީ މުހުތާޒު މުހުސިން މިއަދު ސަން އަށް ވިދާޅުވި
މަޖިލީހަށް ހާޒިރުވާން އަދި ދައުވަތު ލިބިފައިނުވާ ކަމަށް ޕީޖީ މުހުތާޒު މުހުސިން މިއަދު ސަން އަށް ވިދާޅުވެއްޖެ
ރިޔާސީ ލޯންޗުކޮޅުގައި ބޮން ގޮއްވާލި މައްސަލައިގެ ތުހުމަތުގައި ހައްޔަރުކޮށްފައިވާ ބައެއް މީހުންގެ ގާނޫނީ ވަކީލުންނާ ޕީޖީ ވަނީ ބައްދަލުކޮށްފައި ކަމަށް، ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ ވިދާޅުވި.
ޕީޖީ އޮފީހުގެ ބައެއް މެމްބަރުން ސަބް ކޮމެޓީއަށް ހާޒިރުކުރުމަށް އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ހުށަހެޅުއްވި. ނަމަވެސް އެ ހުށަހެޅުން ފާހެއް ނުވި
ޕީޖީ ސަބް ކޮމެޓީއަށް ހާޒިރުކުރަންވާއިރަށް ފުލުހުންގެ ފަރާތުން މައުލޫމާތު ހޯދަން ވެސް އެ ކޮމެޓީން ވަނީ ފާސްކޮށްފައި
ޕީޖީ މުހުތާޒު މުހުސިން ސަބް ކޮމެޓީއަށް ހާޒިރުކުރަން ނިންމާފައި ވަނީ މިއަދު ހަވީރު 5:00 އަށް.
ސަބް ކޮމެޓީގެ ބައްދަލުވުން އަދިވެސް ދަނީ ކުރިއަށް