09 Nov 2015, 15:35
ވޯލްޑް ކަޕް ކޮލިފައިންގައި ރާއްޖެއާއި ހޮންކޮންގު ބައްދަލު ކުރާ މެޗު ކުޅުމަށް ރާއްޖެ އަންނަ ހޮންކޮންގުގެ ޓީމަށް ސަލާމަތާއި ރައްކާތެރިކަން ފޯރުކޮށްދިނުމައްޓަކައި ވާން ޖެހޭ ތައްޔާރީތައް ވެ ނިމިފައިވާ ކަމަށް ފުލުހުން ބުނެފި އެވެ.
ސެންޓްރަލް އޮޕަރޭޝަންސް ކޮމާންޑުގެ ހެޑް އެސިސްޓެންޓް ކޮމިޝަނާ އޮފް ޕޮލިސް އިސްމާއީލް ނަވީން ވިދާޅުވީ، ވޯލްޑް ކަޕް މެޗްގައި ވާދަކުރުމަށް ހޮންކޮންގުގެ ގައުމީ ޓީމު ރާއްޖެ އައިސް ރާއްޖޭގައި ހޭދަކުރާ ދުވަސްތަކުގައި އެޓީމުގެ ކުޅުންތެރިންނާ އޮފިޝަލުންނަށް އަދި ޓެކްނިކަލް ސްޓާފުންނަށްވެސް ފުރިހަމަ ރައްކާތެރިކަން ކަށަވަރު ކޮށްދެއްވާ ކަމަށާއި އެކަމަށްޓަކައި ކުރަންޖެހޭ މަސައްކަތްތައް ފުޓްބޯޅަ އެސޯސިއޭޝަން އޮފް މޯލްޑިވްސް އާއި ސަލާމަތީ ބާރުތަކުން ވަރަށް ބޮޑު އިސްކަމެއް ދީގެން ކުރަމުން ގެންދާނެ ކަމަށެވެ.
އަދި މެޗް ބެލުމަށް ސްޓޭޑިއަމްއަށް ހާޒިރުވާ ސަޕޯޓަރުންގެ ރައްކާތެރިކަމަށް އަޅަންޖެހޭ ހުރިހާ ފިޔަވަޅުތަކެއްވެސް އެންމެ ފުރިހަމަ ގޮތުގައި އަޅައި އެކަމަށްޓަކައި ވާންޖެހޭ ހުރިހާ ތައްޔާރީތަކެއް ފުލުހުން ވަމުންދާކަންވެސް އޭސީޕީ ނަވީން ވިދާޅުވިއެވެ.
ނަވީން ވިދާޅުވީ، ދިވެހި ރައްޔިތުންނަކީ މެހްމާނުންނަށް ފުރިހަމަ މެހްމާންދާރީ އަދާކުރާ އަދި މެހްމާނުންނަށް ރައްކާތެރިކަންދީ ކަމޭހިތާ ބައެއްކަމަށާއި އެކިއެކި ކުޅިވަރުތައް ކުޅެން އަދި ޚާއްޞަކޮށް ބޮޑެތި ފުޓުބޯޅަ މުބާރާތްތަކުގެ މެޗްތައް ކުޅެން ރާއްޖެއަށް ޒިޔާރަތްކުރި ޓީމުތަކަށް ފުރިހަމަ ރައްކާތެރިކަން ދިވެހި ރައްޔިތުންގެ ފަރާތުންނާ ސަލާމަތީ ބާރުތަކުން ދެމުންދާކަން މިފަދަ ކޮންމެ ޙަރަކާތަކުންވެސް ދައްކުވައިދީފައިވާ ކަމަށެވެ.
ރާއްޖެއާއި ހޮންކޮންގު ބައްދަލުކުރާ މެޗު ކުރިން ކުޅޭ ގޮތަށް ހަމަޖެހިފައި އޮތީ ބުރާސްފަތި ދުވަހުގެ ރެ އެވެ. އެހެން ނަމަވެސް ފީފާގެ އެދުމުގެ މަތިން މިހާރު ރާއްޖޭގައި ކުއްލި ހާލަތު އިއުލާންކޮށްފައިވުމުން އެފްއޭއެމް އިން ވަނީ ސަރުކާރާ މަޝްވަރާ ކުރުމަށް ފަހު ބުރާސްފަތި ދުވަހު ހަވީރަށް މެޗު ކުޅޭ ގަޑި ބަދަލުކޮށްފަ އެވެ.
ރާއްޖެއާ ދެކޮޅަށް ކުޅޭ މެޗަށް ހޮންކޮންގު ޓީމު މާލެ އައުމަށް ހަމަޖެހިފައިވަނީ މިރޭ 22:10ގައެވެ. ކޮލިފައިންގައި ރާއްޖެއާ ދެކޮޅަށް ހޮންކޮންގު އެ ގައުމުގައި ބައްދަލުކުރި މެޗުން އެޓީމު މޮޅުވީ 2-0 އިންނެވެ.