04 Nov 2015, 17:55
ނައިބު ރައީސް އަހުމަދު އަދީބުގެ މައްޗަށް ނަގާ އިތުބާރު ނެތް ކަމުގެ މައްސަލާގެ ވޯޓްގައި ބައިވެރިނުވަން އެމްޑީޕީން ނިންމައިފި އެވެ.
އެމްޑީޕީގެ ގައުމީ ހިންގާ ކޮމެޓީގެ މެންބަރަކު މިއަދު ސަން އަށް ވިދާޅުވީ އެ ކޮމެޓީން މިއަދު ބޭއްވި ބައްދަލުވުމެއްގައި އެ ގޮތަށް ނިންމާފައިވާ ކަމަށެވެ.
އެ ކޮމެޓީގައި ތިއްބަވަނީ ޕާލަމެންޓް މެމްބަރުންނާއި އަދި ބައެެއް އިތުރު ބޭފުޅުން ކަމަށް ވެސް އޭނާ ވިދާޅުވި އެވެ.
އެމްޑީޕީގެ ޕާލަމެންޓް ގްރޫޕްގެ މެމްބަރު ރޮޒެއިނާ އާދަމް މިއަދު ކުރެއްވި ޓުވީޓެއްގައި ވިދާޅުވީ ގާނޫނު އަސާސީއާ ހިލާފަށް ނައިބު ރައީސްގެ މައްޗަށް މާދަމާ ވޯޓް ނަގަން އުޅޭ ވާހަކަ އަޑުއިވޭ ކަމަށާއި އެމްޑީޕީން އެ ވޯޓުގައި ބައިވެރިނުވާނެ ކަމަށެވެ.
ރައްޔިތުންގެ މަޖިލީހަށް ހުށަހަޅާފައިވާ ނައިބު ރައީސް އަހުމަދު އަދީބުގެ އިތުބާރު ނެތް ކަމުގެ މައްސަލައަށް ޖަވާބުދާރީވުމަށް ގާނޫނު އަސާސީ ލިބިދޭ 14 ދުވަހުގެ މުއްދަތު ހަތް ދުވަހަށް މިއަދުވަނީ ކުރުކޮށްފަ އެވެ.
ރައްޔިތުންގެ މަޖިލީހަށް ހުށަހަޅާފައިވާ އިތުބާރު ނެތް ކަމުގެ މައްސަލައިގެ ނޯޓިސް ނައިބު ރައީސް އަށް ދީފައި ވަނީ މިދިޔަ އޮކްޓޯބަރު މަހު 28 ވަނަދު ވަހު އެވެ. ނޯޓިސް ދިންތާ މިއަދަށް އަށް ދުވަސް ހަމަވެފައިވާ އިރު މަޖިލީހުގައި އަދި އެ މައްސަލަ އެޖެންޑާކޮށްފައެއް ނުވެ އެވެ.
ނާއިބު ރައީސްގެ އިތުބާރު ނެތް ކަމަށް ނަގާ ވޯޓުގައި 85 މެންބަރުންގެ މަޖިލީހުގެ ތިންބައިކުޅަ ދެބައި ވޯޓު ނާއިބު ރައީސް މަގާމުން ދުރުކުރުމަށް ލިބެން ޖެހެ އެވެ. އެއީ 57 މެންބަރުންގެ ވޯޓެވެ. އެމްޑިޕީގައިތިބީ 22 މެމްބަރުންނެވެ.