31 Oct 2015, 10:59
އެފްރިކާގައި ހިންގާ ތަރައްގީގެ މަޝްރޫއުތަކަށް އިންޑިއާ އިން 600 މިލިއަން ޑޮލަރުގެ އެހީ ދެއްވާނެ ކަމަށް އިންޑިއާގެ ބޮޑުވަޒީރު ނެރަންދުރަ މޯދީ ވިދާޅުވެއްޖެ އެވެ.
ނިއު ދިއްލީގައި ބުރާސްފަތި ދުވަހު ނިމުނު ތިން ވަނަ އިންޑީއާ-އެފްރިކާ ފޯރަމް ސަމިޓްގައި ވާހަކަ ދައްކަވަމުން އިންޑިއާގެ ބޮޑު ވަޒީރު އިތުރަށް ވިދާޅުވީ އޭގެ އިތުރުން ސޮފްޓް ލޯންގެ ގޮތުގައި 10 ބިލިއަން ޑޮލަރު ދެއްވާނެ ކަމަށެވެ.
އިންޑިއާ އާއި އެފްރިކާ އާ ދެމެދުގައި އޮތް ވިޔަފާރީގެ އަގު ވަނީ 2007 ވަނަ އަހރާ އަޅާ ބަލާ އިރު ދެ ގުނަ އިތުރުވެ، 72 ބިލިއަން ޑޮލަރަށް އަރައިފަ އެވެ. އެ އާ އަޅާ ބަލާ އިރު ޗައިނާ އާ އެފްރިކާ އާ ދެމެދު އޮތް ވިޔަފާރީގެ އަގު ތިން ގުނަ އިތުރެވެ.
އިންޑީއާ-އެފްރިކާ ފޯރަމް ސަމިޓްގެ މަގްސަދަކީ ދެ ގައުމުގެ އިގްތިސާދާއި، ދެ ގައުމުގެ މެދުގައި އޮންނަ ގުޅުންތައް ވަރުގަދަ ކުރުމަށް ކުރެވިދާނެ ކަންތަކާ މެދު ވާހަކަ ދެއްކުމަށް ކޮންމެ ތިން އަހަރަކު ބޭއްވޭ ސަމިޓެކެވެ.
މި އަހަރު އެ ސަމިޓްގައި 54 އެފްރިކާގެ ލީޑަރުން ބައިވެރިވެ ވަޑައިގެންނެވި އެވެ. އެ ސަމިޓަކީ އެފްރިކާ އިން ބޭރުގައި އެންމެ ގިނަ އެފްރިކާގެ ލީޑަރުންގެ ބައިވެރިވެ ވަޑައިގެންނެވި އެއްބައްދަލުވުމެވެ. އަދި އިންޑިއާގައި 1983ގެ ފަހުން ބޭއްވުނު އެންމެ ބޮޑު ބޭރު ގައުމު ތަކުގެ ލީޑަރުންގެ އެއްވުމެވެ.
އިންޑީއާ-އެފްރިކާ ފޯރަމް ސަމިޓް ކުރިން ބާއްވާފައި ވަނީ 2008ގައި އިންޑިއާގެ ނިއު ދިއްލީ ގަ އާއި 2011ގައި އެފްރިކާގެ އަދިސް އަބަބާގަ އެވެ.