15 Oct 2015, 14:17
ޓެރަރިޒަމްގެ ހަރަކާތްތަކުގައި ބައިވެރިވުމަށް ރާއްޖޭގެ ޒުވާނުން އެހެން ގައުމުތަކަށް ދަތުރުކުރުމަކީ ވަރަށް ކަންބޮޑުވާ ކަމެއް ކަމަށާއި އެކަން ހުއްޓުވުމަށް ސަރުކާރުން ފިޔަވަޅުތައް އަޅަމުންދާ ކަމަށް ފޮރިން މިނިސްޓަރު ދުންޔާ މައުމޫނު ވިދާޅުވެއްޖެއެވެ.
އެމެރިކާގެ ވޮއިސް އޮފް އެމެރިކާ އަށް ދެއްވި އިންޓަވިއުއެއްގައި ދުންޔާ ވިދާޅުވީ، ސޫރިޔާގައި ނުވަތަ ޔަމަނުގައި ނުވަތަ އެހެން ގައުމެއްގައި ވިޔަސް ޓެރަރިސްޓް ހަރަކާތެއްގައި ރާއްޖޭގެ ޒުވާނުން ބައިވެރިވިޔަ ނުދިނުމަށް ބޭނުންވާ މައުލޫމާތު އެބަހުރި ކަމަށެވެ.
"...އަޅުގަނޑުމެން ވަނީ ފިޔަވަޅުތައް އަޅާފައި ޒުވާނުން ބޭރަށް ދަތުރުކުރުން ހުއްޓުވުމަށް ނުވަތަ އެމީހުން އަނބުރައި ގައުމަށް ގެނައުމަށް. ސީރިޔާގައި ނުވަތަ ޔަމަނުގައި ނުވަތަ ކޮންމެ ތަނެއްގައި ވިޔަސް ޓެރަރިޒަމްގެ ހަރަކާތްތަކުގައި ބައިވެރިވިޔަ ނުދިނުމަށް ބޭނުންވާ މައުލޫމާތު އަޅުގަނޑުމެން އަތުގައި އެބަހުރި،" ވޮއިސް އޮފް އެމެރިކާއަށް ދެއްވި އިންޓަވިއުގައި ދުންޔާ ވިދާޅުވެފައި ވެއެވެ.
އޭނާ އަދި ވިދާޅުވީ، ޓެރަރިޒަމް މާނަކުރާ އެންމެ ފުޅާ ދާއިރާގައި ޓެރަރިޒަމާ މެދު ރާއްޖޭން ކަންބޮޑުވާ ކަމަށާއި ހާއްސަކޮށް ހައްދުފަހަނަ އެޅުމާއި 'ކޮންޒަވޭޓިވް އިސްލާމް' އާ މެދު ކަންބޮޑުވާ ކަމަށެވެ.
"...އޭގެ އެންމެ ފުޅާ މާނައިގައި ޓެރަރިޒަމާ މެދު އަޅުގަނޑުމެން ވަރަށް ކަންބޮޑުވޭ. ހާއްސަގޮތެއްގައި ހައްދުފަހަނައެޅުން އަދި ކޮންޒަވޭޓިވް އިސްލާމް އާ މެދު. އާދަ ކާދައިގެ ގޮތުން ދިވެހިރާއްޖޭގައި އޮތީ، އަޅުގަނޑު ބުނާނީ ރާއްޖެ ކުރިއަށް ދިޔައީ މެދުމިނުގެ ލިބަރަލް ގައުމެއްގެ ގޮތުގައޭ. އަދި ފަހަކަށް އައިސް މާ ބޮޑަށް ހައްދުފަހަނައަޅާފައިވާ މީހުން އިތުރުވާތަން އަޅުގަނޑުމެންނަށް މި ފެންނަނީ . އަޅުގަނޑަށް ހީވަނީ މީ މުޅި ދުނިޔޭގައި ވެސް އޮތް ކަމެއް ހެން. ސަރުކާރުން މިކަން ނަގާފައި ވަނީ ވަރަށް ސީރިއަސްކޮށް،" ދުންޔާ ވިދާޅުވެފައި ވެއެވެ.
ދުރު މުސްތަގުބަލަކަށް ވިސްނައިގެން ސަރުކާރުން ކުރާ މަސައްކަތަކީ ހައްދުފަހަނައަޅާފައިވާ މީހުންގެ ބާރުގެ ދަށަށް ޒުވާނުންގެ ވިސްނުން ދިޔަ ނުދޭނެކަން ކަށަވަރު ކުރުމާއި އިސްލާމް ދީނަކީ މެދުމިނުގެ ދީނެއް ކަމުގެ ރަނގަޅު ވިސްނުން ކުރިއެރުވުން ކަމަށް ވެސް ވިދާޅުވެފައި ވެއެވެ.
"... އެކަމަށް ވަރަށް ގިނަ މަސައްކަތްތަކެއް ވަނީ ކުރެވިފައި. އެއީ އެހާ ފަސޭހަ ކަމެއް ނޫން އެހެން ގިނަ ގައުމުތަކުން ވެސް ބުނާނީ މިހެން ކަންނޭންގެ. އެހެން ގައުމުތަކެކޭ އެއްގޮތަށް ދިވެހި ޒުވާނުންނަކީ ވެސް ވަރަށް ބޮޑަށް ސޯޝަލް މީޑިއާ ބޭނުންކުރާ ބައެއް. އަޅުގަނޑަށް އިނގޭ ގޮތުގައި ރެކްރޫޓް ކުރުމާއި ވިސްނުން ބަދަލުކުރުމުގެ ގިނަ ކަންތައްތައް ހިނގަނީ ސޯޝަލް މީޑިއާގައި،" ދުންޔާ ވިދާޅުވެފައި ވެއެވެ.