15 Oct 2015, 10:38
ސިޔާސީ ދާއިރާގައި އަންހެނުންގެ ދައުރާ ބެހޭ ގޮތުން މެލޭޝިއާގައި ބާއްވާ ކޮންފަރެންސެއްގައި ތަގުރީރުކުރެއްވުމަށް ފޮރިން މިނިސްޓަރު އަދި ޕީޕީއެމްގެ ވިމެންސް މޫވްމެންޓްގެ ރައީސާ ދުންޔާ މައުމޫނު ރޭ މެލޭޝިއާ ފުރާވަޑައިގެންފިއެވެ.
'އާސިއާން ކޮންފަރެންސް އޮން ވިމެން އިން ޕޮލިޓިކްސް' އޮންނަނީ އަންނަ ހޮނިހިރު ދުވަހު ކުއާލާލަމްޕޫރުގެ ޕުޓްރާ ވޯލްޑް ޓްރޭޑް ސެންޓަރުގައެވެ. އެ ކޮންފަރެންސްގައި ބައިނަލްއަގުވާމީ އަންހެން ސިޔާސީ ލީޑަރުންނާއި ގައުމުތަކުގެ އިސްމަގާމުތަކުގައި ތިއްބެވި އަންހެން ބޭފުޅުން ބަައިވެރިވާނެ ކަމަށް އެ ކޮންފަރެންސްގެ ވެބްސައިޓްގައި ވެއެވެ.
ދުންޔާ އެ ކޮންފަރެންސްގައި ތަގުރީރުކުރައްވާނީ ޕީޕީއެމްގެ ވިމެންސް މޫވްމެންޓްގެ ރައީސާގެ ހައިސިއްޔަތުންނެވެ.
އެ ކޮންފަރެންސްގައި ޕީޕީއެމްގެ ވިމެންސް މޫވްމެންޓްގެ ނައިބު ރައީސާ އައިޝަތު އިނާޔާ ވެސް ބައިވެރިވެވަޑައިގަންނަވައެވެ.
އެ ކޮންފަރެންސްގެ ތީމަކީ ' ޕްރޮމޯޓިން ރެޕްރެޒެންޓޭޝަން ތްރޫ ކަނެކްޓިވިޓީ އެންޑް އިނޮވޭޝަން" އެވެ.
އާސިއާންގެ ގައުމުތަކަކީ މެލޭޝިއާ، ސިންގަޕޫރު، ލާއޯސް، ބުރޫނާއި، ކެމްބޯޑިއާ، އިންޑޮނީޝިއާ، މިޔަންމާ، ފިލިޕީންސް، ތައިލޭންޑް އަދި ވިއެޓްނާމެވެ.