14 Oct 2015, 10:01
އިންސާނާގެ ހަށިގަނޑަށް ނުރައްކާ އަދި މަރުބައްޔެއްކަމަށް ސިއްހީ މާހިރުން ވިދާޅުވާ ލިސްޓީރިއާ ބަލިޖެހެނީ ފިނިނުކޮށް ހުއްނަ "ކެރަމަލް އާފަލު" ކެއުމުން ކަމަށް ދިރާސާއަކުން ދައްކައިފި އެވެ.
މޯލްޑިވްސް ފުޑް އެންޑް ޑްރަގް އޮތޯރިޓީން މީގެ ނުވަމަސް ކުރިން ނެރުނު ހެލްތު އެލާޓެއްގައި ވަނީ އާފަލު ކުއުމުގައި ސަމާލުވުމަށް އިލްތިމާސްކޮށްފަ އެވެ.
އެމެރިކާގެ ޔުނިވާސިޓީ އޮފް ވިސްކޮންސިސް މެޑިސަންގެ ފުޑް ރިސާޗް އިންސިޓިޓިއުޓްއިން އިއްޔެ އާންމު ކުރި ދިރާސާގައި ބުނެފައި ވަނީ ކެރަމްލް އާފަލު ހެދުމަށް އެޔަށް ވުޑް ސްޓިކެއްޖެހުމަށް ފަހު ފިނިނުކޮށް ދެދުވަހު ބެހެއްޓުމުން ބެކްޓީރިއާ އުފެދި ލިސްޓީރިއާ ބަލިޖެހެން މެދުވެރިވަނީ ކަމަށެވެ.
މިހާތަނަށް އެންމެ ގިނައިން މީހުންނަށް ލިސްޓީރިއާ ބަލިޖެހިފައި ވަނީ ވެސް އެގޮތަށް ބަހައްޓާފައި ހުއްނަ އާފަލު ފިނިނުކޮށް ތިން ދުވަހަށް ފަހު ބޭނުން ކުރުމުން ކަމަށްވެސް އެދިރާސާގައި ވަނީ ބުނެފަ އެވެ. މިދިއަ އަހަރު އެމެރިކާގައި 12 ސްޓޭޓްއަކުން 35 މީހުން ވިހަވެ، ހަތް މީހަކު ވަނީ އެބަލީގެ ސަބަބުން މަރުވެފަ އެވެ.
ކެރަމަލް އާފަލު : ލިސްޓީރިއާ ބަލި ޖެހެނީ ފިނި ނުކޮށް ހުއްނަ ކެރަމަލް އާފަލު ކެއުމުން -- ފޮޓޯ -- ޓެލެގްރާފް
އެމެރިކާގެ ޔުނިވާސިޓީއޮފް ވިސްކޮންސިސް މެޑިސަންގެ އެސޯސިއޭޓް ޑިރެކްޓަރު އަދި ދިރާސާގެ އިސްވެރިޔާ ޑރ. ކެތްލީން ގްލާސް ވިދާޅުވީ ލިސްޓީރިއާ ބަލިޖެހެނީ އާފަލުގެ ސަބަބަކުން ނުވަތަ ކެރަމަލްގެ ސަބަބަކުން ނޫން ކަމަށެވެ. އެބަލި ޖެހުމަށް މަގުފަހިވަނީ ސްޓިކްޖެހުމުން އާފަލުގައި ހުއްނަ ފެން ބޭރުވެ އާފަލުގައި އުފެދޭ ބެކްޓީރިއާ ކެރަމަލްއަށް ފޯރައިގެން ކަމަށެވެ.
ބެކްޓީރިއާގެ އަސަރުކޮށްފައިވާ އެ އާފަލު ކެއުމުން ލިސްޓީރިއާ ބަލިޖެހިއްޖެ ނަމަ ހުންއައުމާއި ބޮލުގައި ރިއްސުން އަދި ކަރުގައި ރިއްސުން ފަދަ އަލާމާތްތަށް ފެންނާނެ ކަމަށް ވެސް ދިރާސާގައި ބުނެފައިވެ އެވެ.
ބަލިން ރައްކާތެރިވެ ތިބުމަށް ފިނު ނުކޮށް ހުއްނަ ކެރަމަލް އާފަލު ބޭނުން ނުކުރުމަށާއި ނުވަތަ ތާޒާކަންމަތީ ކެރަމަލް އާފަލު ބޭނުންކުރުމަށް ޑރ. ގްލާސް ވަނީ އިލްތިމާސްކޮށްފަ އެވެ.
މީގެ ކުރިން އެކި ފަރާތްތަކުން ބުނެފައި ވަނީ ލިސްޓީރިއާ ބަލިޖެހެނީ ވަކިވައްތަރެއްގެ އާފަލު ކެއުމުން ކަމަށެވެ. އެގޮތުން 'ގްރެނީ ސްމިތް' އަދި 'ގެލާ' ބާވަތުގެ އާފަލުން ލިސްޓިރިއާ ބަލިފެތުރިފައިވާ ކަމަށް މޯލްޑިވްސް ފުޑް އެންޑް ޑްރަގް އޮތޯރިޓީން ވެސް ވަނީ ބުނެފަ އެވެ.
ލިސްޓޯރިއާ ބަލި ފެތުރޭ ކަމަށް ބުނާ ދެ ބާވަތުގެ އާފަލު ރާއްޖެ އިން ފެނިފައިވާ ކަމަށް ވެސް އެ އޮތޯރިޓީން މިދިއަ ޖެނުއަރީ މަހު ނެރުނު ބަޔާނެއްގައި ވަނީ ބުނެފަ އެވެ. އަދި 'ގްރެނީ ސްމިތް' އަދި 'ގެލާ' ބާވަތުގެ ބޭނުން ނުކުރުމަށް ވެސް އަންގާފައިވެ އެވެ.