13 Oct 2015, 18:33
ވޯލްޑްކަޕް ކޮލިފައިންގައި މިރޭ ގަތަރާ ދެކޮޅަށް ދިވެހި ގައިމީ ޓީމު ނުކުންނައިރު އަނިޔާ އާއި ސަސްޕެންޝަންގެ ސަބަބުން ގައުމީ ޓީމުގެ މުހިއްމު ހަތަރު ކުޅުންތެރިންނަށް ނުކުޅެވޭނެއެވެ.
މިރޭގެ މެޗުގެ ކުރިން ނޫސްވެރިންނާ ވާހަކަ ދައްކަމުން ގައުމީ ޓީމުގެ ކޯޗު ރިކީ ހާބަޓް ބުނީ އަނިޔާގެ ސަބަބުން ސީނިއާ ބައެއް ކުޅުންތެރިންނަށް މިރޭ ނުކުޅެވޭނެ ކަމަށެވެ.
ގައުމީ ޓީމުގެ މެދުތެރޭގައި މުހިއްމު ދައުރެއް އަދާ ކުރަމުންދާ ވައިސް ކެޕްޓަން އަހްމަދު އާރިފް (ބަކާ)އަށް ވަނީ ދެ ކާޑް ހަމަވުމުގެ ސަބަބުން މިރޭގެ މެޗަށް ސަސްޕެންޑް ކޮށްފަ އެވެ. އަނިޔާގެ ސަބަބުން މިޑްފީލްޑަރު މުހައްމަދު އުމެއިރު އާއި ފޯވާޑް އަހުމަދު އިމާޒު (އާއްކޮ) އަދި ޑިފެންޑަރު މުހައްމަދު ރަޝީދު (ހޮކޭ) އަށް ވެސް މިރޭ ނުކުޅެވޭނެ ކަމަށް ހާބަޓް ވަނީ ބުނެފަ އެވެ.
ގަތަރާ ދެކޮޅަށް މިރޭ ކުޅޭ މެޗުގައި ގިނަ ޒުވާން ކުޅުންތެރިންނަށް ފުރުސަތު ދޭން ވިސްނާ ކަމަށް ހާބަޓް ބުންޏެވެ. އޭގެ ތެރޭގައި މަހިބަދޫގެ ޑިފެންޑަރު ސަމޫހް އަލީ (ސަމުއްޓޭ) އާއި މާޒިޔާގެ އަހުމަދު އިމާޒް (އާއްކޮ) ހިމެނޭ ކަމަށް ބުންޏެވެ.
ކޮލިފައިންގެ ފުރަތަމަ މެޗުގައި ގަތަރާ ދެކޮޅަށް މާލޭގައި ކުޅެ 1-0 އިން ރާއްޖެ ވަނީ ހިތްދަތި ގޮތަކަށް ބަލިވިއިރު އެ މެޗުގައި އިރުޝާދު ދިނީ ކުރީގެ ކޯޗު ވެލިޒާ ޕޮޕޯފް އެވެ.
ވޯލްޑްކަޕް ކޮލިފައިންގައި ރަށުން ބޭރުގައި ގަތަރާ ދެކޮޅަށް ރާއްޖެ ކުޅޭ މެޗު ފެށުމަށް ހަމަޖެހިފައި ވަނީ މިރޭ ރާއްޖޭގަޑިން 8:30 ގައެވެ