12 Oct 2015, 11:47
ރާއްޖޭގެ 112 ސްކޫލެއްގެ ގްރޭޑް ހަތަރެއް އަދި ގްރޭޑް ހަތެއްގައި ކިޔަވާ ދަރިވަރުންގެ ފެންވަރު ބެލުމަށް ބާއްވާ ނެޝަނަލް އެސެސްމަންޓް ދޭން ފަށައިފި އެވެ.
މިއަދާއި މާދަމާ ދޭ އެ އިމްތިހާނަކީ ދަރިވަރުންނަށްދޭ ތައުލީމާއި އެ ކުދިންގެ ފެންވަރު ވަޒަން ކުރުމަށް ދެވޭ އިމްތިހާނެކެވެ. އެ އިމްތިހާން ނަގާނީ އިނގިރޭސި އާއި ހިސާބާއި ދިވެހި މާއްދާ އިންނެވެ.
އެޑިއުކޭޝަން މިނިސްޓްރީ އިން ބުނި ގޮތުގައި އިމްތިހާން މިއަދު ފަށާފައިވާ އިރު މިއަދު ކުރިއަށް ގެންދާނީ އިނގިރޭސި އިމްތިހާން ކަމަށެވެ. އަދި ސްކޫލުތަކުގައި މާދަމާ ބާއްވާނީ ހިސާބު އިމްތިހާނު ކަމަށް ވެސް މިނިސްޓްރީ އިން ވަނީ ބުނެފަ އެވެ.
އެގޮތުން މިއަދު ހަދާ އިނގިރޭސި އިމްތިހާން މިހާރު ގްރޭޑް ހަތެއްގެ ކުދިން ހަދާފައިވާ އިރު ގްރޭޑް ހަތަރެއްގެ ދަރިވެރުންގެ އިނގިރޭސި އިމްތިހާން ހަދާނީ މިއަދު ހަވީރެވެ.
އިމްތިހާންގައި ބައިވެރިވާ ކޮންމެ ގްރޭޑަކުން ވެސް 2،500 ވަރަކަށް ދަރިވަރުން އިމްތިހާން ހަދާނެ ކަމަށް ކަމަށް އެޑިއުކޭޝަން މިނިސްޓްރީ އިން ބުންޏެވެ.
މިނިސްޓްރީން ބުނީ ސުވާލު ކަރުދާހުގެ އިތުރުން، މާއްދާތަކުން ކުދިންގެ ފެންވަރަށް އަސަރު ކުރާ ސަބަބު ދެނެގަތުމަށް ބާއްވާ އިމްތިހާނުގައި ދަރިވަރުންނާއި ޓީޗަރުންނަށް ސާވޭ ސުވާލުތަކެއް ދޭނެ ކަމަށެވެ.
ނެޝަނަލް އެސެސްމަންޓުގެ އެހީގައި ދަރިވަރުންނަށް ދެވޭ ތައުލީމުގެ ފެންވަރު ވަޒަން ކުރެވި އިތުރަށް ރަނގަޅު ކުރަން ޖެހޭ ކަންތައްތައް ފާހަގަ ވެގެންދާނެ ކަމަށް އެޑިއުކޭޝަން މިނިސްޓްރީ އިން ވަނީ ބުނެފަ އެވެ.
އޭގެ އިތުރުން ދިވެހި މާއްދާގެ ޕައިލެޓް އިމްތިހާނު 11 ސްކޫލެއްގައި ކުރިއަށް ގެންދިޔުމަށް ނިންމާފައިވާ ކަމަށް ވެސް މިނިސްޓްރީން ބުންޏެވެ. އެ ޕްރޮގްރާމް ފަށާނީ އަންނަ އާދިއްތަ ދުވަހު އެވެ.
ގައުމީ އެސެސްމެންޓަކީ ކޮންމެ ތިން އަހަރަކުން އެއްފަހަރު ދިނުމަށް ހަމަޖެހިފައިވާ އިމްތިހާނެކެވެ.