10 Oct 2015, 21:46
ރާއްޖޭގައި މަސައްކަތްކުރާ އިންޑިއާގެ ޓީޗަރުންނާއި ޑޮކްޓަރުންނަކީ ރާއްޖެ އާއި އިންޑިއާއާ ދެމެދު އޮން ގުޅުން ބަދަހިވުމުގައި މުހިއްމު ދައުރެއް އަދާކުރާ ބައެއް ކަމަށް އިންޑިއާގެ އެކްސްޓާނަލް މިނިސްޓަރު ސުޝްމާ ސުވަރާޖް ވިދާޅުވެއްޖެ އެވެ.
ރާއްޖެ އަށް މިހާރު ކުރައްވަމުން ގެންދަވާ ޒިޔާރަތުގައި ރާއްޖޭގައި ދިރިއުޅޭ އިންޑިއާ މީހުންނާ ބައްދަލުކުރައްވައި ވާހަކަފުޅު ދައްކަވަމުން ސުޝްމާ ވިދާޅުވީ ޑޮކްޓަރުންނާ ބަލިމީހުންނާ ދެމެދު އޮންނާނީ އިތުބާރުގެ ގުޅުމެއް ކަމަށާއި ޓީޗަރުންނާ ދެމެދު އޮންނާނީ އިހުތިރާމްގެ ގުޅުމެއް ކަމަށެވެ.
"...އަޅުގަނޑު ކިތަންމެ ފަހަރަކު ހިތަށް އަރާ ޑޮކްޓަރާ ބަލިމީހާއާ ދެމެދުގައި އޮންނަ ގުޅުން ވާނީ އިތުބާރުގެ ގުޅުމަކަށޭ. ހަމަ އެގޮތަށް ޓީޗަރާ ދަރިވަރާ ދެމެދު އޮންނަ ގުޅުން ވާނީ އިހުތިރާމްގެ ގުޅުމަކަށޭ. އަދި އަޅުގަނޑު ގަބޫލުކުރާ ގޮތުގައި ދެގައުމެއްގެ ދެމެދުގައި އޮންނަ ގުޅުމެއް ބަދަހި ވުމުގައި ވަރަށް ބޮޑު ދައުރެއް އަދާކުރާނީ އެ ދެގައުމެއްގެ މީހުން. އެހެންވީމާ އަޅުގަނޑުމެންގެ ޑޮކްޓަރުންނާއި ޓީޗަރުންނާ ދިވެހިރާއްޖޭގެ މީހުންނާ ދެމެދު އެ އިތުބާރުގެ ގުޅުމާއި އިހުތިރާމްގެ ގުޅުން އޮންނަ ނަމަ، އެއީ ދެގައުމުގެ ދެމެދުގައި އޮންނަ ގުޅުމުގައި ވަރަށް މުހިއްމު ދައުރެއް އަދާ ކުރާނެ ކަމެއް،" ސުޝްމާ ވިދާޅުވި އެވެ.
އިންޑިއާ ސަރުކާރާ ބެހޭ ގޮތުން ވާހަކަފުޅު ދައްކަވަމުން އޭނާ ވިދާޅުވީ މިހާރުގެ ސަރުކާރު ވެރިކަމަށް އައި ފަހުން ގައުމީ ގޮތުންނާއި ބައިނަލް އަގުވާމީ ގޮތުން ވެސް އިންޑިއާ ކުރިއަރައި ގޮސްފައިވާ ކަމަށެވެ. އެގޮތުން ބައިނަލް އަގުވާމީ ގޮތުން ހޯދާފައިވާ ބައެއް ކާމިޔާބީތަކުގެ ވާހަކަ ވެސް ދެއްކެވި އެވެ. އޭގެ ތެރޭގައި ޔަމަނުގައި ވަރުގަދަ ހަނގުރާމައެއް ހިނގަނިކޮށް، އެހަނގުރާމައިގެ ދެފަރާތުގައި ތިބި މީހުންނާ ވާހަކަ ދައްކައިގެން އެގައުމުގައި ތިބި އިންޑިއާ މީހުންނާއި އެހެން ބައެއް ގައުމުތަކުގެ މީހުން ސަލާމަތް ކުރި ކުރުން އޭނާ ފާހަގަ ކުރެއްވި އެވެ.
އިންޑިއާގެ އެކްސްޓާނަލް ސުޝްމާ ސުވަރާޖްގައި ރާއްޖޭގައި ތިބޭ އިންޑިއާ ރައްޔިތުންނާ ބައްދަލުކުރެއްވުމަށް ބޭއްވި ހަފުލާގައި ސަފީރު ރާޖީވް ޝަހާރޭއާއި އިންޑިއާގެ ބައެެއް ރައްޔިތުން. ފޮޓޯ: އިންޑިއާ ހައިކޮމިޝަން.
ސުޝްމާ މިއަދު ރާއްޖެވަޑައިގަތީ ރާއްޖެ އާއި އިންޑިއާގެ ޖޮއިންޓް ކޮމިޝަންގެ ބައްދަލުވުމަކަށެވެ.
މިއީ އެ ކޮމިޝަނުގެ ފަސްވަނަ ބައްދަލުވުމެވެ. އެހެންނަމަވެސް ޖޮއިންޓް ކޮމިޝަނުގައި މަޝްވަރާކުރެވޭނެ ކަންތައްތަކެއް ރަސްމީކޮށް އެއްވެސް ގައުމަކުން ބުނެފައެއް ނުވެ އެވެ. އެ ކޮމިޝަނުގެ ބައްދަލުވުމަށް ފަހު ނޫސްވެރިންނަށް މައުލޫމާތު ދޭނެ ކަމަށް ފޮރިން މިނިސްޓްރީން ބުނެ އެވެ.
އެ މިނިސްޓްރީން ނެރެފަައިވާ ބަޔާނެއްގައި ބުނެފައި ވަނީ އެކަމަނާ ރާއްޖެ ވަޑައިގަންނަވަނީ ފޮރިން މިނިސްޓަރު ދުންޔާ މައުމޫނުގެ ދައުވަތަކަށް ކަަމަށެވެ.
ސުޝްމާ ވަނީ މިދިޔަ އަހަރު ނޮވެމްބަރު މަހު ރާއްޖެ އަށް ވަޑައިގެން ސަރުކާރުގެ އިސް އޮފިޝަލުންނާ ބައްދަލުކުރައްވާފަ އެވެ.