06 Oct 2015, 22:31
ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމް ދަތުރުފުޅުކުރެއްވި ރިޔާސީ ލޯންޗުކޮޅުގައި އެއްޗެއް ގޮވި ހާދިސާގެ ތަހުގީގަށް ހައްޔަރުކުރި ދެ މީހެއްގެ ބަންދަށް 15 ދުވަސް ކްރިމިނަލް ކޯޓުން ޖަހައިފިއެވެ.
އެ މައްސަލާގައި ފުލުހުން ހައްޔަރުކުރި ތިން މީހުންގެ ތެރޭގައި ހިމެނޭ އެކަކީ އެމްއެންޑީއެފްގެ ބަޑި ގުދަނުގައި މަސައްކަތް ކުރާ އއ. ފެރިދޫ، ދޭލިއާގެ، މުހައްމަދު ޖަވާޒު ނަމަކަށް ސިފައިންގެ މީހެކެވެ. އޭނާއާއެކު ހައްޔަރު ކުރި ސިފައިންގެ ދެ ވަނަ މީހަކީ ސާޖަންޓް މޫސާ ޒަމީރެވެ. ތިން ވަނައަށް ހައްޔަރު ކުރި މީހާގެ ވަނަވަރެއް ނޭނގެ އެވެ.
މިއަދު ހަވީރު ކްރިމިނަލް ކޯޓުން 15 ދުވަހަށް ބަންދުގެ މުއްދަތު ޖެހީ ޖަވާޒާއި ޒަމީރަށެވެ. ތިންވަނަ މީހާގެ އެއްވެސް މައުލޫމާތެއް އަދި ލިބިފައެއް ނުވެއެވެ.
ރައީސްގެ ލޯންޗުކޮޅުގައި އެއްޗެއް ގޮވާފައި ވަނީ ސައުދީ އަރަބިއާއަށް ކުރެއްވި ދަތުރުފުޅަށްފަހު މިދިޔަ މަހުގެ 28 ވަނަ ދުވަހު ރިޔާސީ ލޯންޗުކޮޅު އިއްޒުއްދީން ފާލަމާ ކައިރިކުރި ވަގުތުއެވެ.
"ސަން"އަށް އެނގިފައިވާ ގޮތުގައި ޖަވާޒު ހައްޔަރު ކުރީ މިމަހުގެ 27 ވަނަ ދުވަހު ރާއްޖެއިން ބޭރަށް ފުރައިގެން ދިޔުމަށްފަހު އިއްޔެ މެންދުރުފަހު ރާއްޖެއައިފަހުންނެވެ.
ކޯޓު އަމުރެއްގެ ދަަށުން ޖަވާޒު ދިރިއުޅޭ ގެ ފުލުހުން ބަލައި ފާސްކުރިއިރު، އޭނާގެ ގެއިން ތުހުމަތު ކުރެވޭ "ތަކެތި" ފެނިފައިވާ ކަމަށް މައުލޫމާތު ލިބިފައިވެ އެވެ.
ހައްޖުގެ އަޅުކަމަށްފަހު ރައީސް ޔާމީން ރާއްޖެ ވަޑައިގެން، ހުޅުލެއިން މާލެއަށް ދަތުރުކުރެއްވި ފިނިފެންމާގައި އެއްޗެއް ގޮވި ހާދިސާގެ ފަހުން އެސްޕީޖީ އިން ރައީސަށް ސެކިއުރިޓީ ދިނުން ހުއްޓާލައި، އެމަނިކުފާނަށް ސެކިއުރިޓީ ދިނުމަށް ޕްރެޒިޑެންޝަލް ސެކިއުރިޓީ ޑިވިޝަން (ޕީއެސްޑީ) ވަނީ އުފައްދާފަ އެވެ.
އެ ޑިވިޝަން އުފައްދާފައި ވަނީ އެސްޕީޖީގެ އިސްވެރިޔަކަށް ހުންނެވި ކާނަލް އަހުމަދު ފަޔާޒް (ޕާޕާ) މާލެ އޭރިއާގެ ކޮމާންޑަރަކަށް ބަދަލުކުރެއްވުމަށްފަހު އެވެ. އެސްޕީޖީގެ ވެރިއަކަށް އައްޔަންކޮށްފައި ވަނީ ކާނަލް އަބްދުއްރަހީމެވެ.