05 Oct 2015, 21:33
ސީރިއަސް ޒަޚަމްތަކަކާ އެކު ގެއެއްގެ ސިޑި ގޮޅިއެއްގެ ތެރޭގައި އޮތް މީހަކު ފެނިއްޖެ އެވެ.
ފުލުހުންގެ މީޑިއާ އޮފިޝަލަކު މިރޭ "ސަން" އަށް ވިދާޅުވީ އެ މީހާ ފެނުނީ މ. މޫސުން ބަހާރުގޭގެ ހަވަނަ ފަންގިފިލާގެ ސިޑިގޮޅިން ކަމަށެވެ.
ޒަޚަމްތަކަކާ އެކު ފެނުނު އެ މީހާ އަކީ ފިރިހެނެއް ކަމަށާއި އޭނާއަކީ ދިވެއްސެއް ކަމަށް ބެލެވޭ ކަމަށް ވެސް އޮފިޝަލް ވިދާޅުވިއެވެ.
އެމީހާއަށް އައިޖީއެމްއެޗުގައި މިހާރު ފަރުވާދެމުން އަންނަ ކަމަށާއި އޭނާއަށް ލިބިފައިވާ ޒަޚަމްތަކުގެ ތަފްސީލު އަދި އެނގިވަޑައިނުގަންނަވާ ކަމަށް ވެސް އޮފިޝަލް ވިދާޅުވިއެވެ.
"އައިޖީއެމްއެޗުގައި އެމީހާއަށް އަންނަނީ ފަރުވާދެމުން. އޭނާގެ ހާލު ވަރަށް ސީރިއަސް،" މީޑިއާ އޮފިޝަލް ވިދާޅުވިއެވެ.
ސަން އަށް އެނގިފައިވާ ގޮތުގައި ޒަޚަމްވެފައި އޮއްވައި ފެނުނީ، އއ. ތޮއްޑޫ އުމުރުން 26 އަހަރުގެ އަހްމަދު ޒަމީން ކިޔާ މީހެކެވެ. އަދި ފުލުހުން އެމީހާ ހޮސްޕިޓަލަށް ގެންދިޔައިރު އޭނާގެ ބޮލުގައި ޒަޚަމްތަކެއް ހުރިކަމަށް ވެއެވެ.
ފުލުހުންގެ މީޑިއާ އޮފިޝަލް ވިދާޅުވީ، ފުލުހުންގެ ތަހްގީގީ ޓީމަކުން އެމައްސަލަ އިތުރަށް ތަހްގީގުކުރަމުން ދާކަމަށެވެ.