04 Oct 2015, 18:58
އައްޑޫ ސިޓީގައި މިއަދު ހަވީރު ކުޅުނު ޕްރެޒިޑެންޓްސް ކަޕްގެ ފައިނަލް މެޗުގައި 3-1 ލަނޑުން އެންމެ ފަހުގެ ޗެމްޕިއަން ނިއުރޭޑިއަންޓް ސްޕޯޓްސް ކްލަބް ބަލިކޮށް މާޒިޔާ ސްޕޯޓްސް އެންޑް ރެކްރިއޭޝަން ފުރަތަމަ ފަހަރަށް އެ މުބާރާތުގެ ޗެމްޕިއަންކަން ހޯދައިފި އެވެ.
މުބާރާތުގެ ފައިނަލުން ނިއު ޖާގަ ހޯދީ ސެމީ ފައިނަލުގައި ކްލަބް އީގަލްސް އަތުން 2-1 އިން މޮޅުވެގެންނެވެ. މާޒިޔާ ފައިނަލުން ޖާގަ ހޯދީ ސެމީ ފައިނަލުގައި ޕެނަލްޓީ ޖަހައިގެން ޓީސީ ސްޕޯޓްސް އަތުން މޮޅުވެގެންނެވެ.
ވޭތުވެދިޔަ 3 އަހަރު ދުވަހުގެ ޗެމްޕިއަން ނިއުއާ ދެކޮޅަށް މިއަދު މާޒިޔާއިން ކުޅުނު މެޗުގެ ފުރަތަމަ ލަނޑު ޖަހައި މެޗުގެ ލީޑު ނެގީވެސް މާޒިޔާއިންނެވެ. މެޗުގެ 10 ވަނަ މިނިޓްގައި އެޓީމަށް ލަނޑު ޖަހައި ދިނީ، ގައުމީ ޓީމުގެ ހުނަރުވެރި ފޯވާޑް އަސަދުﷲ އަބްދުﷲ އެވެ.
މާޒިޔާ ލަނޑުޖެހުމުން ނިއުއިން އިތުރަށް ހިތްވަރުކޮށް މެޗުގެ ނަތީޖާ ހަމަހަމަކުރީ 28 ވަނަ މިނިޓްގައި އަލީ ފާސިރު ސެންޓޭ ކާމިޔާބުކޮށްދިން ރީތި ލަނޑުންނެވެ.
ފުރަތަމަ ހާފް ނިމުމުގެ ކުރިން މާޒިޔާ ވަނީ ދެވަނަ ފަހަރަށް މެޗުގެ ކުރި ހޯދައިފައެވެ. މެޗުގެ 42 ވަނަ މިނިޓްގައި އެޓީމަށް ލަނޑު ޖަހައިދިނީ ނިއުގެ ކުރީގެ މިޑްފީލްޑަރު މުހައްމަދު އުމޭރުއެވެ.
މިއަދުގެ ފައިނަލް މެޗު ފެށުނީއްސުރެ ނިމެންދެން ދެޓީމުގެ ސަޕޯޓަރުންގެ އަޑު މެދު ކެނޑުމެއް ނެތި އިވެމުން ދިޔައިރު މާޒިޔާގެ ސަޕޯޓަރުން އެޓީމަށް ދެމުން ގެންދިޔަ ތަރުހީދު ފާހަގަކޮށްލެވެއެވެ.
ޕްރެޒިޑެންޓްސް ކަޕް 2015ގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން އަށް 500،000 ރުފިޔާގެ ފައިސާގެ އިނާމް ހަވާލުކޮށްދެއްވަނީ -- ފޮޓޯ: އައްޑޫ ލައިވް
މީގެ ކުރީން ވިކްޓަރީ ސްޕޯޓްސް ކްލަބަށް 2009 އަދި 2011 ވަނަ އަހަރުގެ ޕްރެޒިޑެންސް ކަޕް ކާމިޔާބުކޮށްދިން ކޯޗު އަލީ ސުޒޭންގެ އިރުޝާދުގެ ދަށުން މާޒިޔާ ކުޅުނު މި މެޗުގެ ފަހު ލަނޑު އެޓީމަށް ކާމިޔާބުކޮށް ދިނީ މެޗުގެ 68 ވަނަ މިނިޓްގައި އެޓީމުގެ ޕަބްލޯ ރޮޑްރިގޭޒް އެވެ.
ފައިނަލް މެޗުގެ ކުރިން މުބާރާތުގެ ޓްރޮފީ ލޯންކޮށްދެއްވީ އައްޑޫގައި އުފެދުނު މަޝްހޫރު ފުޓްބޯޅަ ކުޅުންތެރިޔާ ސ. ފޭދޫ ޑީއެންސީގެ އަބްދުﷲ "އުދުހޭ" މުފީދުއާއި ޔޫތު އެންޑް ސްޕޯޓްސް މިނިސްޓަރު އަހުމަދު ޒުހޫރުއެވެ.
ފައިނަލް މެޗަށް ފަހު ޗެމްޕިއަން މާޒިޔާއަށް ރައީސުލްޖުމްހޫރިއްޔާގެ ވާދައިގެ ތަށި ހަވާލުކޮށްދެއްވީ ސްޕޯޓްސް މިނިސްޓަރު އަހުމަދު ޒުހޫރުއެވެ. އަދި ޗެމްޕިއަންޓީމަށް ދޭ 500،000 ރުފިޔާގެ އިނާމް ހަވާލުކޮށްދެއްވީ އުދުހޭ މުފީދުއެވެ.
މިއީ ޕްރެޒިޑެންޓްސް ކަޕް 45 އަހަރަށް ފަހު މާލެއިން ބޭރުގައި ބޭއްވި ފުރަތަމަ ފަހަރެވެ. އެންމެ ފަހުން މާލެއިން ބޭރުގައި މި މުބާރާތް ކުޅެފައި ވަނީ އައްޑޫގައެވެ. އެހެން ނަމަވެސް މިފަހަރު ގެ މުބާރާތް ކުރިއަށް ގެންގޮސްފައި ވަނީ، ހދ. ކުޅުދުއްފުށީ ޒޯން ސްޓޭޑިއަމްގައާއި އައްޑޫ ފުޓްބޯޅަ ދަނޑުގައެވެ.