04 Oct 2015, 19:08
ކަނޑުމަތީގެ ސަލާމަތާއި ރައްކާތެރިކަން އިތުރަށް ވަރުގަދަކުރުމަށް ކަނޑު އުޅަނދުތަކާ ބެހޭ ގަވާއިދުތަކަށް ވަރަށް އަވަހަށް ބަދަލުތަކެއް ގެންނަން ސަރުކާރުން ނިންމައިފި އެވެ.
ޓްރާންސްޕޯޓް އޮތޯރިޓީ އާއި އިކޮނޮމިކް މިނިސްޓްރީ ގުޅިގެން މިއަދު އިކޮނޮމިކް މިނިސްޓްރީގައި ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު ސައީދު ވިދާޅުވީ، ވޭތުވެދިޔަ އީދު ބަންދު އަދި މޫސުން ގޯސްވި ދުވަސްތަކުގައި ނުރައްކާތެރި ކަނޑުގެ ހާދިސާތަކެއް ހިނގާފައިވާ ކަމަށެވެ.
އެގޮތުން އެފަދަ ހާދިސާތަކުން މީހުންނާއި އުޅަނދުތައް ސަލާމަތްކޮށް ރައްކާތެރިކަން އިތުރުކުރުމަށް، ވަރަށް އަވަހަށް ކަނޑުގައި ދުއްވާ ހުރިހާ އުޅަނދުތަކަކީ އިންޝުއަރެންސްކޮށް ސީ ވާދިނަސް ހައްދާފައިވާ އުޅަނދުތަކަކަށް ހެދުމަށް އިއުލާނު ކުރާނެ ކަމަށް މިނިސްޓަރު ވިދާޅުވި އެވެ.
"ވަރަށް އަވަހަށް އަޅުގަނޑުމެން އިއުލާން ކުރާނަން ރާއްޖޭގެ ކަނޑުގައި ދުއްވާ ހުރިހާ އުޅަނދު ފަހަރަކީ އިންޝުއަރެންސް ކޮށްފައި ހުރި އުޅަނދުތަކަށްވުން. އެއަށް އަޅުގަނޑުމެން ދޭނަން މުއްދަތެއް. ހަމަ އެއާއެކު ސީވޯތުނެސް ހެދުން ނުވަތަ ކަނޑުގައި ދުއްވުން އެކަށީގެންވާ އުޅަނދެއްތޯ ބެލުން އެއީ ގެންނާނެ ދެވަނަ ބަދަލު. ސީ ވާދިނަސް ހެދުމަކީ ކޮންމެހެން ކުރަންޖެހޭ ކަމެއްގެގޮތުގައި ތައާރަފުކުރާނެ،" މިނިސްޓަރު ވިދާޅުވި އެވެ.
އޭގެ އިތުރުން ކަނޑު އުޅަނދުތައް ދުއްވާ ކެޕްޓަނުންނާއި އޭގައި އުޅޭ ފަޅުވެރިންނަކީ ވަކި ހާއްސަ ކޯހެއް ނުވަތަ ތަމްރީނެއް ހެދުމަށްފަހު، ޓެސްޓަކުން ފާސްވުމުން ލައިސަންސް ދޭ ބަޔަކަށް ހެދާނެ ކަމަށް މިނިސްޓަރު ވިދާޅުވި އެވެ.
"މިސާލަކަށް ކަމެއް ދިމާވެއްޖެނަމަ ކުރޫއިންނަށް ނުވަތަ ކެޕްޓަނުންނަށް ކޮންމެހެން އިނގެންޖެހޭ މައުލޫމާތުތައް، އެ މައުލޫމާތުތައް އަޅުގަނޑުމެން އެ ބޭފުޅުންނަށް ދީގެން ލައިސަންސް ލިބޭނީ،" މިނިސްޓަރު ސައީދު ވިދާޅުވި އެވެ.
މިނިސްޓަރު ވިދާޅުވީ އެ ބަދަލުގެންނަން ނިންމީ އެ ދާއިރާގައި ހަރަކާތްތެރިވާ ފަރާތްތަކާއި ކޯސްޓްގާޑް އާއި މެރިން ޕޮލިސް އަދި ކަމާބެހޭ ފަންނީ ބޭފުޅުންގެ ލަފާވެސް ހޯދައިގެން ކަމަށެވެ.