02 Oct 2015, 21:48
ރައީސުލްޖުމްހޫރިއްޔާގެ ރިޔާސީ ލޯންޗުކޮޅު، "ފިނިފެންމާ"ގައި އެއްޗެއް ގޮވި ހާދިސާގެ ތަހުގީގާ ގުޅުންހުރި ބައެއްތަކެތި ތަހްލީލުކުރުމަށް ބައެއް ގައުމުތަކަށް ފޮނުވައިފި އެވެ.
ފުލުހުންގެ އިންފޮމޭޝަން އޮފިސަރު އިސްމާއީލް އަލީ މިރޭ ސަން އަށް ވިދާޅުވީ، ލޯންޗު ކޮޅުގައި އެއްޗެއް ގޮވި ހާދިސާއާ ގުޅިގެން ތަހްގީގަށް ބޭނުންވާ ބައެއް ތަކެތި ތަހްލީލުތައް ކުރުމަށް ބައެއް ގައުމުތަކަށް ފޮނުވާފައި ވާކަމަށެވެ.
"އެހެން ނަމަވެސް އެތަކެތި ފޮނުވާފައި ވަނީ ކޮން ގައުމުތަކަށް ކަން އަދި ހާމަކުރެވޭކަށް ނެތް،" އިސްމާއިލް ވިދާޅުވި އެވެ.
ރައީސްގެ ލޯންޗްކޮޅުގައި އެއްޗެއް ގޮވުމުގެ ހާދިސާއެއް ހިނގާފައި ވަނީ ހައްޖުގެ އަޅުކަމަށް ފަހު މިދިޔަ މަހުގެ 28 ވަނަ ދުވަހުގެ ހެނދުނު، ރައީސުލްޖުމްހޫރިއްްޔާ އަބްދުﷲ ޔާމީން އާއި އަނބިކަނބަލުން ފާތިމަތު އިބްރާހީމް މާލެ ވަޑައިގަތުމަށް ލޯންޗުކޮޅު އިއްޒުންދީން ފާލަމާއި ކައިރިކުރަނިކޮށެވެ.
ރިޔާސީ ލޯންޗުކޮޅުގައި އެއްޗެއް ގޮވި ހާދިސާގެ ތަހުގީގަށް އެހީތެރިކަން ފޯރުކޮށްދިނުމަށް އެމެރިކާގެ ފެޑެރަލް ބިއުރޯ އޮފް އިންވެސްޓިގޭޝަން (އެފްބީއައި)ގެ އޭޖެންޓަކު ވަނީ ހަމަ އެދުވަހުގެ ރޭ މާލެ އައިސްފައެވެ. އަދި ޖެހިގެން އައިރޭ އެފްބީއައިގެ ހަތަރު އޭޖެންޓަކު ރާއްޖެ އައިސްފައިވާއިރު، އެ ތަހުގީގުގައި ދިވެހި ފުލުހުންނަށް އެހީތެރިވެދިނުމަށްޓަކައި ސައުދީ ނުވަ މީހުންގެ މައްޗަށް އެކުލެވޭ ފޮރެންސިކް ޓީމެއް ވެސް ވަނީ އައިސްފައެވެ. އަދި އޭގެ ފަހުން ސްރީ ލަންކާގެ ހަތަރު މީހުންގެ މައްޗަށް އެކުލެވޭ ފޮރެންސިކް ޓީމަކާއި، އިންޑިއާގެ ފޮރެންސިކް ޓީމެއް ވަނީ ރާއްޖެ އައިސް އެ ތަހުގީގުގައި ބައިވެރިފެވައެވެ.
ލޯންޗުކޮޅުގައި އެއްޗެއް ގޮވައި ހިނގި ހާދިސާ ފަދަ ކަންކަން ތަކުރާރު ވިޔަ ނުދިނުމަށް ރައީސުލްޖުމްހޫރިއްޔާ ވަނީ ފުލުހުންނާ ސިފައި އެކުލެވޭ ގޮތަށް ކޮމެޓީއެއް އެކުލަވާލާފައިފައެވެ.
ލޯންޗުކޮޅުގައި އެއްޗެއް ގޮވި ހާދިސާގައި ރައީސަށް ގެއްލުމެއް ލިބިވަޑައިނުގެންނެވި ނަމަވެސް އެ ހާދިސާގައި ރައީސްގެ އަނބިކަނބަލުން ފާތުމަތު އިބްރާހިމްގެ މައިބަދައާ ގުޅުން ހުރި ކަށިތަކަކަށް ވަނީ ގެއްލުން ވެފައެވެ. އަދި ރައީސްގެ ޕްރޮޓްކޯލް ހެޑް، ފާތުމަތު ސޯލިހާއި، ބޮޑީގާޑު އަބްދުއްނާސިރަށް ވެސް ވަނީ އެކިވަރުގެ އަނިޔާތައް ލިބިފައެވެ.