01 Oct 2015, 13:48
ފަގީރުކަން ނައްތާލައި ހުރިހާ އިންސާނުންނަށްވެސް ދުޅަހެޔޮ މުސްތަގުބަލެއް ޔަގީން ކޮށްދިނުމަށް އދ. އިން ކަނޑައަޅާފައިވާ ނޭޝަނަލް ސަސްޓެއިނަބަލް ޑިވެލޮޕްމަންޓް ގޯލްސް (ގްލޯބަލް ގޯލްސް) ހާސިލް ކުރުމަށް އުރީދޫއިން އެއްބާރުލުން ދޭނެ ކަމަށް އެކުންފުނިން ހާމަކޮށްފި އެވެ.
ގްލޯބަލް ގޯލްސް އަކީ މީގެ 15 އަހަރު ކުރިން ތައާރަފްކުރެވުނު މިލޭނިއަމް ޑިވެލޮޕްމެންޓް ގޯލްސްތަކަށް ބިނާކޮށް ދުނިޔޭގެ 193 ލީޑަރުން ތައާރަފްކުރި ލަނޑުދަނޑިތަކެކެވެ. އެ 17 ލަނޑުދަނޑިއަކީ 2030 ވަނަ އަހަރު ކުރިން ބަނޑުހައި ހޫނުކަމާއި ފަގީރުކަން ނައްތާލައި މޫސުމަށް އަންނަ ބަދަލުތަކަށް ހައްލެއް ހޯދައި ދުނިޔޭގެ ހަމަހަމަކަމާއި އިންސާފް ގާއިމްކުރުމަށް އެކުލަވާލާފައިވާ ލަޑުދަނޑިތަކެކެވެ.
އުރީދޫގެ ސީއީއޯ ވިކްރަމް ސިންހަ-- ސަން ފޮޓޯ: ޔޫސުފް ސޮފްވާން
އުރީދޫ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި އެކުންފުނީގެ ސީއީއޯ ވިކްރަމް ސިންހަ ވިދާޅުވީ، ދިވެހި ރައްޔިތުންނަށް ދިމާވާ މައްސަލަތަކަށް ހައްލު ހޯދައިދިނުމަށް އުރީދޫއިން މަސައްކަތް ކުރާނެ ކަމަށާއި އެގޮތުން ގްލޯބަލް ގޯސްލްސްގެ ލަނޑުދަނޑިތައް ހާސިލް ކުރުމަށް ފޯރުކޮށްދޭންޖެހޭ ކަންކަން ފޯރުކޮށްދިނުމަށް އެހީތެރިވެދޭނެ ކަމަށެވެ.
އެ ބައްދަލުވުމުގައި އދ. އިން ރާއްޖެއަށް ކަނޑައަޅާފައި ހުންނަވާ ރެސިޑެންޓް ކޯޑިނޭޓަރު ޝޯކޯ ނޯޑާ ވިދާޅުވީ، ރާއްޖޭގައި ގްލޯބަލް ގޯލް ހާސިލް ކުރުމަށް ކުރާ މަސައްކަތުގައި އުރީދޫއިން ބައިވެރިވުމަކީ ވަރަށް އުފާވާ ކަމެއް ކަމަށެވެ. އެލަނޑުދަނޑިތައް ހާސިލް ކުރުމަށްޓަކައި ޒަމާނީ މޯބައިލް ޓެކްނޮލޮޖީތަކުގެ ބޭނުން ހިފުމަކީ ކޮންމެހެންވެސް ކުރަންޖެހޭ ކަމެއް ކަމަށްވެސް ޝޯކޯ ވިދާޅުވިއެވެ.
