01 Oct 2015, 11:42
މަޝްހޫރު ރިކޯޑް ޕްރޮޑިއުސަރު އަދި ރެޕް ލަވަކިޔުންތެރިޔާ ޖޭ ޒީގެ ހައި ކޮލިޓީ މިއުޒިކް ސްޓްރީމިން ސާވިސް "ޓައިޑަލް"އަށް އެއް މިލިއަން ސަބްސްކްރައިބަރުން ހަމަވެއްޖެ އެވެ.
ޖޭ ޒީ ކުރި ޓްވީޓެއްގައި ބުނެފައިވަނީ، މިދިޔަ އަހަރު އަލަށް ތައާރަފް ކުރި މިއުޒިކް ސްޓްރީމިން ސާވިސް، މިހާރު އެއް މިލިއަން ސަބްސްކްރައިބަރުން ހަމަވެ ސާވިސް ޕްލެޓިނަމް ވެފައިވާ ކަމަށެވެ.
އެސްޕައިރޯ އިން މިދިޔަ އަހަރުގެ އޮކްޓޯބަރު މަހުގައި ތައާރަފުކުރި މިއުޒިކް ސްޓްރީމިނިސް ސާވިސް، ޖޭ ޒީ ގަނެފައިވަނީ މިއަހަރު އެވެ. ޖުމްލަ 56.2 މިލިއަން ޑޮލަރަށް ޓައިޑަލް ގަނެފައިވަނީ މިއަހަރު ޖެނުއަރީގައެވެ.
އޭނާ ޓައިޑަލް ގަތުމަށްފަހު އެ ސާވިސް ޕްރޮމޯޓް ކުރުމަށް ގިނަ މަސައްކަތްތަކެއް ކޮށްފައިވެއެވެ. އޭޕްރިލް މަހުގައި އެ ސާވިސްގެ ސްޓެޓިސްޓިކްސް ދެއްކިއިރު 770،000 ފަރާތެއް ވަނީ ޓައިޑަލް އަށް ސަބްސްކްރައިބް ކޮށްފައެވެ.
ޓައިޑަލް އަށް އެއް މިލިއަން ސަބްސްކްރައިބަރުން ހަމަވި ކަމުގައިވިޔަސް އެ ސާވިސް އޮތީ އެހެން ސްޓްރީމިންސް ސާވިސްތަކަށްވުރެ ފަހަތުގައެވެ. އެގޮތުން އެންމެ މަގުބޫލު މިއުޒިކް ސްޓްރީމިން ސާވިސްގައި މިހާރު 15 މިލިއަން ސަބްސްކްރައިބަރުން ހިމެނެއެވެ. އަދި އެހެން ސާވިސް އެއް ކަމަށްވާ ރަޕްސޮޑީގައި ގައި ތިން މިލިއަން ސަބްސްކްރައިބަރުން އެބަތިއްބެވެ. ނަމަވެސް އެހެން ސާވިސްތަކަށް ގިނަ ދުވަސްތަކެއް ވެފައިވާއިރު ޓައިޑަލްއަށް އަހަރެއް ވާނީ އަދި މިމަހު ފަހުކޮޅެވެ.