29 Sep 2015, 14:29
އެމެރިކާގައި މިހާތަނަށް އުފެއްދި އެންމެ ކާމިޔާބު އަދި އެންމެ ގިނަ ބައެއްގެ ލޯބި ލިބިފައިވާ ސީރީޒް އަކީ "ފްރެންޑްސް" ކަމަށް ހޮލީވުޑްގެ ތަޖުރިބާކާރުންގެ "ޕޯލް" އަކުން ދައްކައިފިއެވެ.
އެމެރިކާގެ ތާރީހުގައި ދެއްކި އެންމެ ކާމިޔާބު ޝޯއެއް ބެލުމަށް ނެގި ޕޯލްގައި ހޮލީވުޑްގެ 2،800 އަށްވުރެ ގިނަ ތަޖުރިބާކާރުން ހިމެނެއެވެ. އޭގެތެރޭގައި 779 އެކްޓަރުންނާއި 365 ޕްރޮޑިއުސަރުންނާއި 268 ޑިރެކްޓަރުންނާއި އިތުރު ފަރާތްތައް ހިމެނެއެވެ.
ކޮމެޑީ ޑްރާމާ އެމެރިކަން ސިޓްކޮމް ޝޯ، ފްރެންޑްސްގެ ފުރަތަމަ އެޕިސޯޑު އެޅުވި ފަހުން މިއަހަރަށް 21 އަހަރުވި ނަމަވެސް ސީރީޒްގެ މަގުބޫލު ކަމަށް ކުޑަވެސް ފަނޑުކަމެއް އައިސްފައެއް ނުވެއެވެ.
ފްރެންޑްސް އަކީ ޓީވީ އިންޑަސްޓްރީއަށް ބޮޑު އިންގިލާބެއް ގެނެސްދިން ޝޯއެކެވެ. ޖުމްލަ 10 އަހަރުގެ މުއްދަތައް ދެއްކި އެ ޝޯގެ މަގުބޫލުކަން ޒުވާނުންގެ މެދުގައި މިހާރު އަންނަނީ އިތުރުވަމުންނެވެ.
"ޝޯ އެޅުވުނު ގޮތާ ބަލާފައި 10 އަހަރު ދުވަސް ވަންދެން ފްރެންޑްސް ދެއްކުނު ކަމަކީ ގަބޫލު ކުރަން ވެސް ދަތި ކަމެއް. ހީކުރާނެ ދުވަސް ވާން ފެށުމާއެކު ގިނަ ބަޔަކު ޝޯއާ މެދު ފޫހިވާން ފަށާނޭ. އެކަމަކު އެހެނެއް ނޫން. ގިނަ ބައެއް ދަނީ އަދިވެސް ޝޯއަށް ތަރުހީބު ދެމުން. ޒުވާނުން ވެސް ޝޯ ބަލާ އަދަދު ދަނީ އިތުރުވަމުން،" ފްރެންޑްސްގެ ކްރިއޭޓަރެއް ކަމަށްވާ ޑޭވިޑް ކްރޭން ބުންޏެވެ.
ގިނަ ބަޔަކު "މޫޑް" ރަނގަޅު ކުރުމުގެ ވަސީލަތެއްގެ ގޮތުގައި ބަލާ ފްރެންޑްސްގެ 10 ސީޒަން ދައްކާފައިވާއިރު އެންމެ ފަހު އެޕިސޯޑް ދައްކާފައިވަނީ 2004 ވަނަ އަހަރު އެވެ. ޖުމްލަ 52 މިލިއަން އަށްވުރެ ގިނަ މީހުން އެމެރިކާއިން އެކަނިވެސް ވަނީ މޭ މަހު ހައެއް ގައި ދެއްކި ފްރެންޑްސްގެ ފަހު އެޕިސޯޑު ބަލާފައެވެ.
ފްރެންޑްސް އަކީ ނިއު ޔޯކްގެ އެއް އެޕާޓްމެންޓް ކޮމްޕްލެކްސް އެއްގައި އުޅޭ ހަ އެކުވެރިންގެ ކޮންމެ ދުވަހެއްގެ ދިރިއުޅުން ދައްކުވައިދޭ ޝޯއެކެވެ. ޝޯގެ މުހިންމު ރޯލުތަކުން ފެނިގެންދާނީ ޖެނިފާ އެނިސްޓަން އާއި ކޯޓްނީ ކޮކްސް އާއި ލީސާ ކުޑްރޯ އާއި މެތިއު ޕެރީ އާއި ޑޭވިޑް ޝުވިމާ އަދި މެޓް ލެބްލެންކް އެވެ.
އެމެރިކާގައި އެންމެ ލޯބި ކުރާ ޝޯތަކުގެ ތެރެއިން ދެވަނަ އަށް ހޮވިފައިވަނީ އޭއެމްސީގެ "ބްރޭކިން ބޭޑް އެވެ. އަދި ތިން ވަނަ އަށް އައިސްފައިވަނީ އެފްއެކްސް އިން 1993 އިން 2002 ގެ ނިޔަލަށް ދެއްކި ޝޯ އެކްސް ފައިލްސް އެވެ. އެ ޝޯގެ ކާމިޔާބީ ބޮޑުވުމާ ގުޅިގެން އެކްސް ފައިލްސް ވަނީ އަލުން ރީބޫޓް ކޮށް މިއަހަރު ޕްރިމިއާ ކުރުމަށް ނިންމާފައެވެ.