24 Sep 2015, 20:21
ޖަމްރާއަށް ހިލައުކަންދިއުމަށް މިއަދު ހައްޖުވެރިން ދިއަ މަގުމަގުގައި ފިތިބާރުވެގެން 700 އަށް ވުރެ ގިނަ ހައްޖުވެރިން މަރުވި ހާދިސާ ތަހުގީގުކުރުމަށް ހާއްސަ ކޮމިޓީއެއް އެކުލަވާލުމަށް ސައުދީގެ ރަސްގެފާނު ސަލްމާން ބިން އަބްދުލް އަޒީޒު ގޮވާލައްވައިފި އެވެ.
މިނާގައި ހައްޖުވެރިން ފިތި މިއަދު ހިނގި ހާދިސާގައި މިހާތަނަށް 717 ހައްޖުވެރިން މަރުވެ 863 މީހަކު ޒަހަމްވެފައިވާ ކަމަށް ސައުދީ އަރަބިއާގެ ސިވިލް ޑިފެންސް ފޯސްއާ ހަވާލަދީ އަލް އަރަބިއާ ނޫހުން ވަނީ ބުނެފަ އެވެ.
ސައުދީގެ ތަރުޖަމާނާއި ހަވާލާދީ އަލް އަރަބިއާ ނޫހުގައި ބުނެފައި ވަނީ ފިތިބާރުވެގެން ގިނަ ހައްޖުވެރިންތަކެއް މަރުވެގެންދިޔަ ހާދިސާ ތަހުގީގުކުރުމަށް ހާއްސަ ކޮމިޓީއެއް އެކުލަވާލުމަށް ސައުދީ ރަސްގެފާނު އަންގަވާފައިވާ ކަމަށެވެ. ތަރުޖަމާނު ވިދާޅުވީ ހާދިސާ ހިނގަން މެދުވެރިވީ މާބޮޑަށް ހޫނު ގަދަވުމުގެ ސަބަބުން ކަމަށް ގަބޫލު ކުރެވޭ ކަމަށެވެ.
ނަމަވެސް ތަހުގީގު ޓީމެއް އެކުލަވާލުމަށް ފަހު ތަހުގީގަށް ބިނާކޮށް ނޫނީ އެއްޗެއް ދަަނަވަން ނޭންގޭކަމަށްވެސް ތަރުޖަމާނު ވަނީ ވިދާޅުވެފަ އެވެ. އަދި އެހާ ގިނަ އަދަދެއްގެ ހައްޖާޖީން މަރުވާން ދިމާވީ ކީއްވެކަންވެސް އަދި ހޯދިފައި ނުވާ ކަމަށް ތަރުޖަމާނު ވަނީ ވިދާޅުވެފަ އެވެ.
މިއަދުގެ ހާދިސާ ހިނގަން މެދުވެރިވީ މިނާގެ 204 މަގުން ދިޔަ ބަޔަކާއި އެހެން މަގަކުން ދިޔަ ބަޔަކާއި ޖެހި ފިތިގެން ކަމަށް ސައުދީގެ ބައެއް މީޑިއާތަކުންނާއި މަންޒަރު ދުއްބައެއް ފަރާތްތަކުން ވަނީ ބުނެފަ އެވެ.
ގިނައަދަދެއްގެ ބަޔަކު މަރުވެ މިއަދު ހިނގި ހާދިސާގެ ކުރިން މިހާ ގިނަ އަދަދެއްގެ ބަޔަކު ހައްޖުގައި މަރުވެފައި ވަނީ 1990 ވަނަ އަހަރު އެވެ. އެއަހަރުގެ ޖުލައިމަހު ހިނގާދިޔަ ހާދިސާއެއްގައި 1426 ހައްޖުވެރިއަކު ވަނީ މަރުވެފަ އެވެ.