23 Sep 2015, 15:00
ފުރާންސް ލީގްގައި ރޭ ކުޅުނު މެޗުއިން ޕެރިސް ސެއިންޓް ޖާމެއިން (ޕީއެސްޖީ) ގުއިންގޭމްޕް ގެ މައްޗަށް 0-3 ގެ ނަތީޖާ އަކުން ކުރި ހޯދައިފިއެވެ.
ރޭގެ މެޗަށް ޕީއެސްޖީ ނިކުތްއިރު އެޓީމް ވަނީ ލީގްގައި އެންމެފަހުން ކުޅުނު ދެ މެޗުން ވެސް އެއްވަރު ވެފައެވެ.
މެޗްގެ ފުރަތަމަ ލަނޑު ޕީއެސްޖީ އަށް ކާމިޔާބް ކޮށްދިނީ ފުރަތަމަ ހާފްގެ 18 ވަނަ މިނެޓްގައި އެ ޓީމްގެ އާޖެންޓީނާ މިޑްފީލްޑަރު ހަވިއޭ ޕަސްތޯރޭ އެވެ.
ޕީއެސްޖީގެ ދެވަނަ ލަނޑު 77 ވަނަ މިނެޓް ގައި ކާމިޔާބު ކޮށްދިނީ އާޖެންޓީނާގެ މިޑްފީލްޑަރު އެންހެލް ޑި މާރިއާ އެވެ. އެ ލަނޑު ޑިމާރިއާ ކާމިޔާބު ކުރީ ޒަލަޓާން އިބްރަހިމޮވިޗް ގޯލަށް ޖެހި ބޯޅަ ގުއިންގޭމްޕްގެ ކީޕަރުގެ އަތުގަ ޖެހިފަ ނިކުތުމުން ގޯލްގެ ތެރެއަށް ފޮނުވާލައިގެންނެވެ.
އެ މެޗްގައި އިބްރަހިމޮވިޗް ވަނީ މި ސީޒަނުގައި އޭނާ ކާމިޔާބުކުރި ފުރަތަމަ ލަނޑާއެކު، ލަނޑެއް ނުޖެހި 502 މިނެޓް ވަންދެން ހުރި ހުރުމުގެ ސިލްސިލާއަށް ނިމުމެއް ގެނެސް ކެރިއަރުގެ 400 ވަނަ ގޯލްޖަހައިފައެވެ. އިބްރަހިމޮވިޗް އެ ލަނޑު ޖަހައި ދިނީ މެޗްގެ 83 ވަނަ މިނެޓްގައި ޑިމާރިއާ ދިން ޕާހަކުންނެވެ.
އެމެޗްގައި އިބްރަހިމޮވިޗް ވަނީ ޕެނެލްޓީއެއް ބޭކާރު ކޮށްލާފައެވެ. މެޗްގެ 86 ވަނަ މިނެޓްގައި އުރުގުއާއީގެ ފޯވާޑް އެޑިސަން ކަވާނީއަށް ޕެނަލްޓީއޭރިއާ ތެރެއިން ފައުލް ކުރުމުން ވަނީ ޕެނަލްޓީއެއް ދީފައެވެ. އިބްރަހިމޮވިޗް ފޮނުވާލި މި ޕެނަލްޓީ ގުއިންގޭމްޕްގެ ކީޕަރު ގެ އަތުގަ ޖެހިފަ ނިކުތް ބޯޅަ ޕީއެސްޖީގެ ކަވާނީއަށް ވެސްވަނީ ލިބި ފޮނުވާލެވޭގޮތް ނުވެފައެވެ.
އެމެޗުން ލިބުނު ތިން ޕޮއިންޓާއިއެކު ޖުމްލަ 17 ޕޮއިންޓް ލިބިގެން އެންމެ ފަހުގެ ޗެމްޕިއަން ޕީއެސްޖީ އޮތީ ތާވަލުގެ އެއްވަނައިގައެވެ.