22 Sep 2015, 16:31
ޑިމޮކްރަސީ އާ މެދު ރައްޔިތުން ހޭލުންތެރިކުރުވުމުގެ ގޮތުން "ޑިމޮކްރަސީ ވީކް" ފާހަގަކުރަން ބޮޑު ހަރަކާތްތަކެއް ހިންގަން އިލެކްޝަންސް ކޮމިޝަނުން ތައްޔާރުވެއްޖެއެވެ.
އިލެކްޝަން ކޮމިޝަނުން މިއަދު ބުނީ ގިނަ ހަރަކާތްތަކަކާއި އެކު "ޑިމޮކްރަސީ ވީކް" ފާހަގަކުރާނީ ހއ. ހޯރަފުށީގައި އަންނަ އޮކްޓޯބަރު މަހުގެ ހަތަރުވަނަ ދުވަހުން ފެށިގެން 10 ވަނަ ދުވަހުގެ ނިޔަލަށް ކަމަށެވެ.
އިލެކްޝަންސް ކޮމިޝަނުގެ ނައިބުރައީސް އަމްޖަދު މުސްތަފާ ވިދާޅުވީ ހޯރަފުށީގައި ޑިމޮކްރަސީ ހަފްތާ ފާހަގަ ކުރަނީ ރާއްޖޭގައި އުތުރުގައި އެހަރަކާތް ހިންގުމުގެ ގޮތުން ކަމަށެވެ.
"...އަޅުގަނޑުމެން ކޮން ރަށެއްތޯ ކަނޑައަޅަން ބެލި އިރު އެންމެ ރަނގަޅު ހުށަހެޅުމެއް ހުށަހެޅީ ހޯރަފުށިން ކަމަށް ވާތީ އަޅުގަނޑުމެން ހޯރަފުށީގައި މިދުވަސް މި ފާހަގަކުރަނީ،" އޭނާ ވިދާޅުވިއެވެ.
އޭނާ ވިދާޅުވީ ޑިމޮކްރަސީ ހަފްތާ ފާހަގަކުރުމުގެ މައިގަނޑު ބޭނުމަކީ މިހާރު ކުރިއަރަމުން އަންނަ ޑިމޮކްރެޓިކް ވެށި ހަރުދަނާ ކުރުން ކަމަށެވެ. އަދި އެއީ ރައްޔިތުން ހޭލުންތެރިކުރުމަކީ އީސީން ކުރަން ޖެހޭ ކަމަކަށް ވާތީ ކުރާ މަސައްކަތެއް ކަމަށް އަމްޖަދު ވިދާޅުވިއެވެ.
އިލެކްޝަންސް ކޮމިޝަންގެ މެމްބަރު އަހުމަދު އަކުރަމް ވިދާޅުވީ ޑިމޮކްރަސީ ވީކްގައި ޖުމްލަ 13 ހަރަކާތެއް ހިންގާނެ ކަމަށެވެ. އެގޮތުން ދޮރުން ދޮރަށް ހިނގައި މައުލޫމާތު ދިނުމުގެ ހަރަކާތަކާއި ސްކޫލްތަކުގެ ދަރިވަރުންނަށް މައުލޫމާތު ދިނުމުގެ ހަރަކާތެއް ހިންގާނެ ކަމަށް ވެސް ވިދާޅުވިއެވެ.
"... އެގޮތުން 2400 ބޭފުޅުންނަށް ޑޯ ޓް ޑޯ ހަރަކާތުގައި މައުލޫމާތު ލިބިގެން ދާނެ. ސްކޫލް ކުދިންގެ ސެޝަން ގައި ގްރޭޑް 8،911،12 ގެ 124 ކުއްޖަކަށް މައުލޫމާތު ދިނުމަށް ވަނީ ހަމަޖެހިފައި،" އޭނާ ވިދާޅުވިއެވެ.
ޑިމޮކްރަސީ ވީކް ފާހަގަ ކުރުމަށް 1.6 މިލިޔަން ރުފިޔާ ހަރަދުވާނެ ކަމަށާއި އެހެން ނަމަވެސް އިލެކްޝަންސް ކޮމިޝަނުގެ ބަޖެޓުން ހަރަދު ކުރާނީ ގާތް ގަނޑަކަށް 480000 ރުފިޔާ ކަމަށް އަކުރަމް ވިދާޅުވިއެވެ. އަނެއް ބައި ހަރަދުކުރާނީ އެހަރަކާތަށް އެހީތެރިކަން ފޯރުކޮށް ދޭ ފަރާތްތަކުން ކަމަށް ވެސް ވިދާޅުވިއެވެ.
ޑިމޮކްރަސީ ވީކް ފާހަގަ ކުރުމުގައި އެއްބާރުލުން ދިނުމުގެ އެއްބަސްވުމުގައި ސަން އޮންލައިންގެ ޑެޕިއުޓީ އެޑިޓަރު މުޖުތަބާ އަދި އީސީގެ ނައިބު ރައީސް އަމްޖަދު ސޮއި ކުރައްވަނީ. ސަން ފޮޓޯ: ފަޔާޒް މޫސާ
ޑިމޮކްރަސީ ވީކް ފާހަގަ ކުރުމަށް އިލެކްޝަން ކޮމިޝަނަށް އެއްބާރުލުން ދިނުމަށް ރާއްޖޭގެ ހުރިހާ މީޑިއާތަކުން ވަނީ އެއްބަސްވެފައެވެ. އެގޮތުން ސަންމީޑިއާ ގްރޫޕާއި ވަގުތު ނޫހުން މިއަދު ވަނީ އެއްބަސްވުމުގައި ސޮއިކޮށްފައެވެ.