14 Sep 2015, 08:51
ޕާކިސްތާނުގެ މެދުތެރޭގައި އޮންނަ މުލްތަން ސިޓީގެ ބަސް ޓާމިނަލެއްގެ ބޭރުގައި އެއްޗެއް ގޮވުމުގެ ސަބަބުން ނުވަ މީހުން މަރުވެއްޖެ އެވެ.
ޕާކިސްތާނުގެ ފުލުހުން ބުނާގޮތުން ރޭ ހިނގި އެ ހާދިސާގައި ގޮވުންތަކެއް ގޮވާފައިވަނީ ސައިކަލެއް ގޮސް ރިކްޝޯއެއްގައި ޖެހިގެންނެވެ. އަދި ބެލެވޭ ގޮތުގައި އެއީ ރިމޯޓް ކޮންޓްރޯލް ބޮމަކުން ގޮވި ގޮވުންތަކެއް ކަމަށް ފުލުހުން ބުނެއެވެ. ޕާކިސްތާން ސަރުކާރުގެ އޮފިޝަލަކު ވަނީ އެ ހަމަލާއަކީ އަމިއްލައަށް މަރުވެގެން ދިން ހަމަލާއެއްކަމަށް ވިދާޅުވެފައެވެ.
"މަދުވެގެން ނުވަ މީހުން ވަނީ މަރުވެފަ. އަދި 40 އަށްވުރެއް ގިނަ މީހުން ވަނީ ޒަހަމްވެފައި،" މުލްތާންގެ ޕޮލިސް ޗީފް އަޒްހަރު އިކްރާމް އޭއެފްޕީއަށް ވިދާޅުވި އެވެ.
ނިޝްތާރު ހޮސްޕިޓަލުގެ ޗީފް އާޝިގް މާލިކް ވަނީ އެ ހާދިސާގައި ނުވަ މީހުން މަރުވިކަން ކަށަވަރުކޮށްދީފަ އެވެ. އަދި ފަރުވާއަށްފަހު 15 މީހަކު ހޮސްޕިޓަލުން ދޫކޮށްލާފައިވާއިރު، 27 މީހަކު އެޑްމިޓްކޮށްފައިވާ ކަމަށް ވެސް އެ ހޮސްޕިޓަލުގެ ޑޮކްޓަރުން ބުނެއެވެ. ބައެއް މީޑިއާތަކުން ރިޕޯޓްކޮށްފައިވާ ގޮތުން އެ ހާދިސާގައި ޒަހަމްވި މީހުންގެ ހާލު ސީރިއަސް އެވެ.
ޕޮލިސް ޗީފް އިކްރާމް ވިދާޅުވި ގޮތުގައި، ގޮވުން ގޮވާފައިވަނީ ރިކްޝޯގެ ފަހަތުގައި ހަރުކޮށްފައި އިންނަ ކޮމްޕްރެސް ނެޗުރަލް ގޭސް (ސީއެންޖީ) ގޮވައިގެން ކަމަށް ކުރިން ބެލެވުނު ނަމަވެސް، ފަހުން އެ ސަރަހައްދު ބެލި ބެލުމުގައި ގޮވާތަކެތީގެ ނިޝާންތަކެއް ވަނީ ފެނިފައެވެ.
އޭނާ ވިދާޅުވީ، އެ ހާދިސާގެ ތަހުގީގެއް މިހާރު ފަށާފައިވާއިރު ގޮވާތަކެތި އައީ ކޮންތަނަކުން ކަމާއި އެތަކެތި ފޮނުވަން މަސައްކަތްކޮށްފައިވަނީ ކޮންތަނަކަށްތޯ ބެލުމަށް ރިކްޝޯގެ ތެރޭގައި ތިބި ފަސިންޖަރުން ދެނެގަތުމަށް މަސައްކަތްކުރަމުންދާ ކަމަށެވެ.
މައުލޫމާތު: އޭއެފްޕީ، އޭޕީ