13 Sep 2015, 23:43
ށ. ފުނަދޫގައި އެއާޕޯޓް އެޅުމަށާއި އެ ރަށުގެ ބިން ބޮޑު ކުރުމުގެ މަސައްކަތް ކުރަން ފެށުމަށް ވާންޖެހޭ ތައްޔާރީތައް ވަމުން އަންނަ ކަމަށް ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވެއްޖެއެވެ.
ށ. ފުނަދޫ މަގު ހެދުމުގެ މަޝްރޫއު އިފްތިތާހުކުރުމުގެ ގޮތުން ފުނަދޫގައި ހުންނަ ވިލާކޮލެޖް ކެމްޕަހުގައި ވާހަކަދައްކަވަމުން މުއިއްޒު ވިދާޅުވީ ފުނަދޫގެ ތަރައްގީ އަށް ރައީސުލްޖުމްހޫރިއްޔާ ވަރަށް ބޮޑަށް ސަމާލުކަން ދެއްވާ ކަމަށެވެ.
އެ ރަށުގެ ތަަރައްގީއަށްޓަކައި ވަރަށް ގިނަ ކަންތައްތައް އެބަހުރި ކަމަށާއި އެ ހުރިހާ ކަމެއް ވެސް 'ވަރަށް އިޖާބީ' ގޮތެއްގައި ރައީސުލްޖުމްހޫރިއްޔާ އަބްދުﷲ ޔާމިން އަބްދުލް ގައްޔޫމް ބައްލަވާ އެކަންތަކަށް ގޮތްތަކެއް ނިންމަވަމުންދާ ކަމަށް ވިދާޅުވިއެވެ.
"މި ރަށުގެ ބިން ބޮޑުކުރުމަށް ވެސް ރައްޔިތުން ބޭނުންވޭ، އަދި އެއާއެކު އެއާޕޯޓެއް ވެސް ހަދަން ބޭނުންވޭ، މިއީ އެކަމާއި ގުޅޭ ގިނަ ފަންނީ ކަންކަން ކުރަންޖެހޭ ކަންތައްތައްކަމުން އަދި މިއަށް ދާ ޚަރަދުވެސް ތަފްސީލީ ގޮތެއްގައި ބަލަންޖެހޭނެ ކަމެއް ކަމުން އަޅުގަނޑުމެން މިގެންދަނީ މިއަށްދާނެ ޚަރަދު ހެދުމަށްޓަކައި ކޮސްޓިން ހެދުމުގެ މަސައްކަތްކުރަމުން" މުއިއްޒު ވިދާޅުވިއެވެ.
އެ މަޝްރޫއުތަކާއި ގުޅޭ އެންވަޔަރަމެންޓެލް އިމްޕެކްޓް އެސެސްމެންޓް ( އީއައިއޭ) ހެދުމަށް ތައްޔާރުވަމުން އަންނަ ކަމަށް ވެސް މިނިސްޓަރު ވިދާޅުވިއެވެ.
ބަނދަރުގެ ފަރުމާއަށް ބަދަލުތަކެއް ގެންނަށްޖެހޭ ކަން ފުނަދޫ ކައުންސިލުން ފާހަގަކޮށްފައިވާ ކަމަށާއި އެ މަސައްކަތް ވެސް ހަމަޖެހިފައިވާ އުސޫލުން ކުރިއަށްދާނެ ކަމަށް މުއިއްޒު ވިދާޅުވިއެވެ.
މީގެ އިތުރުން މަގުތަކަކީ ތަރައްގީއަށް ހުޅުވާލެވޭ ދޮރެއް ކަމަށް ވެސް މުއިއްޒު ވިދާޅުވިއެވެ.
"ރަނގަޅު ފެންވަރުގައި ތާރުއަޅައިގެން މަގުތަކެއް ހެދިގެން ދިއުމުން އޭގެ ސަބަބުން ރަށަށް ލިބިގެންދާނެ ވަރަށް ގިނަ ނަފާތައް ހުންނާނެ. ވަރަށް ގިނަ ކުރިއެރުންތައް އޭގެ ސަބަބުން ލިބިގެންދާނެ. އެކަމުގެ ސަބަބުން އިގްތިސާދީ ގޮތުން ވެސް ގިނަ ގުނަކަންކަން ކުރުމަށް މަގުފަހިވެގެންދާނެ،" މުއިއްޒު ވިދާޅުވިއެވެ.
ރާއްޖޭގެ ވެރިކަމުގައި ހުންނެވީ އިގްތިސާދީ މާހިރެއް ކަަމަށާއި އެކަމުގެ ނަތީޖާއެއްގެ ގޮތުން ފުނަދޫގެ މަގުހެދުގެ މަޝްރޫއު ފެށިގެން އެ ދަނީ އިގްތިސާދީ ވިސްނުމެއްގައި ކަމަށް މުއިއްޒު ވިދާޅުވިއެވެ.
ފުނަދޫ މަގު ހެދުމުގެ މަޝްރޫއަކީ 46 މިލިއަން ރުފިޔާއަށް އެމްޓީސީސީއަށް ހަވާލުކޮށްފައިވާ މަޝްރޫއެކެވެ. އެ މަޝްރޫ 14 މަސް ދުވަހުގެ ތެރޭގައި އެމްޓީސީސީން ނިންމަންޖެހެ އެވެ.