13 Sep 2015, 09:28
ވާދަ ކުރައްވަމުން ގެންދަވަނީ ސިޔާސީ ޕާޓީތަކަކާ ނޫން ކަމަށާއި މަސައްކަތް ކުރައްވަމުން ގެންދަވަނީ ރައްޔިތުންނަށް ދިމާވެފައިވާ މައްސަލަތައް ހައްލު ކޮށްދިނުމަށް ކަމަށް ރައީސުލްޖުމްހޫރިއްޔާ އަބްދުﷲ ޔާމިން އަބްދުލްގައްޔޫމް ވިދާޅުވެއްޖެ އެވެ.
ރިޔާސީ އިންތިހާބަށް ރައީސް ޔާމީންނަށް ކެމްޕެއިން ކޮށްދޭނެ ލީޑަރުން ތައްޔާރު ކުރުމަށް ދަރުބާރުގޭގައި ބޭއްވި ދެ ވަނަ މަހާސިންތާ ނިމުމުގެ ހަފްލާގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ރޭ ވިދާޅުވީ ވެރިކަން ކުރަން އަންނަ ބަޔަކީ ބަޔަކާ ވާދަ ކުރުމުގެ ބަދަލުގައި ރައްޔިތުންނަށް ހިދުމަތް ފޯރުކޮށްދޭން ތިބޭ ބަޔަކަށް ވާން ޖެހޭ ކަމަށެވެ.
"އަޅުގަނޑު ވާދަ މި ކުރަނީ ސިޔާސީ ޕާޓީއަކާ ނޫން. އަޅުގަނޑު މި ވާދަ ކުރަނީކީ އަޅުގަނޑުގެ އަމިއްލަ އަމިއްލަ ޕާޓީއަކާ ވެސް ނޫން. އަޅުގަނޑު މި ވާދަ ކުރަނީކީއެއް ސިޔާސީ އެހެން ކެނޑިޑޭޓުންނާ އެއްވެސް ނޫން. އަޅުގަނޑު އަދި އަޅުގަނޑުމެންގެ ޕާޓީ އިން މަސައްކަތް ކުރަމުން ދަނީ ރައްޔިތުންނަށް ހިދުމަތްތަކެއް ފޯރު ކޮށްދިނުން. ރައްޔިތުންނަށް ދިމާވެފައިވާ މައްސަލަތަކަށް ހައްލެއް ހޯދައިދިނުން،" ރައީސް ވިދާޅުވި އެވެ.
ރިޔާސީ އިންތިހާބަށް ރައީސް ޔާމީންނަށް ކެމްޕެއިން ކޮށްދޭނެ ލީޑަރުން ތައްޔާރު ކުރުމަށް ބޭއްވި ދެ ވަނަ މަހާސިންތާގެ ތެރެއިން-- ސަން ފޮޓޯ/ ޔޫސުފް ސޮފްވާން
ސިޔާސީ ބޭފުޅުންނާއި އެބޭފުޅުން ކުރައްވާ މަސައްކަތްތަކަކީ އެބޭފުޅުންގެ ތާއީދު ހޯދުމަށް ކުރުން ޖާއިޒު ކަމެއް ކަމަށް އެމަނިކުފާނު ވިދާޅުވި އެވެ.
އެގޮތުން ވެރިކަމަށް ކުރިމަތިލާ މީހަކީ އެއްވެސް ހާލަތެއްގައި ހަމައެކަނި އޭގެ ލައްޒަތާއި ޝަރަފު ހޯދުމަށް ވެރިކަމާ ކުރިމަތިލާ މީހަކަށް ވެސް ވެގެން ނުވާނެ ކަމަށް ވެސް ޔާމިން ވިދާޅުވި އެވެ. އެމަނިކުފާނު ވިދާޅުވީ ވެރިކަމަށް އަންނަ މީހަކީ ފުރަތަމަ ރައްޔިތުންގެ މައްސަލަތައް ދަންނަ މީހަކަށް ވާން ޖެހޭ ކަމަށެވެ.
ރިޔާސީ އިންތިހާބަށް ރައީސް ޔާމީންނަށް ކެމްޕެއިން ކޮށްދޭނެ ލީޑަރުން ތައްޔާރު ކުރުމަށް ބޭއްވި ދެ ވަނަ މަހާސިންތާގެ ތެރެއިން-- ސަން ފޮޓޯ/ ޔޫސުފް ސޮފްވާން