12 Sep 2015, 09:35
ސިންގަޕޫރުގައި އިއްޔެ ބޭއްވި އާންމު އިންތިހާބު، ވެރިކަން ކުރާ، ޕީޕަލްސް އެކްޝަން ޕާޓީ (ޕީއޭޕީ) އިން އިންތިހާބު ކާމިޔާބުކޮށްފި އެވެ.
ބީބީސީ އިން މިއަދު ބުނީ މިހާތަނަށް ސާފުކުރި ނަތީޖާތަކުން ދައްކާ ގޮތުގައި ޕީއޭޕީ އަށް ލިބެމުން އަންނަ ވޯޓު އަންނަނީ އިތުރުވަމުން ކަމަށެވެ.
ސިންގަޕޫރު، 1965 ވަނަ އަހަރު މިނިވަންވީއްސުރެ، ސިންގަޕޫރުގައި ބާއްވާ ކޮންމެ އިންތިހާބެއް ޕީއޭޕީ އިން އަންނަނީ ކާމިޔާބު ކުރަމުންނެވެ.
މުޅި ސިންގަޕޫރުގެ ތާރީހުގައި ވެސް އިއްޔެ އޮތް އިންތިހާބަކީ ހުރިހާ ދާއިރާއަކަށް އިދިކޮޅު ޕާޓީ އިން ވާދަ ކުރި ފުރަތަމަ އިންތިހާބެވެ.
އިއްޔެގެ އިންތިހާބުގައި ޕީއޭޕީ އިން ވަނީ 89 ގޮނޑީގެ މަޖިލީހުގެ 83 ގޮނޑި ކާމިޔާބުކޮށްފަ އެވެ. އަދި 2011 ވަނަ އަހަރުގެ އިންތިހާބާ ހިލާފަށް އާންމުންގެ ތާއީދު ވަނީ 69.9 ޕަސެންޓަށް އިތުރުވެފަ އެވެ. ދެ ހާސް އެގާރަ ވަނަ އަހަރު އެ އަދަދު އުޅުނީ 60 ޕަސެންޓްގަ އެވެ.
އިއްޔެގެ އިންތިހާބުގައި އިދިކޮޅު ހަ ޕާޓީއަކުން އިންތިހާބުގައި ވާދަ ކުރި އެވެ. ނަމަވެސް ގޮނޑި ކާމިޔާބު ކުރެވުނީ ވޯކާސް ޕާޓީ އަށް އެކަންޏެވެ. އެ ޕާޓީ އިން ވަނީ ހަ ގޮނޑި ކާމިޔާބުކޮށްފަ އެވެ.
ލީ ވިދާޅުވީ އިއްޔެގެ އިންތިހާބުގެ ނަތީޖާ އިން ރައްޔިތުންގެ ވިސްނުން ވަރަށް ސާފު ކަމަށާއި ނަތީޖާ ހާސިލު ކުރުމަށް ގުޅިގެން މަސައްކަތް ކުރަން ޖެހޭކަން އެ ނަތީޖާ އިން އެނގުނު ކަމަށެވެ. އަދި ވިދާޅުވީ އެ ނަތީޖާއަކީ ޕީއޭޕީގެ ސިޔާސަތުތައް ރައްޔިތުން ބަލައިގަންނަ ކަމުގެ ހެއްކެއް ކަމަށެވެ.