Last Updated: 1 decade 3 month ago
ވޯލްޑްކަޕް 2018އަށް ކޮލިފައި ވުމަށްޓަކައި ރާއްޖެއާއި ޗައިނާ، ޗައިނާގެ ޝެންޔަން އޮލިމްޕިކް ސްޕޯޓްސް ސެންޓަރ ސްޓޭޑިއަމްގައި މިހާރު ކުޅެމުންދާ މެޗުގެ ފުރަތަމަ ހާފް 1-0ގެ ނަތީޖާއަކުން ޗައިނާ ކުރިހޯދައިފި އެވެ.
މެޗްގެ އަށް ވަނަ މިނެޓްގައި ޗައިނާއިން އުފެއްދި ހަމަލާއެއްގައި އެޓީމަށް ލަނޑު ކާމިޔާބުކޮށްދިނީ ޔޫ ޑާބާއޯއެވެ.
ލަނޑަށްފަހު ރާއްޖެއިން ވަނީ ބައެއް ހަމަލާތައް އުފަންދަން މަސައްކަތްކޮށްފައެވެ. ނަމަވެސް ފުރަތަމަ ހާފުގައި ރާއްޖެއަށް ޗައިނާކޮޅަށް ނުރައްކާތެރި ހަމަލާއެއް ފޮނުވާލެވިފައެއް ނުވެއެވެ.
ފުރަތަމަ ހާފުގައި ޗައިނާއިން ރާއްޖެއާ ދެކޮޅަށް ނުވަ ޝޮޓް ފޮނުވާލިއިރު ރާއްޖެއަށް ފޮނުވާލެވުނީ އެންމެ ޝޮޓެކެވެ. ޗައިނާއިން ފޮނުވާލި ޝޮޓްތަކުގެ ތެރެއިން ހަރަތު ޝޮޓެއްވަނީ ގޯލާ އަމާޒުވެފައެވެ.
ނުރައްކާތެރި ހަމަލާގެ ގޮތުގައި ޗައިނާއިން ވަނީ 39 ހަމަލާއެއް އުފައްދާފައެވެ. ރާއްޖެއަށް އުފެއްދުނީ 13 ހަމާލާއެވެ.
ޗައިނާއަށް ތިން ކޯނަރު ލިބުނުއިރު ރާއްޖެއަށް ލިބުނީ ދެކޯނަރެވެ. ރާއްޖެއަށް ނުވަ ހިލޭ ޖެހުން ލިބިފައިވާއިރު ޗައިނާއަށް ލިބުނި ހަ ހިލޭ ޖެހުމެވެ.
މެޗްގައި ރާއްޖެއަށް ވަނީ ދެ ރީނދޫ ކާޑު ދައްކާފައެވެ. އެއީ 27 ވަނަ މިނެޓްގައި މުޙައްމަދު ޢަރިފް (ބަކާ) އަށާއި 31 ވަނަ މިނެޓްގައި ހަމްޒަތު މުޙައްމަދު (ހަމްޒާ) އެވެ.
ޗައިނާއާ ދިވެހިރާއްޖެ މީގެ ކުރިން ވަނީ ދެ ފަހަރެއްގެ މަތިން ބައްދަލުކޮށްފައެވެ. އެގޮތުން 2002 ވަނަ އަހަރު ބޭއްވި ވޯލްޑް ކަޕަށް ކޮލިފައިވުމަށް ކުޅުނު ކޮލިފައިންގައި 2001 ވަނަ އަހަރު އޭޕްރީލް މަހު 22 ވަނަ ދުވަހު ވަނީ ކުޅެފައެވެ. ޗައިނާގައި ކުޅުނު އެ މެޗުން ބަލިވީ 10-1 ގެ ތަފާތު ބޮޑު ނަތީޖާއަކުންވެ.
އޭގެ ފަސް ދުވަސް ފަހުން އޭޕްރީލް 28 ވަނަ ދުވަހު ރާއްޖޭގައި ކުޅުނު މެޗުގައި ޗައިނާ މޮޅުވީ 1-0 ގެ ނަތީޖާއަކުންނެވެ.
