ސީރިއާ އަށް ދެ ދަރިން ގޮވައިގެން ދިޔަ ކަމަށް ބުނާ ދެމަފިރިން އެނބުރި ރާއްޖެ އަތުވެއްޖެ

05 Sep 2015, 18:25

ސީރިއާގައި ކުރަމުންދާ ހަނގުރާމައިގައި ބައިވެރިވުމަށް ދެ ދަރިން ގޮވައިގެން ދިޔަ ކަމަށް ބުނާ ށ. ފޯކައިދޫ ދެމަފިރިން އެނބުރި ރާއްޖެ އަތުވެއްޖެ އެވެ.

"ސަން" އެނގިފައިވާ ގޮތުގައި އެ ދެމަފިރިން ރާއްޖެ އައިސްފައި ވަނީ މިއަދުގެ ވަގުތެއްގަ އެވެ.

ސީރިއާ އަށް ދެ ދަރިން ގޮވައިގެން ދިޔަ ކަމަށް ބުނާ ދެ މީހުން އެނބުރި ރާއްޖެ އައިސްފައިވާކަން ފުލުހުންގެ މީޑިއާ އޮފިޝަލަކު ވެސް "ސަން" އަށް ވަނީ ޔަގީންކޮށްދެއްވާފަ އެވެ.

އެ ދެމީހުން ރާއްޖެ އައިސްފައި ވަނީ އެ ދެމީހުން އެނބުރި ރާއްޖެ އައުމަށް ކުރިން ޓިކެޓު ނަގާފައިވާތާ ދެ ދުވަސް ކުރިން ނެވެ. އެ ދެމަފިރިން އެނބުރި ރާއްޖެ އައުމަށް "ރިޓާން ޓިކެޓު" ކުރިން ނަގާފައި ވަނީ އަންނަ ހޯމަ ދުވަހަ ށެވެ.

ދެ ދަރިން ގޮވައިގެން މިދިޔަ މަހުގެ ފަހުކޮޅު ރާއްޖެއިން ފުރާފައި ވަނީ ފޯކައިދޫ މުހައްމަދު ސޯދިގު، 28، އާއި އޭނާގެ އަންހެނުން އާމިނަތު ޖީލާން، 27، އެވެ. އެ ދެމަފިރިންނަށް ލިބިފައިވާ ދެ ކުދިންގެ ތެރެއިން އެއްކުއްޖަކަށް ހަ އަހަރު ފުރިފައިވާއިރު ހަގު ކުއްޖާއަށް އަދި ދެ އަހަރު ވެސް ނުވެ އެވެ.

މިދިޔަ މަހުގެ 30 ވަނަ ދުވަހު "ސަން" އާ ވާހަކަދައްކަވަމުން ފޯކައިދޫ ކައުންސިލުގެ އިސް ބޭފުޅަކު ވިދާޅުވީ، އެ ދެމަފިރިން ރާއްޖެއިން ލަންކާއަށް ދިއުމަށް މިދިޔަ މަހުގެ 28 ވަނަ ދުވަހު ފުރާފައިވާ ކަމުގެ މައުލޫމާތު ކައުންސިލަށް ލިބިފައިވާ ކަމަށެވެ.

ކައުންސިލް މެމްބަރު ވިދާޅުވީ، އެދެމީހުން މާލެއަށް ބަދަލުވިތާ އަދި މާ ގިނަ ދުވަސްތަކެއް ނުވާ ކަމަށާއި މާލެ ބަދަލުވީ ދަރިންނަށް ކިޔަވައިދިނުމުގެ ގޮތުން ކަމަށެވެ.

"ސަން" އަށް އެނގިފައިވާ ގޮތުގައި މިދިޔަ މަހުގެ 28 ވަނަ ދުވަހު އިބުރާހިމް ނާސިރު އިންޓަނޭޝަނަލް އެއާޕޯޓުން ލަންކާއަށް ދާން އެދެމަފިރިން ވަނީ ފުރައިފައެވެ. އަދި ލަންކާގައި ޓްރާންސިޓް ކުރުމަށްފަހު އެދެމީހުން ވަނީ ބެންކޮކަށް އެތެރެވެފައެވެ.