04 Sep 2015, 20:11
އެފްއޭއެމްގެ އާ ގަވާއިދު ފަސް ކުރުމަށް ބާއްވާ އެކްސްޓްރާ އޯޑިނަރީ ކޮންގްރެސްއަށް ދެވަނަ ޑިވިޝަނުން ސްޕޯޓްސް ކުލަބު މެކާނޯއާއި ކުލަބު ޒެފްރޯލްގެ އިތުރުން ޔުނައިޓެޑް ވިކްޓްރީ ހޮވުނުއިރު ތިން ވަނަ ޑިވިޝަނުން އެލްޓީ ސްޕޯޓްސް ކުލަބާއި ރެޑްލައިން ކުލަބު ހޮވިއްޖެއެވެ.
އެފްއޭއެމް ހައުސްގައި ބޭއްވި ޕްރައިމެރީގައި ދެ ވަނަ ޑިވިޝަންގެ ހަ ޓީމްގެ ތެރެއިން ޕްރައިމެރީ ވޯޓްގައި ބައިވެރި ހަތަރު ޓީމްގެ މެދުގައި ވޯޓްލައިގެން މެކާނޯއާއި ޒެފްރޯލްއަށް ލިބިފައިވަނީ ހަތަރު ވޯޓެވެ. ޔުނައިޓަޑް ވިކްޓްރީއަށް ލިބިފައިވަނީ ތިން ވޯޓެވެ. ޖޭޖޭ ސްޕޯޓްސްއަށް ލިބުނީ އެންމެ ވޯޓެކެވެ.
ދެ ވަނަ ޑިވިޝަންގައި ހިމެނޭ އަނެއް ދެޓީމް ކަމުގައިވާ ކުރިން ފުރަތަމަ ޑިވިޝަނުން ފެނުނު އޭވައިއެލްއާއި ވިޔަންސާއިން ޕްރައިމެރީގައި ބައިވެރިވުމަށް ހުށަހަޅާފައެއް ނުވެއެވެ.
ތިން ވަނަ ޑިވިޝަނުން ޕްރައިމެރީގެ ވޯޓްގައި ބައިވެރިވި 12 ޓީމް ގެ ތެރެއިން ރެޑްލައިނާއި އެލްޓީއަށް ލިބުނީ ހަތް ވޯޓެވެ. ކުލަބު ގާމަގު އަށް ފަސް ވޯޓް ލިބުނުއިރު އޮފްއެފްސީ އަށް ލިބުނީ ހަތަރު ވޯޓެވެ. އަދި މުއިވެޔޮ ސްޕޯޓްސްއަށް ލިބުނީ އެއް ވޯޓެވެ.
ރޭ ދެ ޑިވިޝަނުން ހޮވުނު ފަސް ޓީމްގެ އިތުރުން ކޮންގްރެސްގައި ވޯޓް ދޭނީ ފުރަތަމަ ޑިވިޝަންގައި ވާދަކުރާ އަށް ޓީމްގެ ތެރެއިން ހަތް ޓީމެވެ. ފުރަތަމަ ޑިވިޝަންގައި އަށް ޓީމް ވާދަ ކުރި ނަމަވެސް މަހިބަދޫއަށް ކޮންގްރެސްއިން ފުރުސަތު ނުލިބެނީ މަހިބަދޫއަކީ އެފްއޭއެމްގެ ދާއިމީ މެންބަރަކަށް ނުވަތީއެވެ.
އެފްއޭއެމްގެ ދާއިމީ މެންބަރަކަށް ވަނީ ފަސް އަހަރު ވަންދެން އެފްއޭއެމްގެ މުބާރާތް ތަކުގަހައި ވާދަކޮށްފައިވާ ޓީމްތަކެވެ.
މަހިބަދޫ އެފްއޭއެމްގެ މުބާރާތްތަކުގައި ވާދަކުރާ މީ ތިން ވަނަ އަހަަރެވެ.
ރޭ ޕްރައިމެރީގެ ވޯޓުލުން ފެށުމުގެ ކުރިން އެފްްއޭއެމް ނޯމަލައިޒޭޝަން ކޮމިޓީގެ ޗެއާމަން މުހައްމަދު ޝަވީދު ވިދާޅުވީ އަންނަ ހޮނިހިރު ދުވަހު ބާއްވާ އެފްއޭއެމްގެ ކޮންގްރެސްއަކީ އާ ގަވާއިދު ފާސް ކުރަން ބާއްވާ ކޮންގްރެސްއެއް ނަމަވެސް ކޮންގްރެސް ބާއްވަނީ މިހާރު އަމަލު ކުރަމުންދާ އާ ގަވައިދުގައި އޮތް ގޮތުގެ މަތިން ކަމަށެވެ.
އެފްއޭއެމްގެ އެކްސްޓްރާ އޯޑިނަރީ ކޮންގްރެސް އޮންނާނީ އަންނަ ހޮނިހިރު ދަވަހު ހެނދުނު 9 ޖަހާއިރު ހޮޓެލް ޖެންގައެވެ.
އެފްއޭއެމްއިން ބުނީ އެކްސްޓްރާ އޯޑިނަރީ ކޮންގްރެސް ކުރިއަށްދާ ގޮތް ބެލުމަށް ފީފާއާއި އޭއެފްސީން އޮފިޝަލުން ވަޑައިގަތުމަށް ހަމަޖެހިފައިވާ ކަމަށެވެ.