03 Sep 2015, 09:21
އަންކަރާ (ސެޕްޓެމްބަރު 3) : ކަނޑު ހުރަސްކޮށް ގްރީސްއަށް ދަތުރުކުރަނިކޮށް ބޯޓު ބަންޑުން ޖަހާލައިގެން ކަނޑަށް ޣަރަގުވެގެން މަރުވެފައިވާ ސޫރިޔާގެ ރެފިއުޖީ ތުއްތު ކުއްޖެއްގެ ހަށިގަނޑު ރާޅުތަކާ އެކު ތުރުކީގެ އައްސޭރިފަށަށް ލެއްގުމާ ގުޅިގެން ދުނިޔޭގެ ޒަމީރު ގުޑުވާލައިފި އެވެ.
ތުއްތު މި ފިރިހެން ކުއްޖާއަކީ ހާލުގައިޖެހި ގޮތްހުސްވެފައިވާ ސޫރިޔާގެ ރެފިއުޖީން ދިރިއުޅޭނެ ގޮތެއް ހޯދުމަށް ޓަކައި ކުދިކުދި ބޯޓުތަކުގައި ގްރީސްއަށާއި އިޓަލީއަށް ދަތުރުކުރަނިކޮށް ތުރުކީއާއި ގްރީސްއާ ދެމެދުގައިވާ މަރްމަރާ ކަނޑަށާއި އިޓަލީއަށް ދިޔުމަށް ދަތުރުކުރާ މެޑިޓަރޭނިޔަން ކަނޑަށް ޣަރަގުވެގެން މަރުވަމުންދާ ސޫރިޔާގެ އެތައް ހާސް ރެފިއުޖީންގެ ތެރޭގައި ހިމެނޭ ތުއްތު ކުއްޖެއްކަމަށްވެ އެވެ.
މިދުވަސްވަރު ޔޫރަޕަށް ހިޖްރަކުރަމުން ގެންދާ ސޫރިޔާގެ ރެފިއުޖީންގެ ތެރޭގައި ގިނައީ ލުބްނާނުގައި ވަރަށް ދަތިހާލުގައި ދިރިއުޅެމުންދާ ސޫރިޔާގެ 1.5 މިލިޔަން ރެފިއުޖީންގެ ތެރޭގައި ހިމެނޭމީހުންނެވެ. އެމީހުން ލުބްނާން ދޫކޮށް ޔޫރަޕަށް ހިޖްރަކުރާން ފަށާފައިވަނީ އެމީހުންނަށް ބައިނަލްއަގްވާމީ ގޮތުން ދެމުން ގެންދިޔަ އެހީތައް މަދުވެ އެންމެފަހުން ދިރިނޫޅެވޭ އަދި ބަނޑު ފުރާނަވެސް މުއްތި ނުކުރެވޭ ހިސާބަށް ހާލަތު ގޯސްވެ މާޔޫސްވެގެންކަމަށް ރިޕޯޓްތައް ބުނެ އެވެ.
ގޮތެއް ހޯދުމަށް ސޫރިޔާގެ ރެފިއުޖީން ކަނޑު ހުރަސްކޮށް ޔޫރަޕަށް ކުރާ ދަތުރުގައި ބޯޓު ބަންޑުން ޖަހާލައިގެން ކަނޑަށް ޣަރަގުވެގެން މަރުވެފައިވާ ސޫރިޔާގެ ރެފިއުޖީންގެ އާއިލާތަކުގެ ހަށިގަނޑު ތުރުކީގެ އިތުރުން ގްރީސްގެ ގޮނޑުދޮށްތަކަށް ވެސް ލައްގަމުންދާކަމަށްވެ އެވެ. މިގޮތަށް ލައްގަމުންދާ ހަށުތަކުގެ ތެރޭގައި ތުއްތު ކުދިންގެ ހަށިތައްހުރުމާ އެކު ސޫރިޔާގެ ރެފިއުޖީންނަށް ކުރިމަތިވެފައިވާ އިންސާނީ ގިލަންވެރިކަމުގެ ވޭނީ ޙާލަތު ކުރިޔަށްވުރެ ވެސް ބޮޑަށް މިހާރު ވަނީ ދުނިޔޭގެ ސަމާލުކަމަށް އައިސްފަ އެވެ.
މިހަށިތަކުގެ ފޮޓޯތައް ބައިނަލްއަގްވާމީ މީޑީޔާގައާއި ސޯޝަލް މީޑިޔާގައި ދައުރުވަމުންދާ އިރު ޙާލުގައިޖެހިފައިވާ ސޫރިޔާގެ ރެފިއުޖީންގެ މައްސަލަ ހައްލުކުރުމުގައި ބައިނަލްއަގްވާމީ މުޖްތަމައުވަނީ ނާކާމިޔާބުވެފައިވާ މިންވަރުވެސްދަނީ ހާމަވަމުންނެވެ. އަދި ސޫރިޔާގެ ދާޚިލީ ހަނގުރާމައިގާ ހަރަކާތްތެރިވާ އެގައުމުގެ ސިފައިންނާއި ހަނގުރާމަވެރި ޖަމާއަތްތަކުގެ އަނިޔާވެރިކަމުގެ އިތުރުން ސޫރިޔާގެ ދާޚިލީ ހަނގުރާމައިގެ އަލިފާންގަނޑަށް ސިޔާސީ ބޭނުމުގައި ދަރުއަޅަމުންދާ ބޮޑެތި ބާރުތަކާއި އަވަށްޓެރި އަރަބި އަދި އިސްލާމީ ގައުމުތަކުގެ ދައުރާމެދު ވެސް ވަނީ އެތަކެއް ސުވާލު އުފެދިފަ އެވެ.
މިމައްސަލައާ ގުޅިގެން ދުނިޔޭގެ އެކިކަންކޮޅުތަކުގެ ރައްޔިތުން ގެންދަނީ ސޯސަލް މީޑިޔާ މެދުވެރިކޮށް އދ. އަށާއި ދުނިޔޭގެ ބޮޑެތި ބާރުތަކަށާ އަދި އަރަބި އަދި އިސްލާމީ ގައުމުތަކަށްވެސް ފާޑުކިޔައި ސޫރިޔާގެ ނިކަމެތި ރައްޔިތުންގެ ޙާލަތާމެދު ހަމްދަރްދީ ފަޅުކޮށް ސޫރިޔާގެ ދާޚިލީ ހަނގުރާމަ ހުއްޓުވުމުގެ ޒިންމާ އުފުލުމަށް މުޅި ބައިނަލްއަގްވާމީ މުޖްތަމައަށް އިލްތިމާސް ކުރަމުންނެވެ. ސޫރިޔާގެ ރައްޔިތުން ކަނޑު ހުރަސްކޮށް ޔޫރަޕަށް މިސްރާބު ޖަހާފައިވާއިރު ސޫރިޔާގެ ދާޚިލީ ހަނގުރާމައިގާ ނުސީދާކޮށް ޝާމިލްވާ އަރަބި އަދި އިސްލާމީ ގައުމުތަކުގެ މައްޗަށްވަނީ އެހަނގުރާމައިގެ ޝިކާރައަކަށްވެފައިވާ ސޫރިޔާގެ ނިކަމެތި ރައްޔިތުންގެ މަތިން ހަނދާންނައްތާލިކަމުގެ ތުހުމަތު ކުރެވިފައެވެ.
އަރަބި އިސްލާމީ ގައުމުތަކުން ސޫރިޔާގެ ހާލުގައިޖެހިފައިވާ ރައްޔިތުންނަށް އެކަށީގެންވާ އެހީތެރިކަމާއި ހިޔާވަހިކަން ދޭނަމަ އެމީހުން އިންސާނީ ގިލަންވެރިކަމެއްގެ ތެރެއަށް ނުވެއްޓުނީސް ކަމަށް ގިނަ ބަޔަކު ދެކެއެވެ. (ނޫސްއެޖެންސީތައް)