30 Aug 2015, 12:18
ފޮރިން މިނިސްޓްރީ ކައިރިން ޖަރުމަނުގެ ފަތުރުވެރިއެއްގެ އަތްދަބަސް ފޭރުނުކަމަށް ތުހުމަތު ކުރެވޭ މ. ޝައިނިންގް ސްޓާ މޫސާ ރިޟްވާން، 31، އާއި މ. ދިންމަނަ އަބްދުﷲ ތިލްމީޒުގެ މައްސަލަ ޕްރޮސިކިއުޓާ ޖެނެރަލްގެ އޮފީހަށް ފޮނުވައިފި އެވެ.
ސަން އަށް އެނގިފައިވާ ގޮތުގައި އެ މައްސަލަ ޕީޖީއަށް ފޮނުވާފައި ވަނީ މިދިޔަ ހަފްތާގެ ތެރޭގައެވެ.
މޫސާ ރިޟުވާނަކީ ގެއްލިގެން ހޯދަމުން އަންނަ މިނިވަން ނޫހުގެ ނޫސްވެރިޔާ އަހްމަދު ރިޟުވާން އަބްދުﷲގެ ބޭބެ އެވެ. އަދި ތިލްމީޒަކީ މ. ފެއަރީ ކޯނާ އަލީ ޝިފާން މަރާލި ކަމުގެ ތުހުމަތުގައި ދައުލަތުން ދައުވާ ކުރި މީހެކެވެ. އޭނާގެ މައްޗަށް ކުށް ސާބިތުނުވި މައްސަލަ މިހާރު ވަނީ ހައިކޯޓުގައި އިސްތިއުނާފު ކޮށްފައެވެ.
ފުލުހުން ބުނީ މޫސާ ރިޟުވާނާއި ތިލްމީޒު ފުރަތަމަ ހުއްޓުވައި ސުވާލުކޮށްފައިވަނީ ބަނގުރާ ގެންގުޅޭކަމަށް ތުހުމަތު ކުރެވިގެން މިއަހަރުގެ ޖުލައި މަހުގެ 28 ވަނަ ދުވަހުގެ މެންދުރު 12:35 އެހައިކަންހާއިރު ކަމަށެވެ. އެމީހުން ހުއްޓުވައި ސުވާލުކޮށް ބަލައި ފާސްކުރިއިރު ވަގަށް ނަގާފައިވާކަމަށް ބެލެވޭ ބައެއް ތަކެތި ފެނުމާއެކު އެމީހުން ވަގުތުން ހައްޔަރުކޮށްފައިވާ ކަމަށް ވެސް ފުލުހުން ބުންޏެވެ.
ފުލުހުން ބުނީ، ފަހުން އެނގުނު ގޮތުގައި އެމީހުންގެ އަތުން ފެނުނު ތަކެއްޗަކީ މިއަހަރުގެ ޖުލައި މަހުގެ 28 ވަނަ ދުވަހުގެ ހެނދުނުގެ ވަގުތެއްގައި ފޮރިން މިނިސްޓްރީ ކައިރިން ދިޔަ ޖަރުމަން މީހެއްގެ އަތުން ފޭރިފައިވާ ދަބަހެއްގައި ހުރި ބައެއް ތަކެތި ކަމަށެވެ.
އެމީހުންނާ އިތުރަށް ސުވާލުކޮށް ހިންގި ތަހުގީގުން އެ ދަބަހުގައި ހުންނާނެކަމަށް ބުނާ ގިނަ އަދަދެއްގެ ފައިސާއާއި އިތުރު ތަކެތިވެސް ހޯދާފައިވާ ކަމަށް ފުލުހުން ބުންޏެވެ.