30 Aug 2015, 09:37
ރައީސް އަބްދުﷲ ޔާމީން ރައްޔިތުންނަށް ކޮށްދެއްވަމުން ގެންދަވާ މަސައްކަތްތަކުގެ ނަތީޖާ ހާސިލު ކުރުމަށް އެމަނިކުފާނަށް އަދި އިތުރު ފުރުސަތު ދޭން ޖެހޭ ކަމަށް ސަރުކާރު ކޯލިޝަނުގައި ހިމެނޭ އެމްޑީއޭގެ ނައިބު ލީޑަރު އަލީ މައުރޫފު ވިދާޅުވެއްޖެ އެވެ.
އެމްޑީއޭ ޒުވާނުންގެ ޖަގަހަ ހުޅުވުމަށް ރޭ ބޭއްވި ހާއްސަ ހަފުލާއެއްގައި ވާހަކަފުޅު ދައްކަވަމުން މައުރޫފު ވިދާޅުވީ ރާއްޖެ ތަރައްގީކޮށް ރައްޔިތުން ބޭނުންވާ ހިދުމަތްތައް ފޯރުކޮށްދިނުމުގެ ގާބިލުކަން ރައީސް ޔާމީނުގެ ކިބައިގައި ހުންނެވި ކަމަށެވެ.
"އަޅުގަނޑުމެންނަށް އެމަނިކުފާނު [ރައީސް ޔާމީން] އެކޮށްދޭ ކަންތައްތަކުގެ ނަތީޖާ ވާސިލުކުރެވޭނީ އަދި އެމަނިކުފާނަށް އެއް ދައުރު ދީގެން ކަމަށް ވާތީ މިއަދުން ފެށިގެން އަޅުގަނޑުމެން މަސައްކަތް މި ކުރަނީ ރައީސް ޔާމީން 2018 އަށް ރައީސުލްޖުމްހޫރިއްޔާ ކަމަށް ގެނައުމަށް ޓަކައި،" މައުރޫފު ވިދާޅުވި އެވެ.
މައުރޫފު ވިދާޅުވީ ކުޑަ ދުވަސްކޮޅެއްގެ ތެރޭގައި ސަރުކާރު ކޯލިޝަން ޕާޓީ، އެމްޑީއޭ އަށް 25،000 މެމްބަރުން ހަމަކުރާނެ ކަމަށެވެ. އަދި އެމްޑީއޭ އަކީ "ހުސް" ވާހަކަ ދައްކާ ބައެއް ނޫން ކަމަށާއި އެ ޕާޓީއަކީ އަމަލުން ކަންތައްތައް ރައްޔިތުންނަށް ދައްކުވައިދޭ ޕާޓީއެއް ކަމަށް އޭނާ ވިދާޅުވި އެވެ.
އެމްޑީއޭއާ ރޭ އަލަށް ގުޅުނު މެމްބަރުން ޕާޓީގެ ލީޑަރު ސިޔާމަށް ފޯމް ހަވާލުކުރައްވަނީ: ސަން ފޮޓޯ/ ޔޫސުފް ސޮފްވާން
"އަޅުގަނޑުމެން އަބަދުވެސް އޮންނާނީ ނަތީޖާ ދައްކާފައި. އަޅުގަނޑުމެން ބައިވެރިވި ކޮންމެ އިންތިހާބެއް ވާނީ ކާމިޔާބު ކޮށްފައި. އެހެންވީމަ އަޅުގަނޑު ދަންނަވާލަން އޮތީ އަޅުގަނޑުމެންގެ ފުރަތަމަ އަމާޒަކަށްވީ ދިވެހިރާއްޖޭގެ ވެރިކަމުގެ ހިއްސާއެއް އަޅުގަނޑުމެންގެވުން. އަޅުގަނޑުމެންގެ އަމާޒަކަށްވީ ރައްޔިތުންގެ މަޖިލީހުގައި އަޅުގަނޑުމެންގެ ދައުރެއް އޮތުން. އަޅުގަނޑުމެންގެ އަމާޒަކަށްވީ އަތޮޅު ކައުންސިލުތަކާއި ރަށު ކައުންސިލުތަކުގައި އަޅުގަނޑުމެންގެ ދައުރެއް އޮތުން،" މައުރޫފު ވިދާޅުވި އެވެ.
އޭނާ ވިދާޅުވީ އެމްޑީއަށް ޒުވާނުން ބޭނުންވާ ކަމަށެވެ. ޒުވާނުންނާ ނުލާ ގައުމު ތަރައްގީ ނުވާނެ ކަމަށާއި އެއީ އެމްޑީއޭ އިން ގަބޫލުކުރާ ފަލްސަފާ ކަމަށް އޭނާ ވިދާޅުވި އެވެ. އޭނާ ވިދާޅުވީ ރައްޔިތުންގެ މަޖިލިސް މެދުވެރިކޮށް ވެސް ކުރައްވަމުން ގެންދަވާ މަސައްކަތަކީ ޒުވާނުންނަށް ގައުމުގެ އިސް މަގާމުތަކަށް އާދެވުމުގެ މަގު ތަނަވަސްކޮށްދިނުން ކަމަށެވެ.
"އެއީ ރައީސުލްޖުމްހޫރިއްޔާ މަގާމުކަމުގައި ވިއަސް. އަދި ނައިބު ރައީސް ކަމުގެ މަގާމުވިއަސް އަދި މިނިސްޓަރު ކަމުގެ މަގާމުވިއަސް ތިޔަބޭފުޅުންނަށް [ޒުވާނުންނަށް] އެ ވަނީ ރާއްޖެ އިން އެފުރުސަތު ހުޅުވާލައިފައި. މަޖިލިސް ތެރެއިން އެ ފުރުސަތު އެވަނީ ހުޅުވާލައިފައި. އަޅުގަނޑު ޒުވާނުންނަށް ދަންނަވާލަން ބޭނުން ވަނީ ތިޔަބޭފުޅުން ތައުލީމީ ޒުވާނުންނަށްވެ އަޅުގަނޑުމެންގެ ސިޔާސީ މަޝްރަހު އަދި ސިޔާސީ މައިދާން ހަމަހިމޭން ކުރުމަށް ޓަކައި އަޅުގަނޑުމެންގެ ޒުވާނުންގެ ހަކަތައާއި އެކީގައި ފަނާކުރުވަނިވި ފިކުރު ނައްތާލާ ތަރައްގީއަށް މަސައްކަތް ކުރަން ހިނގާށޭ،" މައުރޫފު ވިދާޅުވި އެވެ.
އެމްޑީއޭއާ ރޭ އަލަށް ގުޅުނު މެމްބަރު ޕާޓީގެ ލީޑަރު ސިޔާމަށް ފޯމް ހަވާލުކުރައްވަނީ: ސަން ފޮޓޯ/ ޔޫސުފް ސޮފްވާން
ކެނދިކުޅުދޫ ދާއިރާގެ މަޖިލިސް މެމްބަރުކަން ވެސް ކުރައްވާ މައުރޫފު ވިދާޅުވީ ތަރައްގީ އަކީ އެމްޑީއޭގެ ފިކުރު ކަމަށެވެ. އޭނާ ވިދާޅުވީ އެޕާޓީގެ ފިކުރަކީ މުޅި ރާއްޖެ ތަރައްގީކޮށް ރާއްޖޭގެ ރައްޔިތުންނަށް އުފާވެރިކަމާއި ތަރައްގީގެ އިހުސާސުތައް ކޮށްދިނުން ކަމަށެވެ.
"އާދެ އަޅުގަނޑުމެން ސަރުކާރާއި ގުޅިގެން މި ދަނީ ބޮޑެތި ޕުރޮޖެކްޓުތައް ހިންގަމުން. އަދި ﷲގެ އިރާދަފުޅާއި އެކީގައި ދާދި ކުޑަ ދުވަސްކޮޅެއްގެ ތެރޭގައި މާލެއިން ހުޅުމާލެއަށް ބުރިޖު އެޅި ޒުވާނުންނަށް ޓަކައި ޔޫތު ސިޓީއެއް ގާއިމުވެ މުޅި ޒުވާނުންގެ އުއްމީދުތައް މި ސަރުކާރުން ހޯދައިދޭނެ." މައުރޫފު ވިދާޅުވި އެވެ.
ރޭގެ ހަފުލާގައި ބައެއް ރަށްރަށުގެ ކައުންސިލަރުންނާއި ބައެއް އާންމުން ވަނީ އެމްޑީއޭ އަށް ސޮއިކޮށްފަ އެވެ. އެގޮތުން ބ. އަތޮޅު ކައުންސިލު މެމްބަރު އާދަމް ނަސީމާއި ބ. ފެހެންދޫ ކައުންސިލް މެމްބަރު މުހައްމަދު އިބުރާހީމު ވަނީ ރޭ އެމްޑީއޭއަށް ސޮއިކުރައްވާފަ އެވެ. އަދި އެމްޑީޕީގެ ހައްގު ކޮމެޓީގެ ރައީސާ އައިޝަތު މަމްދޫހާގެ އިތުރުން އަދާލަތު ޕާޓީގެ ހުޅުމާލެ ގޮފީގެ ރައީސް ވެސް ރޭ ވަނީ އެމްޑީއޭ އަށް ސޮއިކުރައްވާފަ އެވެ.