26 Aug 2015, 14:18
ހުޅުމާލޭ އަތިރިމަތީގައި ކެފޭއެއް ހެދުމަށް ބަޔާކާ ބިން ހަވާލުކޮށްފި އެވެ.
ކެފޭ ހެދުމަށް ބިންދޫކުރި އެއްބަސްވުމުގައު ހައުސިން ޑިވެލޮޕްމެންޓް ކޯޕަރޭޝަން(އެޗްޑީސީ)ގެ ފަރާތުން ސޮއިކުރެއްވީ އެކުންފުނީގެ މެނޭޖިން ޑިރެކްޓަރު މުހައްމަދު ސައިމަންއެވެ. ބިން ލިބުނު ވިންގްސް ސާވިސްގެ ފަރާތުން ސޮއިކުރެއްވީ އެކުންފުނީގެ މެނޭޖިން ޑިރެކްޓަރު ހަސަން ބާގިރުއެވެ.
ކެފޭ ހެދުމަށް ބިންދޫކުރުމުގެ ހަފްލާގެ ތެރެއިން-- ފޮޓޯ: އެޗްޑީސީ
އެޗްޑީސީއިން މައުލޫމާތުދޭ ގޮތުގައި އެއެގްރިމެންޓުގެ ދަށުން ހުޅުމާލޭގައި ތަރައްގީ ކުރަނީ ދުނިޔޭގެ އެކި ކަންކޮޅުތަކުގައި 100 އަށް ވުރެ ގިނަ ކެފޭ ހިންގާ ޑޯމް ބްރޭންޑް ކެފޭއެކެވެ.
ކެފޭ ހެދުމަށް ބިން ދޫކޮށްފައި ވަނީ ހުޅުމާލޭ ބޮޑު މަގު ކޮޅުން "ރުއްގަނޑު" ސަރަހައްދުންނެވެ. އެސަރަހައްދުން 4305.56 އަކަފޫޓުގެ ބިމެއް ދޫކުރާ އިރު އެތަނުގައި ކެފޭ ހެދެނީ އެއް ފުލޯއަށެވެ. އެބިން 15 އަހަރަށް ދޫކުރުމަށް ނިންމާފައިވާ އިރު ބިން ދޫކުރާތާ ހަ މަސް ތެރޭ ތަރައްގީކޮށް ނިންމަން ޖެހެ އެވެ.
އެޗްޑީސީ މެނޭޖިން ޑިރެކްޓަރު ސައިމަން ވިދާޅުވީ ކުރިއަށް އޮތްތަނުގައި ކެފޭ ރެސްޓޯރެންޓް ހިންގުމަށް އިތުރު ބިން ދޫކުރުމަށް ނިންމާފައިވާ ކަމަށެވެ.