23 Aug 2015, 14:14
އިންޑިއާގައި ހުންނަ ރާއްޖޭގެ ހައިކޮމިޝަނުން ދިވެހި ރާއްޖޭގެ މިނިވަން ކަމަށް 50 އަހަރު ފުރުން އިންޑިއާގެ ނިއު ދިއްލީގައި ފާހަގަކޮށްފި އެވެ.
ރާއްޖޭގެ މިނިވަން ކަމުގެ މުނާސަބަތުގައި ރޭ ނިއު ދިއްލީގައި ބޭއްވި ރަސްމިއްޔާތަކީ ދެ ގައުމުގެ ދެމެދުގައި އޮތް ގުޅުން އިތުރަށް ވަރުގަދަކުރުމަށް ބޭއްވި ރަސްމިއްޔާތެއް ކަމަށް ފޮރިން މިނިސްޓްރީ އިން ވަނީ ބުނެފަ އެވެ.
ރޭގެ ހަފްލާ އަށް ހާޒިރުވި ބައެއް ބޭފުޅުން --
ރޭގެ ރަސްމިއްޔާތުގައި ވާހަކަފުޅު ދައްކަވަމުން ހައިކޮމިޝަނަރު އަހުމަދު މުހައްމަދު ވިދާޅުވީ ރާއްޖޭގެ މިނިވަން ކަމަށް 50 އަހަރު މި އަހަރު ފުރިފައިވާ އިރު ގައުމުގެ ތަރައްގީގެ ސުޕީޑު ވަނީ ކުރިއަށް ވުރެ އެތައް ގުނައެއް މިހާރު އަވަސްވެފައި ކަމަށެވެ.
އެގޮތުން ތަރައްގީއަށް އައި ބޮޑެތި ބަދަލުތަކާ އެކު ގައުމަށް ވަނީ ބޮޑެތި ކާމިޔާބީތަކެއް ވެސް ލިބިފައި ކަމަށް އޭނާ ވިދާޅުވި އެވެ.
ދެ ގައުމުގެ ގުޅުމާ މެދު ވާހަކަފުޅު ދައްކަވަމުން އޭނާ ވިދާޅުވީ ދެ ގައުމުގެ އެކުވެރި ކަމަކީ އެތައް ޒަމާނެއްވަންދެން އޮތް ގުޅުމެއް ކަމަށާއި އެ ގުޅުމަކީ ވަރުގަދަ ގުޅުމެއް ކަމަށެވެ.
އިންޑިއާ އަކީ ދަތި ހާލަތެއް ދިމާވުމުން އެންމެ ފުރަތަމަ އެހީގެ އަތް ފޯރުކޮށްދޭ ފަރާތް ކަމަށް ވެސް އޭނާ ވިދާޅުވި އެވެ.