20 Aug 2015, 13:18
ވިލިމާލޭ ކުޑަކުދިންގެ ޕާކް ކައިރީގައި ހުއްޓައި ނ. މާޅެންދޫ ވައިޓްހައުސް އަހްމަދު މިރުޒާ މަރާލި ކަމަށް ތުހުމަތު ކުރެވޭ ތިން މީހުންގެ ޝަރީއަތަށް އައިޖީއެމްއެޗްގެ އިދާރީ މުވައްޒަފަކު ހާޒިރުކޮށްފި އެވެ.
ދެ ހާސް އެގާރަ ވަނަ އަހަރުގެ އޭޕްރީލް މަހުގެ 11 ވަނަ ދުވަހުގެ ހަވީރު 5:45 އެހާކަންހާއިރު ވިލިމާލޭ ކުޑަކުދިންގެ ޕާކް ކައިރީގައި ހުއްޓައި ލަކުޑިބުރިން ހަމަލާދީ މިރުޒާ މަރާލި ކަމުގެ ތުހުމަތުގައި ދައުވާ އުފުލާފައި ވަނީ ޏ. ފުވައްމުލައް ޒާވިއާ އަބްދުﷲ ނަސީފާއި ވ. ފަޒީލާމަންޒިލް މުހައްމަދު ޝިފާއުގެ އިތުރުން ގދ. ގައްދޫ ބޮކަރުގޭ އަލީ ރިފްޝާންގެ މައްޗަށެވެ.
އެމީހުންގެ ތެރެއިން ނަސީފްގެ މައްޗަށް އުފުލާފައި ވަނީ ގަސްދުގައި މީހަކު މަރާލުމުގެ ކުށުގެ ދައުވާ އެވެ. ޝިފާއު އާއި ރިފްޝާންގެ މައްޗަށް އުފުލާފައި ވަނީ ގަސްދުގައި މީހަކު މަރާލުމުގައި ބައިވެރިވުމުގެ ކުށުގެ ދައުވާ އެވެ.
މިއަދު ބޭއްވި ޝަރީއަތުގެ މަޖިލީހަށް އައިޖީއެމްޗެގެ އިދާރީ މުވައްޒަފަކު ހާޒިރުކޮށްފައި ވަނީ އެ ހޮސްޕިޓަލުން ތައްޔާރު ކުރި މިރުޒާގެ މެޑިކޯ ލީގަލް ރިޕޯޓާ ބެހޭ ގޮތުން ދިފާއީ ވަކީލު އުފެއްދި ސުވާލުތަކަށް ޖަވާބު ހޯދުމަށެވެ.
އެގޮތުން މެޑިކޯ ލީގަލް ރިޕޯޓުގައި އައިޖީއެމްއެޗްގެ ތައްގަނޑު ނެތުމުން އެއީ އެ ހޮސްޕިޓަލުން ތައްޔާރު ކުރި ރިޕޯޓެއް ކަމާ މެދު ދިފާއީ ވަކީލު ވަނީ ސުވާލު އުފައްދައިފަ އެވެ. ދިފާއީ ވަކީލުގެ ސުވާލަށް ޖަވާބު ދެމުން އައިޖީއެމްއެޗްގެ މުވައްޒަފު ވިދާޅުވީ މިހާތަނަށް މެޑިކޯ ލީގަލް ރިޕޯޓުގައި ތައްގަނޑު ނުޖަހައިގެން އޭގެ ސައްޚަ ކަމާމެދު އެއްވެސް ފަރާތަކުން ސުވާލު އުފައްދާފައި ނުވާ ކަމަށެވެ.
އޭނާ ވިދާޅުވީ މެޑިކޯ ލީގަލް ރިޕޯޓަކީ ޑޮކްޓަރު ބަލި މީހާ ބެލުމަށް ފަހު ވަގުތުން ތައްޔާރު ކުރާ ރިޕޯޓެއް ކަމަށެވެ.
މެޑިކޯ ލީގަލް ރިޕޯޓުގެ ސައްހަކަމާ ބެހޭ ގޮތުން ދިފާއީ ވަކީލު ތަފާތު އެކި ސުވާލުތައް ކުރިމަތި ކުރުވި ނަމަވެސް އެހުރިހާ ސުވާލަކަށް ޖަވާބު ނުދެވޭނެ ކަމަށް އައިޖީއެމްއެޗްގެ މުވައްޒަފު ވިދާޅުވި އެވެ.
ދައުލަތުގެ ވަކީލު ވިދާޅުވީ އައިޖީއެމްއެޗްގެ މުވައްޒަފަކު ހާޒިރު ކުރީ އެ ރިޕޯޓަކީ އެ ހޮސްޕިޓަލުން ތައްޔާރުކުރެވުނު ރިޕޯޓެއްތޯ ޔަގީންކޮށްދިނުމަށް ކަމަށެވެ. ނަމަވެސް ރިޕޯޓު ތައްޔާރު ކުރި ޑޮކްޓަރު ހާޒިރުނުކޮށް އެ ރިޕޯޓުގެ ސައްޚަކަން ކަށަވަރުނުވާނެ ކަމަށް ދިފާއީ ވަކީލު ވަނީ ވިދާޅުވެފަ އެވެ.
މައްސަލަ ބައްލަވާ ކްރިމިނަލް ކޯޓުގެ އިސް ގާޒީ އަބްދުﷲ މުހައްމަދު (އަބްދުﷲ ގާޒީ) ވިދާޅުވީ ދައުލަތުގެ މުއައްސަސާތަކުން ހުށަހަޅާ އެފަދަ ލިޔެކިޔުންތަކަކީ ސައްޚަކަން ކަށަވަރުވާ ހަރުދަނާ ލިޔެކިޔުންތަކަކަށް ވާން ޖެހޭ ކަމަށެވެ. އަދި ތައްގަނޑު ފަދަ ތަކެއްޗަކީ ލިޔެކިޔުންތަކުގެ ސައްޚަކަން ކަށަވަރު ކުރުމަށް ހުންނަ ތަކެތި ކަމަށާއި، ރަސްމީ ލިޔެކިޔުންތަކުގައި ތައްގަނޑު ޖެހިފައި ހުއްނަން ޖެހޭނެ ކަމަށް އަބްދުﷲ ގާޒީ ވިދާޅުވި އެވެ.
ދެފަރާތުންވެސް ފާހަގަކުރަން ހުރި ކަން ކަން ނިމުމުން އަބްދުﷲ ގާޒީ ވަނީ ޚުލާސާ ބަޔާން ހުށަހެޅުމަށް ދެ ފަރާތަށް ވެސް 10 ދުވަހުގެ މުއްދަތެއް ދީފަ އެވެ.