18 Aug 2015, 16:13
މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ މުވައްޒަފުންނަށް އެ އޮތޯރިޓީ އިން ލޯނު ނެގޭނެ ގޮތް ހެދުމަށް ގާނޫނަށް މަޖިލީހުން ގެނެސްފައިވާ އިސްލާހު ރައީސް އަބްދުﷲ ޔާމީން އަބްދުލް ގައްޔޫމް އިއްޔެ ތަސްދީގު ކުރައްވައިފި އެވެ.
އެމްއެމްއޭ ގާނޫނަށް ގެނެސްފައިވާ އިސްލާހުގައި ބުނެފައި ވަނީ ވައްޒަފުންނަށް ލޯނުދޭން ޖެހޭ ގޮތްތައް ކަނޑައަޅަން ޖެހޭނެ ކަމަށާއި އެކަންތައް ބެހެނީ މައިގަނޑު ތިން ބަޔަކަށް ކަމަށެވެ. އެ ތިން ބަޔަކީ ފްލެޓު ގަތުމާއި އޮތޯރިޓީގެ މުވައްޒަފަކު ނުވަތަ އޮތޯރިޓީގެ މުވައްޒަފެއްގެ ދަރިއަކު މަތީތައުލީމު ހާސިލު ކުރުން ނުވަތަ ގޯތި އިމާރާތް ކުރުމަށް ލޯނު ދިނުމަށެވެ.
ހަމައެއާ އެކު އެ އިސްލާހުގައި ބުނެފައި އެ ނޫން އެހެން ކަމަކަށް ލޯނު ދޫ ކުރެވޭނީ ވަގުތާއި ހާލަތަށް ރިއާޔަތްކޮށް އެކަމަކީ އެދެވިގެންވާ ކަމެއް ކަމަށް އެމްއެމްއޭގެ ގަވަރުނަރަށް ފެނިއްޖެ ހިނދެއްގައި ކަމަށެވެ.
"ސަން" އަށް މައުލޫމާތު ދެއްވަމުން އަލީ ފަޒާދު ވިދާޅުވީ، އެ އިސްލާހަކީ ވަރަށް ކުރީގެ ގާނޫނަކަށް ގެނައުމަށް ހުށަހަޅާފައިވާ އިސްލާހެއް ކަމަށެވެ. އޭގެ ތެރޭގައި ވަޒީފާ އާއި މާލީ ސެކިއުރިޓީ އަދި ބޭންކިންގެ ގާނޫނަށް ބަދަލު ގެނައުމަށް ހުށަހަޅާފައިވާ ކަމަށް އޭނާ ވިދާޅުވި އެވެ.
އޭނާ ވިދާޅުވީ، އެ އިސްލާހު ހުށަހެޅުމުގެ ބޭނުމަކީ އެ ގާނޫނުތަކާއި މުވައްޒަފުންނަށް އިނާޔަތްތައް ދިނުމަށް އޮތް ގާނޫނުގައި ފުށުއެރުންތަކެއް ހުރުމުން ކަމަށެވެ.