18 Aug 2015, 14:21
ކުށްތަކުގެ އަދަބު އިސްލާމީ ޝަރީއަތާ އެއްގޮތަށް ތާންފީޒު ކުރުމަށް ގާނޫނުލް އުގޫބާތުގެ 1205 ވަނަ މާއްދާއަށް މަހިބަދޫ ދާއިރާގެ މެމްބަރު އަހުމަދު ތާރިގު (ޓޮމް) ހުށަހަޅުއްވާފައިވާ އިސްލާހަކީ ދީނަށް ދެވޭ ނަސްރެއް ކަމަށް ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
ގާނޫނުލް އުގޫބާތުގެ 1205 ވަނަ މާއްދާއަށް ތާރިގު ހުށަހަޅުއްވާފައިވާ އިސްލާހުގައި ބުނެފައި ވަނީ ގާނޫނުލް އުގޫބާތުގައި އެހެން ގޮތަކަށް ބަޔާންކޮށްފައިވިޔަސް އިސްލާމީ ޝަރީއަތުގައި ހައްދު ކަނޑައަޅާފައިވާ ކުށެއް އެއްވެސް ޝައްކެތް ނެތް މިންވަރަށް މީހެއްގެ މައްޗަށް ސާބިތުވެއްޖެނަމަ، އަދި އެ މީހާގެ މައްޗަށް ހައްދު ގާއިމް ކުރުމަށް މަނާ ކުރާ ޝަރުއީ ސަބަބެއް ނެތް ނަމަ، އެ މީހާގެ މައްޗަށް ކަނޑައަޅަން ވާނީ އިސްލާމީ ޝަރީއަތުގައި ކަނޑައަޅާފައިވާ ހައްދުގެ އަދަބު ކަމަށެވެ.
އެ އިސްލާހަށް ތާއިދު ކުރެއްވި މަޖިލީހުގެ މެމްބަރުން ވިދާޅުވެފައި ވަނީ އެ އިސްލާހުގެ ސަބަބުން ގުރުއާނާއި ސުންނަތުން ސާބިތުވާން ހުރި ހައްދުގެ އަދަބު ގާއިމް ކުރުމަށް ތަނަވަސް ވެގެންދާނެ ކަމަށެވެ. ގާނޫނުލް އުގޫބާތުގައި މިހާރު ކަނޑައަޅާފައި ވަނީ ހަމައެނަކި ގުރުއާނުގައި ކަނޑައަޅާފައިވާ ހައްދުގެ އަދަބު ދިނުމަށެވެ. އެގޮތަށް ގާނޫނުލް އުގޫބާތުގައި މިހާރު ބަޔާންކޮށްފައިވުމުން ސުންނަތުން ސާބިތުވާން ހުރި ހައްދުގެ އަދަބު ކަނޑައެޅުމަށް ހުރަސް އެޅޭނެ ކަމަށް އިލްމުވެރިން ދެކެވަޑައިގަންނަވަ އެވެ.
ގާނޫނުލް އުގޫބާތަށް ޓޮމް ހުށަހެޅުއްވި އިސްލާހާ ގުޅިގެން މަޖިލީހުގައި އެ އިސްލާހަށް ބަހުސް ފަށާފައި ވަނިކޮށް ޝަހީމް މިއަދު ވަނީ އެ ބިލާ ގުޅޭ ގޮތުން ފަސް ޓުވީޓެއް ކުރައްވާފަ އެވެ.
ޝަހީމް ވިދާޅުވެފައި ވަނީ ތާރިގު އިސްލާހަކީ ފުރިހަމަ އިސްލާހެއް ކަމަށާއި އެ އިސްލާހުން އިސްލާމީ ޝަރީއަތުގެ އެންމެ ސައްހަ ދެ މައްސަދަރަށް އިއްޒަތާއި ބާރު ދެވޭ ކަމަށެވެ.
ޝަހީމް އެ އިޝާރާތް ކުރައްވަނީ ގުރުއާނާއި ސުންނަތަށެވެ. ތާރިގުގެ އިސްލާހުގައި އިސްލާމީ ޝަރީއަތް ގާއިމް ކުރުމަށް ބާރު ދީފައި ވަނީ ގުރުއާނާއި ސުންނަތަށެވެ.
ޝަހީމްގެ ޓްވީޓުތަކުގައި ވިދާޅުވެފައި ވަނީ އިސްލާމީ ޝަރީއަތުގައި އުގޫބާތުގެ ހުކުމްތައް ބަޔާންވެގެންވާ ކަންކަމުގައި ކަނޑައަޅަންވާނީ އެ ހުކުމްތައް ކަމަށެވެ.
"އެ ޝަރީއަތުގައި އޮތް އުގޫބާތުގެ ހުކުމެއް، ގާއިމް ކުރުމަށް ދަތިވާ ޝަރުއީ އުޒުރެއް އޮވެއްޖެނަމަ ތަންފީޒު ކުރުން ލަސްކުރެވިދާނެ އެވެ. އިސްލާމީ ޝަރީއަތުގައި އޮތް އުގޫބާތުގެ ހުކުމެއް ގާއިމް ކުރަންވާނީ ޝައްކެތް ނެތް މިންވަރަށް ސާބިތުވުމުންނެވެ،" ރައީސް ވަހީދުގެ ސަރުކާރުގައްޔާއި ރައީސް ޔާމީންގެ ސަރުކާރުގައި ވެސް އިސްލާމިކް މިނިސްޓަރުކަން ވެސް ކުރެއްވި ޝަހީމް ވިދާޅުވި އެވެ.
މިދިޔަމަހުގެ 16 ވަނަ ދުވަހު އަމަލު ކުރަން ފެށި އާ ގާނޫނުލް އުގޫބާތަށް ޓޮމް ހުށަހެޅުއްވި އިސްލާހު މިއަދު ވަނީ މަޖިލީހަށް ބަލައިގެންފަ އެވެ. އެ އިސްލާހު ބަލައިގަތީ 47 މެމްބަރުންގެ އަގުލަބިއްޔަތުންނެވެ. އެ އިސްލާހާ ދެކޮޅަށް އެއްވެސް މެމްބަރަކު ވޯޓެއް ނުދެއްވަ އެވެ.