18 Aug 2015, 14:08
މިދިޔަ މަހުގެ 16 ވަނަ ދުވަހު އަމަލު ކުރަން ފެށި ގާނޫނުލް އުގާބާތަށް މަހިބަދޫ ދާއިރާގެ މެމްބަރު އަހުމަދު ތާރިގު ހުށަހެޅުއްވި އިސްލާހު ރައްޔިތުންގެ މަޖިލީހުގެ މިއަދުގެ ޖަލްސާގައި ބަލައިގެންފައިވާއިރު މަކުނުދޫ ދާއިރާގެ މެމްބަރު އަނާރާ ހުށަހެޅުއްވި އިސްލާހު ބޭރުކޮށްލައިފި އެވެ.
ތާރިގު ހުށަހެޅުއްވި އިސްލާހު މަޖިލީހަށް ބަލައިގަތީ 47 މެމްބަރުންގެ އަގުލަބިއްޔަތުން ނެވެ. އަދި އަނާރާގެ އިސްލާހު މަޖިލީހުން ބޭރުކޮށްލީ 35 މެމްބަރުންގެ ވޯޓުން ނެވެ. އެ އިސްލާހު ބަލައިގަންނަން 10 މެމްބަރަކު ވޯޓު ދެއްވި އެވެ.
ގާނޫނުލް އުގޫބާތަށް އަނާރާ ހުށަހެޅުއްވި އިސްލާހުގައި ބުނެފައި ވަނީ ކީރިތިރަސޫލާގެ ސުންނަތުން ސާބިތުވާ ހައްދުކަނޑައެޅިފައިވާ ކުށްތަކަށް ދިނުމަށް ކަނޑައަޅާފައިވާ އަދަބުތައް ގާނޫނުލް އުގޫބާތުގައި ހިމެނުމަށެވެ. އަނާރާ ހުށަހެޅުއްވި އިސްލާހު މަޖިލީހުގެ ތަޅުމުން ބޭރުކޮށްލެއްވި ނަމަވެސް އޭނާ މިއަދު ވަނީ ތާރިގު ހުށަހަޅުއްވާފައިވާ އިސްލާހަށް ތާއީދު ކުރައްވައި ވާހަކަފުޅު ދެއްކެވި އެވެ.
މަކުނުދޫ ދާއިރާގެ މެންބަރު އަނާރާ ނައީމް: ގާނޫނުލް އުގޫބާތަށް އޭނާ ހުށަހެޅުއްވި އިސްލާހު މިއަދު ވަނީ ބޭރުކޮށްލާފައި -- ފޮޓޯ/ މަޖިލިސް
ސަރުކާރު ހިންގާ ޕާޓީ، ޕީޕީއެމްގެ މެމްބަރު ތާރިގު ވަނީ ގާނޫނުލް އުގޫބާތުގެ ތިން މާއްދާއަކަށް އިސްލާހު ހުށަހަޅުއްވާފަ އެވެ. އޭނާ އިސްލާހު ހުށަހަޅުއްވާފައި ވަނީ ގާނޫނުލް އުގޫބާތުގެ ފައިސާގެ އަދަދުތައް މުރާޖައާކުރުމުގެ މާއްދާ އާއި ރިޝްވަތު ހުށަހެޅުމާއި މަންފާއެއްގެ ގޮތުގައި ފައިސާ ދިނުމުގެ މާއްދާގެ އިތުރުން ހައްދުގެ ކުށްތައް ބަޔާންކޮށްފައިވާ މާއްދާއަށެވެ.
ފައިސާގެ އަދަދުތައް މުރާޖައާކުރުމުގެ މާއްދާގައި މިހާރު ބުނެފައި ވަނީ ފައިސާގެ އަދަދުތަކަށް ބަދަލު ގެނައުމަށް ޓަކައި މަދުވެގެން ކޮންމެ ހަތަރު އަހަރަކުން އެއް ފަހަރު ރައްޔިތުންގެ މަޖިލީހުން އެ އަދަދު މުރާޖާކޮށް ގެންނަން ޖެހޭ ބަދަލުތައް ގެންނަންޖެހޭނެ ކަމަށެވެ.
ތާރިގު ހުށަހަޅުއްވާފައިވާ އިސްލާހުގައި މިހާރު ބުނެފައި ވަނީ ފައިސާގެ އަދަދުތަކަށް ބަދަލު ގެނައުމަށް ޓަކައި މަދުވެގެން ކޮންމެ ފަސް އަހަރަކުން އެއްފަހަރު އެ އަދަދު މުރާޖާކޮށް ގެންނަން ޖެހޭ ބަދަލުތައް ހިމެނޭ ބިލެއް ރައްޔިތުންގެ މަޖިލީހަށް ސަރުކާރުގެ ފަރާތުން ހުށަހަޅަން ޖެހޭނެ ކަމަށެވެ.
ގާނޫނުގެ 314 ވަނަ މާއްދާގެ (ށ) އަށް ހުށަހަޅާފައިވާ އިސްލާހުގައި ބުނެފައި ވަނީ އެ މާއްދާގެ (ހ)ގެ ދަށުން ގަބޫލުކުރުމުގެ ހުއްދަ ނެތް މަންފާއެއް ލިބިގެންފި މީހަކު އެ ކުރަނީ ކުށެއް ކަމަށެވެ.
މަހިބަދޫ ދާއިރާގެ މެމްބަރު އަހުމަދު ތާރިގު: ގާނޫނުލް އުގޫބާތަށް ތާރިގު ހުށަހެޅުއްވި އިސްލާހު މަޖިލީހުން މިއަދު ވަނީ ބަލައިގެންފައި -- ފޮޓޯ/ މަޖިލިސް
ހައްދުގެ ކުށްތައް ބަޔާންކޮށްފައިވާ މާއްދާގައި މިހާރު ބުނެފައި ވަނީ ގުރުއާނުގެ ހައްދު ކަނޑައެޅިފައިވާ ކުށެއް މީހެއްގެ މައްޗަށް ސާބިތުވެއްޖެ ނަމަ އިސްލާމީ ޝަރީއަތުގެ އަސްލުތަކާ އެއްގޮތްވާ ގޮތުގެ މަތީން ގާނޫނުލް އުގޫބާތާއި ގުރުއާނުގައި ކަނޑައަޅާފައިވާ އުގޫބާތެއް އެ މީހެއްގެ މައްޗަށް ކަނޑައަޅަންވާނެ ކަމަށެވެ.
އެ މާއްދާއަށް ތާރިގު ހުށަހަޅާފައިވާ އިސްލާޙުގައި ބުނެފައި ވަނީ މި ގާނޫނުގައި އެހެން ގޮތަކަށް ބަޔާންކޮށްފައިވީ ނަމަވެސް އިސްލާމީ ޝަރީއަތުގައި ހައްދު ކަނޑައެޅިފައިވާ ކުށެއް އެއްވެސް ޝައްކެއް ނެތް މިންވަރަށް މީހެއްގެ މައްޗަށް ސާބިތުވެއްޖެ ނަމަ، އަދި އެ މީހާގެ މައްޗަށް ހައްދު ގާއިމުކުރުން މަނާކުރާ ޝަރުއީ ސަބަބެއް ނެތް ނަމަ، އެ މީހާގެ މައްޗަށް ކަނޑައަޅަންވާނީ އިސްލާމީ ޝަރީއަތުގައި ބަޔާންކޮށްފައިވާ ހައްދުގެ އަދަބެވެ.
އަނެއް އިސްލާޙުގައި ބުނެފައި ވަނީ އިސްލާމީ ޝަރީއަތުގައި ހައްދުގެ އަދަބު ކަނޑައެޅިފައިވާ ކުށެއް އެ މާއްދާގެ (ހ)ގައި ބަޔާންކޮށްފައިވާ މިންގަނޑުން ސާބިތުނުކުރެވުނު ކަމަށް ވިޔަސް ގާނޫނުލް އުގޫބާތުގެ ދަށުން އެ ކުށެއް ސާބިތުކުރަން ކަނޑައަޅާފައިވާ މިންގަނޑުން އެ ކުށެއް ސާބިތުކުރެވިއްޖެ ނަމަ، އެ ގާނޫނުގެ ދަށުން އެ ކުށަކަށް ކަނޑައެޅިފައިވާ އަދަބެއް ދޭންވާނެ ކަމަށެވެ.
ގާނޫނުލް އުގޫބާތަކީ ޖިނާއީ ކުށްކުށާއި އެ ކުށްކުށުގެ ޒިންމާ އުފުލުމުގެ މިންގަނޑާއި އެ ކުށް ސާބިތުކޮށްދިނުމުގެ ރުކުންތަކާއި އެ ކުށްކުށުގެ އުގޫބާތާއި ކުށްކުށާއި އުގޫބާތް ދަރަޖަ ކުރެވިގެންވާ ގޮތާއި ކުށުގެ ދިފާއުގެ ގޮތުގައި ބޭނުން ކުރެވޭނެ ކަންތައްތަކާއި އަދަބު ކަނޑައެޅުމުގެ އުސުލާއި އަދަބު ކަނޑައެޅުމުގެ މިންގަނޑު ކަނޑައަޅައި އެކަންކަމާ ބެހޭ އެންމެހައި އުސޫލުތައް ބަޔާންކުރާ ގާނޫނެވެ.