13 Aug 2015, 11:45
އައިޖީއެމްއެޗް ވޯޑެއްގެ ސީލިންގުގެ ބައެއް ވެއްޓުނީ ވާރޭ ވެހުމުގެ ސަބަބުން ސީލިންގް ފޯވެގެން ކަމަށް އެއިޖީއެމްއެޗުން ބުނެފި އެެވެ.
އައިޖީއެމްއެޗްގެ ބަލީމީހުން ވެސް ތިބި ވޯޑެއްގެ ސީލިންގުން ބައެއް ވެއްޓިފައި ވަނީ ރޭގެ ވަގުތެއްގަ އެވެ.
އައިޖީއެމްއެޗްގެ މީޑިއާ އޮފިޝަލު ޒީނަތު އަލީ ހަބީބު 'ސަން' އަށް މިއަދު ވިދާޅުވީ އެ ހޮސްޕިޓަލުގެ ދެވަނަ ފަންގި ފިލާގެ ސީލިންގުގެ ބައެއް ރޭގެ ވަގުތެއްގައި ވެއްޓުނީ ބޯކޮށް ވާރޭވެހުމުގެ ސަބަބުން ފޯވެގެން ކަމަށެވެ.
އިންޑިއާ ސަރުކާރުގެ އެހީގައި އައިޖީއެމްއެޗް މަރާމާތުކުރުމުގެ މަސައްކަތް ފަށައިގެން ކުރިއަށްދާ ކަމަށާއި ކުރިއަށް އޮތްތަނުގައި އެކަކަން ހައްލުވެގެންދާނެ ކަމަށް ޒީނަތު ވިދާޅުވި އެވެ.
ރޭ ވެއްޓުނު ސީލިންގުގެ ބައި ސާފުކޮށް ވަގުތީ ގޮތުން އެކަން ހައްލުކޮށްފައި ވާނެ ކަމަށްވެސް ޒީނަތު ވިދާޅުވި އެވެ.
އިއްޔެ މާލެ އާއި ބައެއް ރަށްރަށަށް ބޯކޮށް ވާރޭވެހި އެކިވަރުގެ ގެއްލުންތައް ވަނީވެފަ އެވެ.