12 Aug 2015, 13:32
މާލެ އަށް ދިމާވެފައިވާ ކަރަންޓްގެ މައްސަލަ ހައްލު ކުރަން އަށް މެގަވޮޓްގެ އިންޖީނަކާއި އެއާ ގުޅުންހުރި ތަކެތި ހޯދުމަށް ބީލަމަށް ހުޅުވާލައިފި އެވެ.
އެންވަޔަރަމަންޓް މިނިސްޓްރީގައި މިއަދު އޮތް ރަސްމިއްޔާތުގައި ބީލަން އިފްތިތާހުކޮށްދެއްވީ ސްޓެލްކޯގެ މެނޭޖިން ޑައިރެކްޓަރު އަބުދުއްޝުކޫރެވެ.
މިއަދު ހުޅުވާލި ބީލަމުގެ ދަށުން ހޯދާ އަށް މެގަވޮޓްގެ އިންޖީނު ބެހެއްޓުމަށް ހަމަޖެހިފައި ވަނީ މާލެ އަށް ކަރަންޓް ފޯރުކޮށްދިނުމުގެ ގޮތުން ސްޓެލްކޯގަ އެވެ.
އަށް މެގަވޮޓްގެ އިންޖީނަކީ ޕްރިޕެއަރިން އައުޓާ އައިލެންޑަރސް ފޯ ސަސްޓެއިނަބަލް އެނާޖީ ޑިވެލޮޕްމަންޓް (ޕޮއިސްޑް) ޕްރޮޖެކްޓްގެ ދެވަނަ ފިޔަވަހީގައި ހިމެނޭ އިންޖީނެކެވެ. އެ އިންޖީނަކީ ރާއްޖޭންބޭރުން އެތެރެކުރާ ތެލަށް ބަރޯސާވާ މިންވަރު ކުޑަކުރުމަށާއި ރާއްޖެ އިން ލިބެންހުރި އިއާދަކުރަނިވި ހަކަތައިގެ ވަސީލަތްތަކުގެ ބޭނުންކުރުން އިތުރުކުރުމަށާއި ހަކަތައިގެ އިސްރާފްކުޑަކުރުމަށް ސަރުކާރުން ގެންގުޅޭ ސިޔާސަތުގެ ދަށުން ހިންގާ ޕޮއިސްޑް ޕްރޮޖެކްޓްގެ ދަށުން ހޯދާ އިންޖީނެކެވެ.
މިއަދުގެ ރަސްމިއްޔާތުގައި އެންވަޔަރަންމަންޓް މިނިސްޓަރު ތޯރިގް އިބްރާހިމް ވިދާޅުވީ އޭޑިބީގެ ގްރާންޓް އެސިސްޓަންޓްގެ ދަށުން ހޯދާ އަށް މެގަ ވޮޓްގެ ޖަނަރޭޓަރަކީ މާލެއަށް ދިމާވެފައިވާ ކަރަންޓްގެ މައްސަލައަށް މިހާރުން މިހާރަށް ވެސް ހައްލެއް ބޭނުންވާތީ ހޯދާ ޖަނަރޭޓަރެއް ކަމަށެވެ.
މިނިސްޓަރު ތޯރިގް ވިދާޅުވީ މި އަހަރު ބީލަން ހުޅުވާލާފައިވާ އިރު، އަންނަ އަހަރުގެ ތިންވަނަ ކުއާޓާގައި ޖަނަރޭޓަރު ބެހެއްޓޭވަރު ވާނެ ކަމަށެވެ.
މިނިސްޓަރު ވިދާޅުވީ މާލޭގައި ކަރަންޓް ބޭނުންކުރާ މިންވަރު އިތުރުވާއިރު، ކަރަންޓް އުފައްދާ މިންވަރު ވެސް އިތުރުކުރަން ޖެހިފައިވާ ކަމަށެވެ.
ތޯރިގް ވިދާޅުވީ ހަމަ އެ ޕްރޮގްރާމްގެ ދަށުން އިއާދަކުރަނިވި ހަކަތައިގެ ވަސީލަތްތައް އިތުރުކުރެވޭތޯ ބަލަމުން އަންނަ ކަމަށެވެ. އެގޮތުން އިއާދަކުރަނިވި ހަކަތައިގެ 1.6 މެގަ ވޮޓްގެ ވަސީލަތްތައް އައްޑޫގައި ގާއިމު ކުރަން ނިންމާފައިވާ ކަމަށް މިނިސްޓަރު ވިދާޅުވި އެވެ. އަދި 900 ކިލޯ ވޮޓް އިޔާދަ ކުރަނިވި ހަކަތަ ހަތަރު ރަށެއްގައި ގާއިމު ކުރުމަށް ނިންމާފައިވާ ކަމަށް ވެސް ވިދާޅުވި އެވެ. އެ ހަތަރު ރަށަކީ ގއ. ވިލިނގިއްޔާއި ޅ. ނޭކުރަންދޫ އާއި ބ. ގޮއިދޫގެ އިތުރުން ތ. ބުރުންޏެވެ. އަދި މިހާރު އެ މަސައްކަތް ވެސް ވަނީ ޓެންޑާކޮށް އިވެލުއުޓޭ ކުރުމުގެ ސްޓޭޖްގައިވާ ކަމަށް ތޯރިގް ވިދާޅުވި އެވެ.
"މި މަސައްކަތް ވެސް މިބަލަނީ މި އަހަރު ފަހުކޮޅަށް ނިންމައި ބަޔަކާ ހަވާލު ކުރެވޭތޯ." މިނިސްޓަރު ތޯރިގް ވިދާޅުވި އެވެ.
މީގެ އިތުރުން ސްޓެލްކޯއާ ގުޅިގެން މާލެ ސަރަހައްދުގައި ވެސް އިއާދަކުރަނިވި ހަކަތައިގެ މަޝްރޫއުތައް ކުރިއަށްގެންދަން ނިންމާފައިވާ އިރު، މާލެ ސަރަހައްދުގައި ހަތަރު މެގަ ވޮޓްގެ އިއާދަކުރަނިވި ހަކަތަ ނިޒާމު ގާއިމު ކުރުމަށް ނިންމާފައިވާ ކަމަށް މިނިސްޓަރު ވިދާޅުވި އެވެ. އެގޮތުން އެ މަސައްކަތް ޓެންޑާ ކުރުމަށް ހުޅުވާލައި ނިމުމުން، މިހާރު ކުރިއަށްދަނީ އިވެލުއޭޓް ކުރުމުގެ މަސައްކަތް ކަމަށް ތޯރިގް ވިދާޅުވި އެވެ. އަދި ވަރަށް ކައިރި މުސްތަގުބަލެއްގައި ހުޅުމާލޭގައި ވެސް 1.5 މެގަވޮޓްގެ އިއާދަކުރަނިވި ހަކަތަައިގެ މަޝްރޫއުއެއް ހިންގުމަށް ހަމަޖެހިފައިވާ ކަމަށާއި އަދި 2.5 މެގަވޮޓްގެ އިއާދަކުރަނިވި ހަކަތަ މާލޭގެ ސަރަހައްދުތަކުގައި ޖެހިގެންދާނެ ކަމަށް މިނިސްޓަރު ވިދާޅުވި އެވެ.