10 Aug 2015, 14:47
ދަނޑުވެރިކަމުގެ ކޯޕަރޭޓިވްތައް އުފައްދައި ހަރުދަނާކޮށް އެތަންތަނުގެ އުފެއްދުންތައް މާކެޓްކުރުމުގައި އެހީތެރިވެ ދިނުމަށް ސަރުކާރުން ކުރިއަށްގެންދާ ޕްރޮގްރާމްގެ ދަށުން، ފުނާޑު ކޯޕަރޭޓިވްގެ އުފެއްދުންތައް ޑިއުޓީ ފްރީގައި ވިއްކައި ދިނުމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން އެއްބަސްވެއްޖެ އެވެ.
ޏ. ފުވައްމުލަކު، ފުނާޑު ޑިވެލޮޕްމެންޓް ކޯޕަރޭޓިވް ސޮސައިޓީ އަކީ ދިވެހި އަލަ ތެލުލައި، "އަލަ ޗިޕްސް"ގެ ނަމުގައި ޕެކެޓްގައި ބަންދުކޮށްގެން، ކޮލިޓީ ރަނގަޅު އުފެއްދުމެއްގެ ގޮތުގައި ވިއްކަމުން އަންނަ އެއްޗެއްކެވެ. މިއަދުވި އެއްބަސްވުމުގެ ދަށުން އެއާޕޯޓުގައި އަލަ ޗިޕްސް ވިއްކުމުގެ އިތުރުން ޕްރޮމޯޝަނަލް އިވެންޓްތަކެއް ފިޝަރީޒް މިނިސްޓްރީ އިން ހިންގައިދޭނެ އެވެ.
ފިޝަރީޒް މިނިސްޓްރީގައި ބޭއްވި ރަސްމިއްޔާތެއްގައި އެ އެއްބަސްވުމުގައި އެމްއޭސީއެލްގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އާދިލް މޫސާ އެވެ. ފުނާޑު ޑިވެލޮޕްމަންޓް ކޯޕަރޭޓިވްގެ ފަރާތުން ސޮއިކުރެއްވީ އެ ކޯޕަރޭޓިވްގެ ޗެއާމަން އަހުމަދު ޝަފީގް އަދުނާން އެވެ.
އެ ރަސްމިއްޔާތުގައި ވާހަކަ ދައްކަވަމުން ފިޝަރީޒް މިނިސްޓަރު ޑރ. މުހައްމަދު ޝައިނީ ވިދާޅުވީ މީގެ ކުރިން އެ މިނިސްޓްރީ އިން ޑިއުޓީފްރީގައި ތައާރަފްކޮށްފައި ހުރި ތަކެތީގެ ތެރެއިން އެންމެ ހިނގަނީ ދަނޑުވެރިކަމުގެ ބާވަތްތައް ކަމަށެވެ. މިނިސްޓަރު ވިދާޅުވީ ކޯޕަރޭޓިވްތަކަށް ވެފައިވާ ވައުދާ އެއްގޮތަށް ކުރިއަށް އޮތް ތަނުގައި ވެސް އެ މިނިސްޓްރީގެ ނުވަތަ ސަރުކާރުގެ އެހީއަށް އެދިއްޖެ ނަމަ އެ އެހީތެރިކަން ވަރަށް ފުރިހަމައަށް ފޯރުކޮށްދޭނެ ކަމަށެވެ.
އެމްއޭސީއެލްގެ އެމްޑީ އާދިލް ވިދާޅުވީ މިހާރު ފުނާޑުން ޑިއުޓީ ފްރިގައި ބަހައްޓަފައި ހުރި ޕްރޮޑަކްޓަކީ އެންމެ ވިޔަފާރި ރަނގަޅު އުފެއްދުންތައް ކަމަށެވެ. އެހެންކަމުން ކުރިއަށް އޮތް ތަނުގައި ވެސް އެފަދަ އުފެއްދުންތަކުގެ މާކެޓް ރަނގަޅުވާނެ ކަމަށް ގަބޫލުކުރައްވާ ކަމަށެވެ.