06 Aug 2015, 10:15
ފްރީ ސީޒަން ޓްއާ މުބާރާތެއްގެ ގޮތުގައި ބަޔާން މިޔުނިކްގެ އެލެންޒް އެރީނާ ސްޓޭޑިއަމްގައި ކުރިއަށްދާ އައުޑީ ކަޕް ފައިނަލްގައި 1-0ގެ ނަތީޖާ އަކުން ރެއާލް މެޑްރިޑް ބަލިކޮށް ބަޔާން މިޔުނިކް ޗެމްޕިއަންކަން ހޯދައިފި އެވެ.
ރެއާލްގެ މުހިންމު ކުޅުންތެރިން ކަމުގައިވާ މަޝްހޫރު 'ބީބީސީ' ގައި ހިމެނޭ ބޭލްއާއި ބެންޒަމާ އަދި ސީއާރް ސެވަން ނުވަތަ ކްރިސްތިއާނޯ ރޮނާލްޑޯ ނުލައި ކުޅުނު މެޗްގައި ބަޔާންގެ ލަނޑު މެޗްގެ 88 ވަނަ މިނެޓްގައި ކާމިޔާބު ކުރީ ޑަގުލަސް ކޯސްޓޯ ހުރަސް ކުރި ބޯޅައަކުން ރޮބަޓް ލެވަންޑޮސްކީ އެވެ.
ފްރީސީޒަން ޓްއާގެ ތިން ވަނަ މުބާރާތް ކާމިޔާބު ކުރުމަށް ނިކުތް ރެއާލްއަށް އިތުރަށް މައްސަލަ ކުރިމަތިވީ މެޗްގެ ކުރީކޮޅު އެޓީމްގެ ޑިފެންޑާ ޕެޕޭއަށް އަނިޔާވެގެން ބަދަލު ކުރުމުންނެވެ. މެޗްގައި ބަޔާންއިން އުފެއްދި ނުރައްކާތެރި ބޯޅަތަކެއް ރެއާލްގެ ކީޕަރު ކާލޯ ނާވަސް ވަނީ ދިފާއުކޮށްފަ އެވެ. މެޗްގައި ރެއާލްއިން ވަނީ އެޓީމްގެ ޒުވާން ޓީމުން އުފެދިގެން އައި ހަ ކުޅުންތެރިޔަކަށް ފުރުސަތުދީފަ އެވެ.
މެޗްގައި ކުރިން ބަޔާންއަށް ކުޅުނު ޓޯނީ ކުރުޒް ބަޔާންގެ ކޮޅަށް ހަމަލާ އުފެއްދުމަށް ގިނަ ބޯޅަތަކެއް ވަނީ ފޯރުކޮށްދީފަ އެވެ. ރޭގެ މެޗަކީ މިދިޔަ އަހަރު ހޫނު މުސުމުގައި ބަޔާން ދޫކޮށް ރެއާލްއަށް ބަދަލުވި ކްރޫޒް ބަޔާންއާ ދެކޮޅަށް ކުޅުނު ފުރަތަމަ މެޗެވެ. އަދި މިދިޔަ އަހަރު ރެއާލް ދޫކޮށް ބަޔާންއަށް ބަދަލުވި ޒާބި އޮލޮންސޯ ރެއާލްއާ ދެކޮޅަށް ކުޅެފައިވާ އިރު މިއީ އޭނަވެސް ރެއާލް ދޫކޮށް ދިޔަ ފަހުން އެޓީމާ ދެކޮޅަށް ކުޅުނު ފުރަތަމަ މެޗެވެ.