02 Aug 2015, 22:47
މިދިޔަ ރަމަޟާންމަހު ސަރުކާރު އޮފީސްތަކަށް ހުޅުވާލައިގެން ނެޝަނަލް ސެންޓަ ފޯ ދި އާޓްސް (އެންސީއޭ) އިން ކުރިއަށް ގެންދިޔަ "އޮފީސްތަކުގެ ޓެލެޑްރާމާ މުބާރާތް 2015" ގެ އެންމެ މޮޅު ޑްރާމާއަކަށް މިނިސްޓްރީ އޮފް ހައުސިން އެންޑް އިންފްރާސްޓްރަކްޗަރުން ހުށަހެޅި "އެއްފަސް" ޑްރާމާ ހޮވިއްޖެ އެވެ.
އޮފީސްތަކުގެ ޓެލެޑްރާމާ މުބާރާތް 2015 ގެ ޑްރާމާތަކަށް އެވޯޑް ދިނުމަށް މިރޭ އޮލިމަޕަހުގައި ބޭއްވި ޚާއްސަ ރަސްމިއްޔާތުގައި އެންމެ މޮޅު ޑްރާމާގެ އެވޯޑް ލިބުނު ހައުސިންގް މިނިސްޓްރީގެ "އެއްފަސް" ޑްރާމާއަށް ބައިލައްކަ ރުފިޔާގެ އިނާމް ވަނީ ލިބިފަ އެވެ. އެ އިނާމް ހަވާލުކޮށްދެއްވީ އިކޮނޮމިކް މިނިސްޓަރު މުހައްމަދު ސައީދެވެ.
މިރޭގެ ރަސްމިއްޔާތުގައި ފެނަކަ ކޯޕަރޭޝަނުން ހުށަހަޅައިދިން އައިޓަމެއްގެ ތެރެއިން -- ސަން ފޮޓޯ ޔޫސުފް ސޮފްވާނު
މަޝްހޫރު ނެށުންތެރިޔާ އަދި ޕްރޮޑިއުސަރު ރަވީ ފާރޫގު ޕްރޮޑިއުސްކޮށް ހައުސިންގް މިނިސްޓްރީގެ ފަރާތުން ތައްޔާރުކޮށްފައިވާ އެ ޑްރާމާގައި ދައްކުވައިދެނީ ރާއްޖެތެރޭގައި ދިރިއުޅެމުން ދިޔަ އާއިލާތަކަށް ދިރިއުޅުމުގައި ދިމާވާ މައްސަލަތަކެެކެވެ.
އެންމެ މޮޅު އެކްޓަރެސްގެ މަގާމް ހޯދި ފެނަކަ ކޯޕަރޭޝަންގެ އަޒުލިފާ އިބްރާހިމް -- ސަން ފޮޓޯ ޔޫސުފް ސޮއްވާނު
މި މުބާރާތަކީ ޖަޒުންގެ މާކްސްއާ ބެލުންތެރިންގެ ވޯޓުން ޑްރާމާތަކަށް އިންސާފުކުރި މުބާރާތަކަށްވާއިރު މުޅި މުބާރާތުން އެންމެ މޮޅު އެކްޓަރަކަށް ހޮވިފައިވަނީ އެންވަޔަރަމަންޓް މިނިސްޓްރީން ހުށަހަޅައިދިން "ދިރިހުރުމަށް" ޑްރާމާ އިން ހަސަން އަބްދުލް ކަރީމެވެ. އަދި މުޅި މުބާރާތުން އެންމެ މޮޅު އެކްޓްރެސްގެ އެވޯޑް ލިބިފައިވަނީ ފެނަކަ ކޯޕަރޭޝަންގެ "ޒަޚަމްވި ހިތް" މި ޑްރާމާ އިން އަޒްލިފާ އިބްރާހިމް އެވެ.
އެންމެ މޮޅު އެކްޓަރުގެ މަގާމް ހޯދި ހަސަން އަބްދުލް ކަރީމު -- ސަން ފޮޓޯ ޔޫސުފް ސޮފްވާނު
މި މުބާރާތުގެ އެންމެ މޮޅު އެކްޓަރަކަށް އަދި އެކްޓްރެސް އަށް އިނާމެއްގެ ގޮތުން 15000 ރުފިޔާ އާއި ހަނދާނީ ފިލައެއްގެ އިތުރުން ތައްޓެއް ވަނީ ހަވާލުކޮށްފަ އެވެ. އަދި އެންމެ މޮޅު އެކްޓަރެސްގެ އަދި އެކްޓަރަށް 10000 ރުފިޔާގެ އިނާމާ އެކު ހަނދާނީ ފިލާއެއް ވަނީ ދީފަ އެވެ.
ސަޕޯޓިން އެކްޓަރުގެ މަގާމު ހޯދި ހައުުސިންގް މިނިސްޓްރީގެ އިމްރާން މުހައްމަދު -- ސަން ފޮޓޯ ޔޫސުފް ސޮފްވާނު
މި މުބާރާތުގެ ސަޕޯޓިން އެކްޓަރުގެ މަގާމު ހައުސިން މިނިސްޓްރީގެ "އެއްފަސް" ޑްރާމާއިން އިމްރާން މުހައްމަދަށް ލިބިފައިވާއިރު، ސަޕޯޓިންގް އެކްޓަރެސްއަކަށް ހޮވުނީ އެމްއެންޑީއެފްގެ ޑްރާމާ "ނުރުހުނަސް" އިން އީނާޒް ހުސައިން އެވެ.
ސަޕޯޓިންކް އެކްޓަރެސްގެ މަގާމު ހޯދި އެމްއެންޑީއެފްގެ އީނާޒް ހުސެެއިން -- ސަން ފޮޓޯ ޔޫސުފް ސޮފްވާނު
ޑްރާމާތައް ވަނަކުރުމަށް ބެލުންތެރިން ދެ ލައްކައަށްވުރެ ގިނަ އެސްއެމްއެސް ފޮނުވާފައިވާއިރު ބެލުންތެރިންގެ ވޯޓުން އެންމެ މޮޅު ޑްރާމާއަކަށް ހޮވިފައިވަނީ ފެނަކައިގެ "ޒަޚަމްވި ހިތް" ޑްރާމާއެވެ. އަދި އެންމެ މޮޅު އެކްޓަރުގެ އެވޯޑް ވެސް ލިބިފައިވަނީ އެ ޑްރާމާގެ ލީޑްރޯލް ކުޅުނު މުހައްމަދު ފައިރޫޒަށެވެ. އަދި އެންމެ މޮޅު އެކްޓްރެސްގެ އެވޯޑް ވެސް ލިބުނީ ހަމައެޑްރާމާއިން އަޒްލިފާ އަށެވެ.
ބެލުންތެރިންގެ ވޯޓުން އެންމެ މޮޅު އެކްޓަރަކަށް ހޮވުނު ފައިރޫޒް -- ސަން ފޮޓޯ ޔޫސުފް ސޮފްވާނު
އެ ރަސްމިއްޔާތުގައި އޮފީސްތަކުގެ ޑްރާމާ މުބާރާތުން ފިލްމީ ދާއިރާއަށް ނުކުތް މިހާރު އެދާއިރާގެ ފުންނާބު އުސް ފާންނާނެއް ކަމުގައިވާ މުހައްމަދު މަނިކު ބުނިގޮތުގައި އޮފީސްތަކުގެ ޑްރާމާ މުބާރާތުގެ ސަބަބުން ފިލްމީ ދާއިރާއަށް ގިނަ ފަންނާނުންތަކެއް ނުކުތް ކަމަށެވެ.
"މި މުބާރާތަކީ ހުނަރުވެރި ބަޔަކު ބިނާކުރުމަށް އެޅިގެންދިޔަ ބިންގަލެއް. ފަންނުވެރިިކަމަކީ ދިރުމެއްވާ ކަމެއް، އެހެން ކަމުން ގައުމެއްގެ ދިރިމަކީ ފަންނުވެރިން ކަމަށް އަޅުގަނޑުދެކެން،" މަނިކު ބުންޏެވެ.
މި މުބާރާތުގައި ޖުމްލަ ފަސް ޑްރާމާއެއް ބައިވެރިކޮށްފައިވެ އެވެ. އޭގެތެރޭގައި ހިމެނެނީ ފެނަކަ ކޯޕަރޭޝަނާއި މޯލްޑިވްސް ޕޯޓްސްލިމިޓެޑާއި އެމްއެންޑީއެފާއި އެންވައިރަންމަންޓް މިނިސްޓްރީގެ އިތުރުން ހައުސިންގް މިނިސްޓްރީ އިން ހުށަހަޅައިދިން ޑްރާމާ އެވެ.
މިރޭ ބޭއްވި ރަސްމިއްޔާތުގައި އެންވައިރަމަންޓް މިނިސްޓްރީން ހުށަހަޅައިދިން އައިޓަމެއްގެ ތެރެއިން -- ސަން ފޮޓޯ ޔޫސުފް ސޮފްވާނު
އޮފީސްތަކުގެ ޓެލެޑްރާމާ މުބާރާތަކީ ޓީވީއެމުން 1994 ވަނަ އަހަރުން ފެށިގެން 2006 ގެ ނިޔަލަށް ކުރިއަށް ގެންދިޔަ މުބާރާތެކެވެ. އޭރު ކޮންމެ އަހަރެއްގެ ރޯދަ މަހު ވެސް އޮފީސްތަކުން ވަރަށް ރީތި ޑްރާމާތަކެއް ގެނެސްދީފައިވެ އެވެ. އަދި މިހާރު ވެސް ދިވެހި ފިލްމީ ދާއިރާގަައި ހަރަކާތްތެރިވާ ބައެއް ފަންނާނުންނަކީ އޮފީސްތަކުގެ ޓެލެޑްރާމާ މުބާރާތުން އެ ދާއިރާއަށް ނުކުމެފައިވާ ތިބި މީހުންނެވެ.