02 Aug 2015, 12:24
ފޮތި ބޭނުންކޮށްގެން ރާއްޖޭގައި ބޮޑު ދިދައިގެ ރެކޯޑެއް ހަދަން ނިންމާފައިވާ ކަމަށް ހޯމް މިިނިސްޓްރީ އިން ބުނެފި އެވެ.
ހޯމް މިނިސްޓްރީގެ ޑެޕިއުޓީ މިނިސްޓަރު އަހުމަދު ސަލީމް (މާޒް ސަލީމް) މިއަދު ސަން އަށް ވިދާޅުވީ ފޮތި ބޭނުންކޮށްގެން ހަދަން ނިންމާފައިވާ ދިދައިގެ ރެކޯޑު މި އަހަރު ނިމުމުގެ ކުރިން ބާއްވާނެ ކަމަށެވެ.
"އެ އިވެންޓް އޮންނާނެ ސީދާ ތާރީހެއް އަދި ދަންނަވަން ދަތި. ނޮވެމްބަރުގެ ކުރިން މިކަން ބާއްވާނެ،" މިނިވަން 50 އާ ގުޅިގެން ހަދާ ދިދައާ ބެހޭ ގޮތުން ސަލީމް ވިދާޅުވި އެވެ.
އޭނާ ވިދާޅުވީ އެ ދިދައިގެ ސައިޒާއި ދިދަ ބާއްވާނެ ތަނެއް އަދި ފައިނަލް ނުވާ ކަމަށެވެ. ނަމަވެސް ދިދަ ބޭއްވޭނެ ކަމަށް ބެލެވެނީ ހުޅުމާލޭގައި ކަމަށް ސަލީމް ވިދާޅުވި އެވެ.
އެންމެ ފަހުން ފޮތި ބޭނުންކޮށްގެން ބޮޑު ދިދައިގެ ރެކޯޑު ހަދާފައި ވަނީ ޓިއުނޭޝިޔާގަ އެވެ. މިދިޔަ އަހަރުގެ މޭ މަހު ޓިއުނޭޝިޔާގައި ވަނީ އެ މީހުންގެ ގައުމީ ދިދަ ބޭނުންކޮށްގެން ރެކޯޑު ހަދާފައި އެވެ. ބޮޑު ހުސްބިމެއްގައި 100 އަށް ވުރެ ގިނަ މީހުން ހެދި އެ ރެކޯޑުގައި ބޭނުންކުރި ދިދައިގެ ބަރުމިނުގައި 12.6 ޓަނު ހުރި ކަމަށްވެ އެވެ. އެ ރެކޯޑު އިންތިޒާމު ކުރި ފަރާތްތަކުން ބުނެފައިވާ ގޮތުގައި އެ ދިދަ ފެތުރުމަށް 80 ކިލޯ މީޓަރުގެ ސަރަހައްދެއް ވަނީ ބޭނުންކޮށްފަ އެވެ.
ފޮތިން ބޮޑު ދިދަ ހެދުމުގެ ރެކޯޑުގެ އިތުރުން ބައެއްގައުމުތަކުގައި ވަނީ މީހުން އެއްވެ ތިބެ ވެސް އެމީހުންގެ ގައުމުގެ ދިދައިގެ ރަމްޒު ދައްކުވައިދީގެން ރެކޯޑުތައް ހަދައިފަ އެވެ. އަދި އެންމެ ބޮޑު ދިދަ ދަނޑިއަށް ނެގުމުގެ ރެކޯޑު ވެސް ބައެއް ގައުމުތަކުން ވަނީ ހަދާފަ އެވެ.