31 Jul 2015, 17:51
އިސްލާމީ މަރުކަޒުގެ ބޭރުގައި ނަމާދު ކުރާ ސަރަހައްދު ބޮޑު ކުރުމުން، އެ މިސްކިތުގައި އެއްފަހަރާ 20،000 މީހުންނަށް ނަމާދު ކުރެވޭނެ ކަމަށް އިސްލާމިކް މިނިސްޓްރީން ބުނެފި އެވެ. އިސްލާމީ މަރުކަޒުގެ ބޭރުގައި އެކަނި ވެސް 13،000 މީހުންނަށް ނަމާދު ކުރެވޭނެ ކަމަށް އެ މިނިސްޓްރީން ބުންޏެވެ.
އިސްލާމިކް މިނިސްޓްރީގައި މިއަދު ބޭއްވި ޕްރެސް ކޮންފަރެންސެއްގައި އިސްލާމިކް މަރުކަޒުގެ ބޮޑު ކުރުމާ ބެހޭ ގޮތުން ވާހަކަފުޅު ދައްކަވަމުން އެ މިނިސްޓްރީގެ ނައިބު މުހައްދު މުސްތަފާ އިބްރާހިމް ވިދާޅުވީ މިސްކިތުގެ ބޭރު ފާރު ނެގުމަށްފަހު ސިފައިންގެ ފާރާ ހަމައަށް ތަޅުން އެޅުމަށް ނިންމާފައިވާ ކަމަށެވެ.
ފުރަތަމަ ފިޔަވަހީގައި ހަމަ އެކަނި ވެލިމަގުގައި ތަޅުން އަޅައި ބޮޑު ކުރެވޭނި، އަޅުގަނޑުމެންނަށް ފެންނާނެ ހުކުރު ނަމާދާއި އީދު ނަމާދު ތަކުގައި ވަރަށް ދަތި ހާލުގައި އެތަނުގައި މީހުން ނަމާދު ކުރަނީ
އިސްލާމިކް މިނިސްޓްރީ ބޮޑު ކުރުމާ ބެހޭ ގޮތުން މީޑިއާއަށް މައުލޫމާތު ހިތްސާކުރައްވަނީ -- ސަންފޮޓޯ -- އަލީ ނަސީރު
އެތެރޭގެ ޖާގަ ނުލައި މިސްކިތުން ބޭރުގައި 13،000 މީހުންނަށް ނަމާދު ކުރުމުގެ ޖާގަ ލިބިގެންދާނެމުސްތަފާ
އިސްލާމީ މަރުކަޒު ބޮޑު ކުރުމަށް ބޭރު ފާރު ތަޅާލުމުގެ މަސައްކަތް ހައުސިންގެ މިނިސްޓްރީން މިއަދު އަސުރު ނަމާދަށް ފަހު ވަނީ ފަށާފަ އެވެ. މުސްތަފާ ވިދާޅުވީ ފާރު ތަޅާލައި ގާތަށް އުކާލުމުގެ ކަންތަށް މިރެއަށް ނިމޭނެ ކަމަށެވެ. އަދި ވެލިމަގުގައި ތަޅުން އެޅުމުގެ މަސައްކަތް ދެ ދުވަހެއްގެ ތެރޭ ނިންމުމަށް މަސައްކަތް ކުރަމުންދާ ކަމަށް އޭނާ ވިދާޅުވި އެވެ.
އިސްލާމީ މަރުކަޒުގެ ބޭރު ބޮޑުކުރުމުގެ މަސައްކަތް ކުރިއަށް ދަނީ -- ސަން ފޮޓީ-- އަލީ ނަސީރު
މުސްތަފާ ވިދާޅުވީ މިހާރު މިސްކިތުން ބޭރުގައި ސިފައިންގެ ފާރަށްވާ ގޮތަށް ނަމާދަށް ތިބެވެނީ ގިބްލަޔަށް ނޫން ކަމަށާއި އެކަން ހައްލުކުރުމުގެ ގޮތުން ތަޅުން އެޅުމަށްފަހު މިސްކިތުގެ ސަފުތަކާ އިންވާ ގޮތަށް ކުރެހުމުން ސަފުތަށް ކުރަހާލާނެ ކަމަށެވެ.
އަޅުގަނޑުމެން މިހާރު މިކުރާ ކަމަކީ މިގޮތަށް ފާރު ތަޅާލާފަ ތަޅުން އަޅާއިރު މިސްކިތުގެ ސަފުތަކާ އެއްވަރަށް މިންތަކެއް ޖެހިގެން ދާނެ، ޖެހިގްނެ ދިޔައިމަ ރައްޔިތުން ނަމާދުކުރުމުގައި ގިބްލަޔަށް ކުރިމަތި ލިމުގައި ފަސޭހަތަކެއް ލިބިގެން ދާނެމުސްތަފާ
އިސްލާމީ މަރުކަޒުގެ ބޭރުން ބޮޑުކުރުމަށް ހަމަޖެހިފައިވާ ސަރަހައްދު -- ސަން ފޮޓޯ -- އަލީ ނަސީރު
ފުރަތަމަ ފިޔަވަހީގެ ދަށުން ވެލިމަގުގައި ތަޅުން އަޅައި ބޮޑުކުރުމުގެ މަސައްކަތް މިހާރު ފަށާފައިވާއިރު، ދެ ވަނަ އަދި ތިން ވަނަ ފިޔަވަހީގެ ދަށުން މިސްކިތުގެ އެއް ފަރާތުން ސަލްޓަން ޕާކާއި ހަމައަށް ތަޅުން އެޅުމާއި އަނެއް ފަރާތުން ޖުމްހޫރީ މައިދާނާއި ހަމައަށް މިސްކިތުގެ ބޭރު ތަޅުން ބޮޑު ކުރެވިގެން ދާނެ ކަމަށް އިސްލާމިކް މިނިސްޓްރީން ވަނީ ބުނެފަ އެވެ.
އަޅުގަނޑުމެންނަށް މައުލޫމާތު ލިބިފައި އޮތީ އިސްލާމީ މަރިކަޒު ވަށައިގެން މިހުރި މަގުތަކަކީ ވެހިކަލް ނުދުއްވޭ މަގުތަކަކަށް ހަދާނެ ކަމަށް އެހެންވީމަ ކުރިއައް އޮތްތަނުގައިވެސް މިއީ ފަސޭހައަކަށް ވެގެންދާނެމުސްތަފާ
އިސްލާމީ މަރުކަޒުގެ ބޭރު ބޮޑުކުރުމުގެ މަސައްކަތް ކުރިއަށް ދަނީ -- ސަން ފޮޓީ-- އަލީ ނަސީރު
މުސްތަފާ ވިދާޅުވީ މިސްކިތުގެ ބޭރު ތަޅުން ބޮޑުކުރި ނަމަވެސް ހަރިއްމަ ވަކިވާގޮތަށް ވަކި އިންތަކެއް ޖަހާނެ ކަމަށާއި އަދި ހަރިއްމަ ތެރޭގައި އަހުލާގީ މިންގަނޑު ބަހައްޓަން ޖެހޭ ގޮތާ ބެހޭގޮތުން މައުލޫމާތުގެ ބޯޑެއް ބަހައްޓާނެ ކަމަށެވެ.