31 Jul 2015, 14:47
ސްރީލަންކާގެ ކޮލަމްބޯގައި މިއަދު ބޭއްވި ކެމްޕޭން ރެލީ އަކަށް، ކާކުކަން ނޭނގޭ ބަޔަކު ވަދެ ބަޑިޖަހައި އެކަކު މަރާލައި 12 މީހަކު ޒަހަމުކޮށްލައިފި އެވެ.
ފައިނޭންސް މިނިސްޓަރު ރަވީ ކަރުނަޔަކާ ވާހަކަ ދައްކަވައި ނިންމެވިތަނާ ބަޔަކު ވަނީ އާންމުންގެ ތެރެއަށް ވަޒަންތަކެއް ސްޕްރޭ ކުރާ ގޮތަށް ފޮނުވާލައިފަ އެވެ.
މިއީ އަންނަ މަހު 17 ވަނަ ދުވަހު ސްރީލަންކާއި ބާއްްވާ ރައްޔިތުންގެ މަޖިލީހުގެ އިންތިހާބާ ދިމާކޮށް ދިން މިފަދަ ފުރަތަމަ ހަމަލާ އެވެ.
"ބަޑި ޖެހި މީހުން އައީ ދެ ވެހިކަލްގައި. އެ މީހުން ވަޒަންތައް ސުޕްރޭކޮށްލުމަށް ފަހު އެ ވެހިކަލްތަކުގައި އެނބުރި ފިލީ،" ފުލުހުންގެ ތަރުޖަމާނު ރުވާން ގުނަސޭކަރަ ވިދާޅުވި އެވެ.
"އަންހެނަކު މަރުވި އަދި ޒަހަމުވި 12 މީހުންނަށް ދަނީ ކޮލަމްބޯ ނޭޝަނަލް ހޮސްޕިޓަލްގައި ފަރުވާ ދެމުން،"
މިހާތަނަށް ވަރަށް އޮމާންކޮށް ދިޔަ އިންތިހާބީ ކެމްޕޭންނުގައި މިފަދަ ހާދިސާއެއް ހިނގުމުން އިލެކްޝަން މޮނިޓާ ކުރާ ފަރާތްތަކުން ވަނީ ހައިރާންކަން ފާޅުކޮށްފަ އެވެ.
ލަންކާގެ އިންތިހާބުގެ ސެކިއުރިޓީ ފިޔަވަޅުތައް ވަނީ ވަރަށް ވަރުގަދަ އަށް އަޅައިފަ އެވެ.
"މި ހިނގައި ދިޔަ ކަންތަކުން އަހަރުންނަށް ވަރަށް ބޮޑު ސުވާލުމާކެއް ޖެހިއްޖެ. އެއީ މިހާތަނަށް ހުރިހާ ކަމެއް ވެސް ދިޔައީ ވަރަށް ސާދާކޮށް މަޑުމައިތިރިކޮށް ކަމަށް ވާތީ،" ފްރީ އެންޑް ފެއާ އިލެކްޝަނަކަށް މަސައްކަތް ކުރާ ގްރޫޕަކުން ބުންޏެވެ.
އިލެކްޝަންސް ކޮމިޝަނަރު މަހިންދާ ޑެސްޕަރެޔާ ވިދާޅުވީ މިނިވަން އަދި އިންސާފުވެރި އިންތިހާބެއް ބޭއްވުމަށް އިލެކްޝަންސް ގާނޫނު ދަމަހައްޓަވާނެ ކަމަށެވެ.
ގާނޫނު އަސާސީ އަށް ބަދަލު ގެނެސް އަދި ކޮމިޝަނަރަށް ބާރުތައް ދިނުމަށް ފަހު ބާއްވާ ފުރަތަމަ އިންތިހާބު އޮންނާނީ އަންނަ މަހު އެވެ.
ފުލުހުން ބުނީ ބަޑި ޖެހި މީހުންގެ ފަހަތުގައި ތިބި ބަޔަކު ހޯދުމުގެ މަސައްކަތް ފަށާފައިވާ ކަމަށެވެ.
މައުލޫމާތު: ލަންކާގެ ނޫސްތައް