29 Jul 2015, 09:39
ތެހެރާން (ޖުލައި 29) : އީރާނާއި ދުނިޔޭގެ ބޮޑެތި ބާރުތަކާދެމެދު ސޮއިކުރި ނިއުކްލިޔާ އެއްބަސްވުމާ ގުޅިގެން ގަލްފަށް ކުރައްވަމުން ގެންދަވާ ދަތުރުފުޅުގައި ޔޫރަޕްގެ އިއްތިޙާދުގެ ޚާރިޖީ ކަންކަމާބެހޭ ވެރިޔާ ފްރެޑްރިކާ މޮގިރީނީ އީރާނަށް ވަޑައިގެން ރައީސް ހަސަން ރޫހާނީއާ ބައްދަލުކުރައްވައިފި އެވެ.
ރޫޙާނީއާ ބައްދަލުކުރެއްވުމަށް ފަހު މޮގިރީނީ ވިދާޅުވީ އީރާނާއެކު ހުރިހާ ދާއިރާތަކެއްގައި ވެސް ރަނގަނޅު ގުޅުންތަކެއް ގާއިމްކުރުމަށް ޔޫރަޕްގެ ގައުމުތައް ތައްޔާރަށް އޮތްކަމުގަ އެވެ. ރައީސް ރޫޙާނީ ވިދާޅުވީ ބައިނަލްއަގްވާމީ މައްސަލަތައް ޙައްލުކުރުމުގައި ޔޫރަޕާބައިވެރިވާން އީރާން އެދޭކަމުގަ އެވެ. އީރާނަށް ކުރައްވަމުން ގެންދަވާ ދަތުރުފުޅުގައި އެގައުމުގެ ޚާރިޖީ ވަޒީރު މުހައްމަދު ޖަވާދު ޒަރީފް އާއެކު ބޭއްވި ނޫސްވެރިންގެ ބައްދަލުވުމެއްގައި މޮގިރީނީ ވަނީ ޔޫރަޕްގެ ގައުމުތަކާއި އީރާނުގެ ގުޅުންތަކުގެ އައުސަފްޙާއެއް ހުޅުވިގެން ހިނގައްޖެ ކަމަށް ވިދާޅުވެ ވާހަކަ ދައްކަވާފަ އެވެ. އީރާނުގެ ނިއުކްލިޔާ އެއްބަސްވުމާއެކު ޔޫރަޕްގެ ގައުމުތަކާއި އީރާނާދެމެދު އިތުބާރާއި ޔަގީންކަން ވެސް އުފެދިގެން ހިނގައްޖެ ކަމަށް ވެސް މޮގިރީނީ ވިދާޅުވި އެވެ. މިނޫސްކޮންފަރެންސްގައި ވާހަކަ ދައްކަވަމުން އީރާނުގެ ޚާރިޖީ ވަޒީރު މުހައްމަދު ޖަވާދު ޒަރީފް ވިދާޅުވީ އީރާނާއި ޔޫރަޕްގެ އިއްތިޙާދާ ދެމެދު ހުރިހާ ގޮތަކުންވެސް ގުޅުންތައް ރަނގަނޅު ކުރުމަށް ޓަކައި މަތީފެންވަރުގެ ވާހަކަތަކެއް ކުރިޔަށްގެންދިޔުމަށް ދެފަރާތުން އެއްބަސްވެފައިވާ ކަމުގަ އެވެ.
މޮގިރީނީ ގެ މިދަތުރުފުޅަކީ އީރާނުގެ ނިއުކްލިޔަރ އެއްބަސްވުމަށް ފަހު ޔޫރަޕްގެ އިއްތިޙާދުގެ އިސް މަސްއޫލުވެރިއަކު އީރާނަށް ކުރައްވާ ފުރަތަމަ ދަތުރުފުޅެވެ. އީރާނަށް ވަޑައިގެންނެވުމުގެ ކުރިން މޮގިރީނީ ވަނީ މެދުއިރުމަތީގައިވާ އީރާނުގެ އެންމެ ބޮޑު ވާދަވެރިޔާ ކަމަށްވާ ސައޫދީ އަރަބިޔާއަށް ޒިޔާރަތް ކުރައްވާފަ އެވެ. ސައޫދީއަށް ޒިޔާރަތްކުރެއްވީ އީރާނުގެ ނިއުކްލިޔާ އެއްބަސްވުމާ ގުޅިގެން ސައޫދީން ފާޅުކުރާ ކަންބޮޑުވުންތައް ކުޑަކުރުން ކަމަށް މުރާސިލުންބުނެ އެވެ. ނަމަވެސް ރިޔާޒްގައި މޮގިރީނީއާ އެކު ބޭއްވި ނޫސްކޮންފަރެންސެއްގައި ސައޫދީ ޚާރިޖީ ވަޒީރު އާދިލްއަލްޖުބައިރު ވަނީ މެދުއިރުމަތީގައި އީރާން ގެންގުޅޭ ސިޔާސަތުތަކަށް ވަރަށްބޮޑަށް ފާޑުވިދާޅުވެފަ އެވެ. (ނޫސްއެޖެންސީތައް)