28 Jul 2015, 09:30
ދުނިޔޭގައި ފުރަތަމަ ފަހަރަށް ތާޒާކަމާއެކު ނޫޑްލިސް ހެދިގެން ނުކުންނަ ވެންޑިން މެޝިނެއް، ޗައިނާގެ މަރުކަޒީ ރަށް ޝަންގްހާއީގައި ތައާރަފްކޮށްފި އެވެ.
ޗައިނާ، ހޮންގްކޮންގް އަދި ޓައިވާންގެ ކުޅަދާނަ ހަތަރު އުފެއްދުންތެރިއަކު ގުޅިގެން ހަތް މަހުގެ ތެރޭގައި އުފެއްދި އެ މެޝިން ފުރަތަމަ ފަހަރަށް ދައްކާލާފައި ވަނީ، ޝަންގްހާއީ ގައި މިހަފްތާތެރޭގައި ބޭއްވި މައުރަޒެއްގަ އެވެ.
ފައިސާ ދައްކާލުމުން، ދެ މިނެޓު ތެރޭގައި ނޫޑްލިސް ހެދިގެން ނުކުންނަ މެޝިން މީހަކު ބޭނުންކުރަނީ --- ފޮޓޯ/ ޗައިނާ ނިއުސް
މެޝިނުގެ އުފެއްދުންތެރިން ބުނާ ގޮތުން، މެޝިނުގައި ހުންނަ ޓަޗް ސްކްރީނަކުން ބޭނުން ރަހައެއްގެ ނޫޑްލިސް އެއް ހިޔާރުކުރުމަށް ފަހު ފައިސާ ދައްކާލުމުން، ދެ މިނެޓު ތެރޭގައި ތާޒާކަމާ އެކު ނޫޑްލިސް ތައްޔާރުވެގެން ނުކުންނާނެ އެވެ. ނޫޑްލިސް ކައްކަނީ މެޝިނުތެރޭގައި ހަދާފައިހުންނަ ރޮބަޓު އަތަކުންނެވެ.
މެޝިނުގެ އުފެއްދުންތެރިން ބުނާ ގޮތުން، އެ މެޝިނުގެ ދެވަނަ އުދެއްދުމުގައި ރަހަ ހެޔޮވަރުކޮށްލުމަށް އިތުރުކޮށްލަން ބޭނުންވާ އެއްޗިއްސާއި ބަތް އަދި ބުއިންފަދަ އެއްޗެހި މީހުންނަށް ހިޔާރު ކުރުމުގެ ފުރުސަތު ލިބިގެންދާނެ އެވެ.
ނޫޑްލިސް ތައްޔާރުކުރާ ވެންޑިން މެޝިން އުފެއްދި ހަތަރު މީހުން --- ފޮޓޯ/ ޗައިނާ ނިއުސް
ބައިނަލްއަގްވާމީ ފައުންޑޭޝަންތަކުން ހަ މިލިއަން ޔުއާން (އެއް މިލިއަން އެމެރިކާ ޑޮލަރު) ފަންޑުކޮށްގެން ތައްޔާރުކުރި އެ މެޝިން ރަސްމީކޮށް ނެރުމަށް ހަމަޖެހިފައިވަނީ މިއަހަރުގެ އޮކްޓޯބަރު މަހުގެ ތެރޭގައެވެ.
މައުލޫމާތު: ބިޒްނަސް އިންސައިޑް، ޗައިނާ ނިއުސް