23 Jul 2015, 15:50
ރާއްޖޭގެ މިނިވަން ކަމަށް 50 އަހަރު ފުރުމުގެ މުނާސަބަތާ ގުޅިގެން ސްރީލަންކާގެ ރައީސް މައިތުރިޕާލަ ސިރިސޭނާ ރާއްޖެ ވަޑައިގަންނަަވާނެ ކަމަށް ފޮރެއިން މިނިސްޓަރު ދުންޔާ މައުމޫން ވިދާޅުވެއްޖެ އެވެ.
މިއަދު ފޮރެއިން މިނިސްޓްރީގައި ބޭއްވި ރަސްމިއްޔާތެއްގައި ވާހަކަފުޅު ދައްކަވަމުން މިނިސްޓަރު ދުންޔާ ވިދާޅުވީ ރާއްޖޭގެ މިނިވަން ކަމަށް 50 އަހަރު ފުރުމުގެ މުނާސަބަތުގައި ސްްރީލަންކާގެ ރައީސްގެ އިތުރުން އެކި ގައުމުތަކުގެ ސަފީރުންނާއި އިސް މަގާމުތަކުގެ ބޭފުޅުން ރާއްޖެ ވަޑައިންނަވާނެ ކަމަށެވެ.
ރާއްޖޭގެ މިނިވަން ކަމުގެ ރަންޔޫބީލުގެ އުފަލުގައި ބާއްވާ ހަރަކާތްތަކުގައި ސްރީލަންކާގެ ރައީސް ބައިވެރިވަޑައިންނަވާއިރު އެމަނިކުފާނު ރާއްޖެ ވަޑައިގަތުމާ ބެހޭ މައުލޫމާތުތައް ވީހާވެސް އަވަހަކަށް ހާމަ ކުރެވެން އޮތް ވަރަކުން ކުރައްވާނެ ކަމަށް ދުންޔާ ވިދާޅުވި އެވެ.
ދުންޔާ ވިދާޅުވީ އެފަދަ އިސް މަގާމުގެ ބޭފުޅުންތައް ރާއްޖެ ވަޑައިންނެވުމުން ދޭހަ ކޮށްދެނީ ރާއްޖެއާ ދޭތެރޭ އެ ގައުމުތަކުން ބާއްވާ ގާތް ގުޅުމާ ދޭ އަހައްމިތު ކަމަށެވެ.
"ރަންޔޫބީލް އާ ގުޅިގެން ރާއްޖޭގައި އެކި އެކި ރަސްމިއްޔާތުތައް ކުރިއަށް އެބަދޭ. އެ މުނާސަބަތުގައި އަވަށްޓެރި ގާތް އެކި ގައުމުތަކުގެ ވަރަށް އިސްބޭފުޅުން ބައިވެރިވެ ވަޑައިންނަވާ. އެފަދަ އިސް ބޭފުޅުން ވަޑައިގަތުމަކީ އަޅުގަނޑު ގަބޫލު ކުރާގޮތުގައި ރާއްޖެއާ ދޭތެރޭ އެގައުމުތަކުން ބާއްވާ ގާތް ގުޅުމާއި އަދި އަޅުގަނޑުމެންނަށް އެގައުމުތަކުން ދޭ އިހްތިރާމް ފާހަގަ ކުރެވޭ ކަމެއް. އެގޮތުން ސްރީ ލަންކާގެ ރައީސް މައިތުރިޕާލަ ސިރިސޭނާ އަކީ ރާއްޖެ ވަޑައިންނަވާ ވަރަށް އިސް ފަރާތެއް،" ދުންޔާ ވިދާޅުވިއެވެ.
އެގޮތުން ޗައިނާގެ ސްޓޭންޑިން ކޮމިޓީ އޮފް ދަ ނޭޝަނަލް ޕީޕަލްސް ކޮންގްރެސްގެ ވައިސް ޗެއާމަން އާއި ފަލަސްތީނާއި ނޭޕާލްގެ ފޮރެއިން މިނިސްޓަރުން ރާއްޖެ ވަޑައިންނަވާނެ ކަމަށް ދުންޔާ ވިދާޅުވި އެވެ. އަދި ޖަޕާނުގެ ފޮރެއިން މިނިސްޓްރީގެ ނައިބު ރައީސް އާއި ބަންގްލަދޭޝް ފޮރިން މިނިސްޓްރީގެ ސްޓޭޓް މިނިސްޓަރާއި އިންޑިއާގެ ހެލްތު މިނިސްޓަރު އަދި ތުރުކީގެ ޔޫތު މިނިސްޓަރު ވެސް ވަޑައިންނަވާނެ ކަމަށް ދުންޔާ ވިދާޅުވި އެވެ. އޭގެ އިތުރުން ފަލަސްތީނުގެ ސްޓޭޓް އެންޑް ފްރޮންޓިއާ މިނިސްޓަރާއި ސައުދި އަރަބިއްޔާ ކެބިނެޓްގެ ސްޓޭޓް މިނިސްޓަރުވެސް ރާއްޖެ ވަޑައިގަތުމަށް ވަނީ ހަމަޖެހިފައެވެ.